បោះឆ្នោតអង់គ្លេស៖លោកស្រី Theresa May ចាប់ដៃជាមួយគណបក្សផ្សេងដើម្បីមានសម្លេងដាច់ខាតសម្រាប់រដ្ឋាភិបាលថ្មី
ចុះផ្សាយនៅថ្ងៃ៖
ស្តាប់ - ០៧:០១
នៅក្នុងប្រទេសអង់គ្លេស លទ្ធផលផ្លូវការនៃការបោះឆ្នោតសភាមុនកាលកំណត់នាថ្ងៃព្រហស្បតិ៍ ទី៨ មិថុនាបានបង្ហាញថា គណបក្សអភិរក្សនិយមរបស់លោកស្រីនាយករដ្ឋមន្រ្តី Theresa May ឈ្នះនាំមុខគេ តែមិនទទួលបានសម្លេងភាគច្រើនដាច់នៅក្នុងសភាដូចដែលលោកស្រីចង់បានទេ។ គណបក្សជាប់លំដាប់ទី២ និងមានសម្លេងកើនឡើងគួរឲ្យភ្ញាក់ផ្អើល គឺគណបក្សពលកររបស់លោក Jeremy Corbyn។ លោក Corbyn រួមទាំងថ្នាក់ដឹកនាំរបស់បក្សលោកស្រី Theresa May ផងបានទាមទារឲ្យលោកស្រីចុះចេញពីតំណែង តែលោកស្រី May មិនចុះ និងកំពុងរៀបចំបង្កើតរដ្ឋាភិបាលថ្មី។
គេអាចនិយាយបានទេថា ការដែលគណបក្សអភិរក្សនិយមរបស់លោកស្រី Theresa May បាត់បង់អសនៈនៅក្នុងការបោះឆ្នោតនេះ ជារឿងភ្ញាក់ផ្អើល និងជាអ្វីដែលលោកស្រី May មិនបានរង់ចាំទាល់តែសោះ។ តាមធម្មតា អង់គ្លេសនឹងត្រូវរៀបចំបោះឆ្នោតសភានៅ ៣ឆ្នាំខាងមុខទៀត តែការដែលលោកស្រីនាយករដ្ឋមន្រ្តី Theresa May កោះឲ្យមានការបោះឆ្នោតពេលនេះដោយសង្ឃឹមថា គណបក្សអភិរក្សនិយមរបស់លោកស្រីនឹងទទួលបានសម្លេងបន្ថែមនៅក្នុងសភាច្រើនជាងសម្លេងលើសតិចតួចដែលលោកស្រីមាននៅមុនពេលបោះឆ្នោត។
តែផ្ទុយពីការគិតទុក គណបក្សអភិរក្សនិយមមិនត្រឹមតែមិនទទួលបានសម្លេងបន្ថែមទេ តែបែរជាបាត់បង់បន្ថែមនូវសម្លេងដែលមានស្រាប់ទៅវិញ។ នេះហើយជាបរាជ័យដ៏ល្វីងជូរចត់មួយដែលលោកស្រី May មិនបានរង់ចាំ និងមិននឹកស្មានទាល់តែសោះ។ គួររម្លឹកជូនថា គឺនៅពាក់កណ្តាលខែមេសាកន្លងទៅដែលលោកស្រី May បានប្រកាសឲ្យមានការរៀបចំបោះឆ្នោតសភាមុនកាលកំណត់ និងដែលនៅពេលនោះ ក្រុមអ្នកសង្កេតការណ៍ រួមទាំងលទ្ធផលស្ទង់មតិបានប្រមើលទុកពីជោគជ័យដ៏ធំធេងរបស់គណបក្សអភិរក្សនិយម តែលទ្ធផលជាក់ស្តែង គឺផ្ទុយស្រឡះ។
នៅមុនការបោះឆ្នោត គណបក្សអភិរក្សនិយមរបស់លោកស្រី May មាន ៣៣០អសនៈក្នុងចំនួនអសនៈទាំង ៦៥០ នៅក្នុងរដ្ឋសភា តែក្រោយការបោះឆ្នោតនាថ្ងៃទី៨ មិថុនា គឺបានបាត់បង់ពី ១០ ទៅ ១៥អសនៈ។ ចំណែកអ្នកដែលញញឹម បិទមាត់មិនជិត គឺលោក Jeremy Corbyn ប្រធានគណបក្សប្រឆាំង គឺបក្សពលករដែលទទួលបានអសនៈបន្ថែមប្រមាណជា ១០អសនៈ។ ជាសរុប គណបក្សអភិរក្សនិយមឈ្នះ តែគ្មានសម្លេងដាច់ខាតដើម្បីអាចដឹកនាំតែម្នាក់ឯងទេ។
រដ្ឋាភិបាលសម្លេងភាគតិច ឬរដ្ឋាភិបាលចម្រុះ?
ព្រឹត្តិការណ៍ដែលបាននិងកំពុងកើតមានឡើងនៅក្នុងប្រទេសអង់គ្លេសពេលនេះត្រូវបានគ្រប់គ្នាចាត់ទុកជាព្យុះនយោបាយដែលគ្មាននរណាមួយបានទន្ទឹងរង់ចាំទាល់តែសោះ។ អ្វីៗហាក់បានជាប់គាំងមួយកន្លែង និងដែលលោកស្រី Theresa May កំពុងទទួលគំនាបឲ្យចុះចេញពីតំណែងពីលោក Jeremy Corbyn ក៏ដូចពីថ្នាក់ដឹកនាំនៅផ្ទៃក្នុងគណបក្សអភិរក្សនិយមរបស់លោកស្រីដែរ។ លោក Corbyn បានបញ្ជាក់ច្បាស់ៗថា ការបាត់បង់ចំនួនអសនៈតិចតួចរបស់គណបក្សអភិរក្សនិយមពេលនេះជាភស្តុតាងគ្រប់គ្រាន់ដើម្បីចុះចេញពីតំណែង។ តែទោះជាយ៉ាងនេះក្តី លោកស្រី Theresa May មិនខ្ចីយកត្រចៀកស្តាប់ និងបានសុំការអនុញ្ញាតពីព្រះមហាក្សត្រីដើម្បីបង្កើតរដ្ឋាភិបាលថ្មី។
សេណារីយ៉ូនៃការបង្កើតរដ្ឋាភិបាលថ្មីដែលលោកស្រី May មានជម្រើសពីរ ទី១ បង្កើតរដ្ឋាភិបាលសម្លេងភាគតិច និងជម្រើសទី២ បង្កើតរដ្ឋាភិបាលចម្រុះជាមួយគណបក្សមួយ ឬគណបក្សច្រើនដែលមានអសនៈនៅក្នុងរដ្ឋសភា។ បើលោកស្រី May ជ្រើសយកជម្រើសទី១ គណបក្សអភិរក្សនិយមនឹងដឹកនាំរដ្ឋាភិបាលតែម្នាក់ឯង តែត្រូវហ៊ានធានាថា ខ្លួនអាចនឹងសុំបានការគាំទ្រពីគណបក្សផ្សេងក្នុងពេលត្រូវការឲ្យមានការបោះឆ្នោតអនុម័តលើសេចក្តីព្រាងច្បាប់អ្វីមួយនៅក្នុងសភា។ ជម្រើសទី១ នេះជាជម្រើសផុយស្រួយ និងប្រកបដោយហានិភ័យខ្លាំងណាស់។
រដ្ឋាភិបាលមានសម្លេងភាគតិចដឹកនាំដោយគណបក្សតែមួយរបៀបនេះធ្លាប់បានកើតមានម្តងហើយនៅក្នុងប្រទេសអង់គ្លេសកាលពីឆ្នាំ ១៩៧៤។ តែដឹកនាំមិនបានប៉ុន្មានខែផង ក៏ស្រាប់កោះឲ្យមានការបោះឆ្នោតជាថ្មី។
ដូច្នេះ លោកស្រី May អាចជ្រើសយកជម្រើសទី២ គឺបង្កើតរដ្ឋាភិបាលចម្រុះជាមួយគណបក្សមួយ ឬគណបក្សច្រើនដើម្បីអាចទទួលបានសម្លេងដាច់ខាតនៅក្នុងសភា។
កិច្ចចរចាស្តីពី Brexit បន្តដូចការគ្រោងទុក
នៅថ្ងៃទី១៩ មិថុនាខាងមុខ អង់គ្លេស និងអឺរ៉ុបផ្តើមបើកកិច្ចចរចាស្តីពី Brexit ពោលការចាកចេញរបស់អង់គ្លេសពីអឺរ៉ុប។ តែព្យុះនយោបាយនៅអង់គ្លេសពេលនេះអាចនឹងធ្វើឲ្យប៉ះពាល់ដល់កិច្ចចរចាទោះតិច ឬច្រើន។ តែពេលនេះ មានសំណួរជាច្រើនបានចោទឡើង ពិសេសថាតើរដ្ឋាភិបាលថ្មីរបស់អង់គ្លេសនឹងចេញរូបរាងនៅពេលណា និងថា តើរដ្ឋាភិបាលថ្មីដែលលោកស្រី May យល់ព្រមចាប់ដៃជាមួយគណបក្សផ្សេងអាចនឹងមានដំណើរការបានប៉ុន្មានខែ ប៉ុន្មានឆ្នាំ ព្រោះចូរកុំភ្លេចថា ការចរចារវាងអង់គ្លេស និងអឺរ៉ុបស្តីពី Brexit ត្រូវប្រើពេលយ៉ាងតិច ២ឆ្នាំ។
អ្វីដែលគ្រប់គ្នាបារម្ភខ្លាំង គឺស្ថិរភាពនយោបាយ និងភាពរឹងមាំរបស់រដ្ឋាភិបាលថ្មីរបស់លោកស្រី May។ ចង់ ឬមិនចង់ពេលនេះ លោកស្រី Theresa May លែងមានឥទ្ធិពល និងមានទឹកមាត់ប្រៃដូចមុនទៀតឡើយ ទាំងនៅលើឆាកអន្តរជាតិ ក៏ដូចជានៅផ្ទៃក្នុងគណបក្សអភិរក្សនិយមរបស់លោកស្រី។
ដូច្នេះ ជំហររបស់លោកស្រីនៅក្នុងកិច្ចចរចាជាមួយអឺរ៉ុបស្តីពី Brexit អាចនឹងមានការផ្លាស់ប្តូរដែលគេសង្ឃឹមថា នឹងអាចទន់ភ្លន់ជាងមុន។ ចូរកុំភ្លេចថា លោកស្រី May មានជំហរតឹងរឹងជាមួយអឺរ៉ុបនៅក្នុងកិច្ចចរចាស្តីពីការលែងលះអង់គ្លេសពីអឺរ៉ុប។
លោកស្រី May ធ្លាប់និយាយច្រើនដងថា លោកស្រីនឹងព្យាយាមចរចាដើម្បីទទួលបានកិច្ចព្រមព្រៀងល្អៗដែលហុចប្រយោជន៍ច្រើនដល់ប្រទេសអង់គ្លេស។ តាមលោកស្រី May សុខចិត្តមិនទទួលយកកិច្ចព្រមព្រៀងជាជាងយកកិច្ចព្រមព្រៀងដែលអាក្រក់។ ខុសពីលោកស្រី May លោកប្រធានគណបក្សប្រឆាំង Jeremy Corbyn តែងមានជំហរទន់ភ្លន់ជាមួយអឺរ៉ុប និងចង់ឃើញអង់គ្លេសបន្តមានទំនាក់ទំនងជិតស្និទ្ធជាមួយអឺរ៉ុបនៅក្រោយការលែងលះគ្នាជាផ្លូវការនៅឆ្នាំ ២០១៩។
ដូច្នេះគេអាចនិយាយបានថា លទ្ធផលបោះឆ្នោតនៅអង់គ្លេសពេលនេះអាចនឹងរុញទីក្រុងឡុងដ៏ឲ្យប្រកាន់ជំហរទន់ភ្លន់នៅក្នុងកិច្ចចរចាជាមួយអឺរ៉ុបនាថ្ងៃខាងមុខ។ នៅខាងអឺរ៉ុបវិញ ប្រតិកម្មមានច្រើន និងខុសៗគ្នាដែលភាគច្រើនបារម្ភដល់ដំណើរការចរចាស្តីពី Brexit ដែលអាចនឹងអូសបន្លាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ