អាមេរិក-អង់គ្លេស៖សង្រ្គាមពាក្យសម្តីបន្តមានខ្ចរខ្ចាយរវាងចៅហ្វាយក្រុងឡុងដ៏ និងប្រធានាធិបតីអាមេរិក
សង្រ្គាមពាក្យសម្តីកំពុងបន្តមានយ៉ាងផុសផុលរវាងចៅហ្វាយក្រុងឡុងដ៍លោកសាឌី កាន និងលោកប្រធានាធិបតីអាមេរិកដូណាល់ ត្រាំ។ នៅថ្ងៃអង្គារ ទី៦ មិថុនា លោកសាឌី កានបន្តវ៉ៃប្រហារលោកដូណាល់ ត្រាំដោយយល់ឃើញថា ប្រទេសអង់គ្លេសមិនគួរផ្តល់កិត្តិយសអញ្ជើញលោកដូណាល់ ត្រាំឲ្យមកបំពេញទស្សនកិច្ចផ្លូវរដ្ឋក្នុងទឹកដីអង់គ្លេសនាឆ្នាំ ២០១៧ នេះទេ។ ប្រតិកម្មរបស់លោកសាឌី កានពេលនេះបានធ្វើឡើង បន្ទាប់ពីលោកត្រាំបានរិះគន់លោកកានពីបទមើលស្រាលលើភេរវកម្មក្នុងទីក្រុងឡុងដ៏ដែលបានសម្លាប់មនុស្ស ៧នាក់ និងរបួស ៤៨នាក់កាលពីថ្ងៃទី៣ មិថុនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
លោកចៅហ្វាយក្រុងឡុងដ៏សាឌី កាននៅមិនទាន់បាត់ខឹង និងមិនទាន់អស់ចិត្តចំពោះសម្តីរិះគន់ ទិតៀនរបស់លោកប្រធានាធិបតីអាមេរិកដូណាល់ ត្រាំទេ។ « ខ្ញុំនិយាយតាំងពីយូរហើយថា ការដែលលោកស្រីនាយករដ្ឋមន្រ្តីអង់គ្លេស Theresa May បានសម្រចចិត្តអញ្ជើញលោកដូណាល់ ត្រាំឲ្យមកបំពេញទស្សនកិច្ចផ្លូវរដ្ឋក្នុងប្រទេសអង់គ្លេស គឺជាការសម្រេចចិត្តរហ័សពេក » នេះជាការថ្លែងរបស់លោកសាឌី កានប្រាប់ AFP-TV នាថ្ងៃអង្គារ ទី៦ មិថុនា។ តាមលោកសាឌី កាន ក្នុងពេលដែលមានពលរដ្ឋអង់គ្លេសភាគច្រើនមិនយល់ស្របតាមនយោបាយរបស់លោកដូណាល់ ត្រាំ អង់គ្លេសមិនគួរហៅលោកត្រាំឲ្យមកបំពេញទស្សនកិច្ចផ្លូវរដ្ឋឡើយ។
កាលពីថ្ងៃចន្ទ ទី៥ មិថុនា ចៅហ្វាយក្រុងឡុងដ៏រូបនេះដដែលក៏បានវ៉ែប្រហារលោកត្រាំម្តងហើយនៅក្នុងឱកាសពិធីគោរពវិញ្ញាណក្ខន្ធមួយរៀបចំក្នុងទីក្រុងឡុងដ៏។ ដោយតាំងខ្លួនជាជនជាតិអង់គ្លេសអ្នកកាន់សាសនាអ៊ីស្លាមគំរូម្នាក់រស់ក្នុងសង្គមចម្រុះជាតិសាសន៍ និងវប្បធម៌ លោកសាឌី កានបានបរិហារចាស់ដៃលើទង្វើជ្រុលនិយមរបស់ពួកភេរវជន និងបន្ថែមថា អង់គ្លេសនឹងមិនទុកបណ្តោយឲ្យនរណាម្នាក់ រួមទាំងលោកដូណាល់ ត្រាំផងចូលបំបែកបំបាក់សហគមន៍អ៊ីស្លាមរបស់អង់គ្លេសបានជាដាច់ខាត។
គួររម្លឹកជូនថា អ្វីៗបានចាប់ផ្តើមពីលោកដូណាល់ ត្រាំដែលកាលពីថ្ងៃទី៤ មិថុនា ពោល ១ថ្ងៃក្រោយភេរវកម្មក្នុងទីក្រុងឡុងដ៏នាយប់ថ្ងៃទី៣ មិថុនា លោកត្រាំបានបញ្ចេញប្រតិកម្មរិះគន់ ទិតៀនលើសម្តីរបស់លោកសាឌី កានដែលថ្លែងទៅកាន់ពលរដ្ឋអង់គ្លេសកុំឲ្យបារម្ភចំពោះវត្តមានកម្លាំងប៉ូលិសដ៏ច្រើនសម្បើមនៅក្នុងទីក្រុង។ លោកត្រាំបានសរសេរតាមបែបចំអកឡកឡឺយដាក់លោកសាឌី កាននៅក្នុងបណ្តាញសង្គម Twitter ថា « ស្លាប់យ៉ាងតិច ៧នាក់ និងរបួស ៤៨នាក់ហើយ បែរជាចៅហ្វាយក្រុងឡុងដ៏និយាយថា គ្មានហេតុផលអ្វីដែលត្រូវបារម្ភទៀត »។
យ៉ាងណាក៏ដោយ លោកត្រាំមិនទាន់បានតបនឹងលោកសាឌី កានដែលមិនចង់ឲ្យលោកទៅបំពេញទស្សនកិច្ចផ្លូវរដ្ឋក្នុងប្រទេសអង់គ្លេសទេ។ តែលោករដ្ឋមន្រ្តីការបរទេសអង់គ្លេសបូរីស ចនសុនដែលជាអតីតចៅហ្វាយក្រុងឡុងដ៏ និងបានគាំទ្រលោកសាឌី កានបានយល់ឃើញថា គេគួរតែបន្តរក្សាទុកគម្រោងទស្សនកិច្ចផ្លូវរដ្ឋរបស់លោកដូណាល់ ត្រាំ។ ដោយឡែក មានញត្តិតាមអ៊ីនធឺណែតកែនប្រមូលមនុស្សបានជិត ១លាន ៨សែននាក់បានទាមទារឲ្យប្តូរទស្សនកិច្ចផ្លូវរដ្ឋរបស់លោកត្រាំទៅជាទស្សនកិច្ចធម្មតាវិញ។ ធ្វើដូចនេះ គឺដើម្បីចៀសវាងការរៀបចំស្វាគមន៍ទទួលលោកត្រាំដែលនាំរំខានដល់ព្រះមហាក្សត្រីអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ