ទីក្រុងប៊ែរឡាំងនិងប៉ារីសទិតៀនចំពោះការដាក់ទណ្ឌកម្មរបស់អាមេរិកប្រឆាំងនឹងម៉ូស្គូ
លោកស្រី Angela Merkel នាយករដ្ឋមន្ត្រីអាល្លឺម៉ង់ មានការព្រួយបារម្ភថា “គម្រោងដាក់ទណ្ឌកម្មថ្មីៗរបស់អាមេរិកប្រឆាំងទៅលើប្រទេសរុស្ស៊ីនឹងបណ្តាលឲ្យសហគ្រាសអឺរ៉ុបមួយចំនួន ត្រូវរងគ្រោះផងដែរ-នេះជាសេចក្តីថ្លែងរបស់នាំពាក្យនៃរដ្ឋាភិបាលអាល្លឺម៉ង់នៅថ្ងៃសុក្រម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ព្រឹទ្ធសភាអាមេរិក បានអនុម័តកាលពីថ្ងៃពុធមុន ការដាក់ទណ្ឌកម្មមួយចំនួន ជាអាទិ៍ទណ្ឌកម្មប្រឆាំងនឹងគម្រោងនានាជាពិសេសនៅក្នុងវិស័យថាមពល, ប្រឆាំងនឹងប្រទេសរុស្ស៊ីនៅក្នុងក្របខណ្ឌនៃការលូកដៃជ្រៀតជ្រែករបស់ទីក្រុងម៉ូស្គូនៅក្នុងឪកាសយុទ្ធនាការឃោសនាបោះឆ្នោតប្រធានាធិបតីអាមេរិកនៅឆ្នាំ ២០១៦។
គំនិតផ្តួចផ្តើមនេះ ពុំត្រូវបានគេលើកយកមករពិគ្រោះយោបល់ជាមួយសម្ព័ន្ធមិត្តអឺរ៉ុបទេ។
កាលពីថ្ងៃព្រហស្បតិ៍មុននេះ រដ្ឋមន្ត្រីការបរទេសអាល្លឺម៉ង់លោក Sigmar Gabriel និងនាយករដ្ឋមន្ត្រីអូទ្រីសលោក Christian Kern បានបរិហារវិធានការដាក់ទណ្ឌកម្មថ្មីៗដែលអនុម័តឡើងដោយព្រឹទ្ធសភាអាមេរិក។ រដ្ឋមន្ត្រីការបរទេសអាល្លឺម៉ង់និងនាយករដ្ឋមន្ត្រីអូទ្រីស បានថ្លែងពន្យល់ទៀតថា “ប្រសិនបើវិធានការដាក់ទោសអាមេរិក បានទទួលជោគជ័យនោះ ក្រុមហ៊ុនអឺរ៉ុបមួយចំនួនដែលពាក់ព័ន្ធរកស៊ីជាមួយរុស្ស៊ីនៅក្នុងវិស័យប្រេងឥន្ទនៈ ច្បាស់ជានឹងត្រូវប្រឈមមុខនឹងការដាក់ពិន័យដែរ ពីបទរំលោភលើច្បាប់សហរដ្ឋអាមេរិក។
ចំពោះការដាក់ទណ្ឌកម្មរបស់អាមេរិកប្រឆាំងនឹងរុស្ស៊ី អ្នកនាំពាក្យរបស់នាយករដ្ឋមន្ត្រីអាល្លឺម៉ង់ លោក Steffen Seibert បានធ្វើការវិនិច្ឆ័យថា “គឺជារឿងមួយដ៏ចម្លែកណាស់ ដោយហេតុថា ទណ្ឌកម្មនានារបស់អាមេរិកនោះគឺសំដៅប្រឆាំងតែទៅលើរុស្ស៊ីសោះ តែហេតុអ្វីក៏សហគ្រាសអឹរ៉ុប ក៏ត្រូវទទួលរងគ្រោះដែរនៅក្នុងហេតុការនេះ។ ករណីយបែបដូច្នេះ មិនគួរឲ្យកើតមានទេ-នេះជាការបញ្ជាក់បន្ថែមរបស់អ្នកនាំពាក្យរបស់នាយករដ្ឋមន្ត្រីអាល្លឺម៉ង់ ដោយលោកបន្ថែមទៀតថា “យើងតែងតែមានទម្លាប់មួយ គឺទាត់ចោលជានិច្ចនូវការដាក់ទណ្ឌកម្មនានា ពីព្រោះវានឹងអាចប៉ះពាល់ទៅដល់បណ្តាប្រទេសទី៣។
ចំណែកទីក្រុងប៉ារីសវិញ ក៏បានអំពាវនាវផងដែរកាលពីថ្ងៃសុក្រម្សិលមិញ ឲ្យអាមេរិក គោរពការសម្របសម្រួលជាចាំបាច់ជាមួយនឹងដៃគូអឺរ៉ុបរបស់ខ្លួន បន្ទាប់ពីព្រឹទ្ធសភាអាមេរិកបានអនុម័តលើគម្រោងដាក់ទណ្ឌកម្មថ្មីៗមួយចំនួនប្រឆាំងនឹងរុស្ស៊ីដែលក្នុងនោះក៏មានចំណុចខ្លះ ជាការគំរាមដាក់ទោសដល់សហគ្រាសអ៊ឺរ៉ុបផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ