G២០ ចង់ជួយផ្តល់សន្ទុះសេដ្ឋកិច្ចអាហ្រ្វិកក្នុងបំណងទប់ស្កាត់លំហូរជនអន្តោប្រវេសន៍នៅអឺរ៉ុប
នៅក្នុងប្រទេសអាល្លឺម៉ង់ លោកស្រីនាយករដ្ឋមន្រ្តីអង់ហ្កឺឡា មែរកិលរៀបចំទទួលជួបជាមួយថ្នាក់ដឹកនាំអាហ្រ្វិកមួយចំនួននាថ្ងៃចន្ទ ទី១២ និងថ្ងៃអង្គារ ទី១៣ មិថុនា។ ជំនួបរវាងលោកស្រីមែរកិល និងថ្នាក់ដឹកនាំអាហ្រ្វិកមួយចំនួនពេលនេះធ្វើឡើងនៅក្នុងក្របខ័ណ្ឌអាល្លឺម៉ង់ជាប្រធានផ្លាស់វេន G២០ គឺក្រុមប្រទេសមហាអំណាចឧស្សាហកម្មបូកនឹងក្រុមប្រទេសដែលកំពុងមានសេដ្ឋកិច្ចរីកលូតលាស់។ កម្មវត្ថុ គឺជួយផ្តល់សន្ទុះសេដ្ឋកិច្ចក្នុងទ្វីបអាហ្រ្វិកដែលជាជំហានចាំបាច់ក្នុងការកាត់បន្ថយលំហូរជនអន្តោប្រវេសន៍នៅអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ការទទួលជួបជាមួយថ្នាក់ដឹកនាំអាហ្រ្វិករយៈពេល ២ថ្ងៃក្នុងទីក្រុងប៊ែរឡាំងពីសំណាក់លោកស្រីប្រមុខរដ្ឋាភិបាលអាល្លឺម៉ង់អង់ហ្កឺឡា មែរកិលពេលនេះបានធ្វើឡើង ជិត ១ខែមុននឹង G២០ រៀបចំជំនួបកំពូលនៅក្នុងទីក្រុងហំប៊ួរ។ កម្មវត្ថុរបស់លោកស្រីមែរកិលក្នុងនាមជាប្រធានផ្លាស់វេន G២០ គឺដើម្បីពង្រឹងកិច្ចសហប្រតិការក្នុងការអភិវឌ្ឍន៍សេដ្ឋកិច្ចយូរអង្វែងជាមួយក្រុមប្រទេសអាហ្រ្វិក។ គួររម្លឹកជូនថា នៅក្នុងជំនួបកំពូលថ្នាក់រដ្ឋមន្រ្តីក្រសួងហិរញ្ញវត្ថុរបស់ G២០ កាលពីខែមីនាកន្លងទៅ G២០ បានអញ្ជើញប្រទេសកូដឌីវ័រ ម៉ារ៉ុក រវ៉ាន់ដា និងទុយនីស៊ីឲ្យចូលរួមជាមួយ G២០ ដើម្បីបង្កើតដែគូមួយមានឈ្មោះថា « Compact with Africa »។
តែគោលបំណងរបស់លោកស្រីមែរកិល គឺចង់ឲ្យ G២០ បើកទ្វារទទួលប្រទេសអាហ្រ្វិកទាំងអស់។ អ៊ីចឹងហើយបានជានៅក្នុងកិច្ចប្រជុំរយៈពេល ២ថ្ងៃនេះ គេសង្កេតឃើញមានវត្តមានថ្នាក់ដឹកនាំប្រទេសហ្កាណា អេត្យូពី នីហ្សេ អេហ្ស៊ីប ឬមួយក៏ប្រទេសម៉ាលីជាដើម រួមទាំងស្ថាប័នហិរញ្ញវត្ថុអន្តរជាតិមួយចំនួនដើម្បីជួយគាំទ្រផ្នែកហិរញ្ញវត្ថុ និងបច្ចេកទេសលើគម្រោងកំណែទម្រង់របស់បណ្តារដ្ឋអាហ្រ្វិកទាំងនោះ។ សូមជម្រាបជូនថានៅក្នុងចំណោមប្រទេសអាហ្វ្រិកទាំងអស់ មានតែប្រទេសអាហ្រ្វិកខាងត្បូងមួយគត់ជាសមាជិករបស់ G២០ ហើយរហូតមកដល់ពេលនេះ G២០ មិនដែលបានគិតគូរជួយអភិវឌ្ឍន៍សេដ្ឋកិច្ចនៅក្នុងទ្វីបអាហ្រ្វិកឡើយ។
លោកស្រីមែរកិលក្នុងនាមជាប្រធានផ្លាស់វេន G២០ ចង់ផ្តល់អាទិភាពលើទ្វីបអាហ្រ្វិកតាមរយៈផែនការជួយជំរុញឲ្យមានវិនិយោគបរទេសនៅក្នុងតំបន់ ពោលមិនមែនតាមរយៈការផ្តល់ជំនួយជាលុយកាក់ទេ។ តាមលោកស្រីមែរកិល ទ្វីបអាហ្រ្វិកដែលមានសក្តានុពលធម្មជាតិធំធេងកំពុងត្រូវការវិនិយោគបរទេស និងថា វិធានការរបៀបនេះនឹងជួយលើកស្ទួយសេដ្ឋកិច្ចអាហ្រ្វិក ពិសេសផ្តល់ការងារឲ្យយុវជនអាហ្រ្វិក។ តួលេខផ្តល់ដោយអង្គការក្រៅរដ្ឋាភិបាលឈ្មោះ One ឲ្យដឹងថានៅ ២០ឆ្នាំខាងមុខ នឹងមានយុវជនអាហ្រ្វិកដល់ទៅ ៤៥០លាននាក់ចូលក្នុងទីផ្សារការងារ ហើយនៅ ៥០ឆ្នាំខាងមុខ ទ្វីបអាហ្វ្រិកនឹងមានចំនួន យុវជនច្រើនជាងចំនួនយុវជនសរុបរបស់ក្រុមប្រទេសសមាជិក G២០ ទៅទៀត។
ក្រៅពីចូលរួមជួយលើកស្ទួយសេដ្ឋកិច្ចអាហ្រ្វិក ការជួយជំរុញឲ្យមានការវិនិយោគបរទេសពីសំណាក់ G២០ នៅក្នុងទ្វីបអាហ្រ្វិកក៏ជាជំហានចាំបាច់ និងសំខាន់សម្រាប់កាត់បន្ថយលំហូរជនអន្តោប្រវេសន៍នៅអឺរ៉ុបដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ