កិច្ចប្រជុំក្រុងព្រុចសែល៖មេដឹកនាំអឺរ៉ុបមានទំនុកចិត្តខ្ពស់ឡើងវិញ ប្រឈមអង់គ្លេស
ចុះផ្សាយនៅថ្ងៃ៖
ស្តាប់ - ០៥:២៦
កិច្ចប្រជុំក្រុមប្រឹក្សាអឺរ៉ុប បើកធ្វើនៅទីក្រុងព្រុចសែល ថ្ងៃព្រហស្បតិ៍នេះ និងថ្ងៃសុក្រស្អែក ដោយមានវត្តមានប្រមុខរដ្ឋាភិបាលប្រទេសសមាជិកសហភាពអឺរ៉ុប។ ប្រធានាធិបតីបារាំង អេម៉ានុអែល ម៉ាក្រុង ចូលរួមជាលើកទី១ ក្នុងកិច្ចប្រជុំនេះ។ តាំងពីថ្ងៃចន្ទ អង់គ្លេសនិងអឺរ៉ុបចាប់ផ្តើមដំណើរការចរចាប្រិចស៊ីត។ ជាមួយនឹងជំហរចុះខ្សោយរបស់នាយករដ្ឋមន្ត្រីអង់គ្លេស តេរេសា មៃ មេដឺកនាំអឺរ៉ុបបានបង្ហាញទំនុកចិត្តខ្ពស់ឡើងវិញ។ ប្រធានក្រុមប្រឹក្សាអឺរ៉ុប ដូណាល់ ថាស្ក បានលើកឡើងពីការថយចុះនៃចលនាប្រឆាំងនយោបាយអឺរ៉ុប ដែលនេះសបង្ហាញពីសាមគ្គីភាពប្រទេសសមាជិក ដែលនៅតែបន្តស្ថិតក្នុងសហភាពអឺរ៉ុប។
ប្រធានបទសំខាន់ៗនៃកិច្ចប្រជុំ
ប្រធានបទសំខាន់ជាងគេ ក្នុងការពិភាក្សាថ្ងៃនេះ គឺការការពារសន្តិសុខអឺរ៉ុប ប្រឈមភេរវកម្ម។ ដូចយើងឃើញស្រាប់ហើយ មួយរយៈចុងក្រោយមកនេះ បារាំង អង់គ្លេស ប្រឈមនឹងការវាយប្រហារ ការគំរាមភេរវកម្មខ្ពស់។ ស្ថានីយរថភ្លើងមួយនៅក្រុងព្រុចសែល ប្រទេសបែលហ្ស៊ិកទើបនឹងរងភេរវកម្មបំផ្ទុះគ្រាប់បែក កាលពីយប់ថ្ងៃអង្គារកន្លងទៅប៉ុណ្ណោះ។
ក្រៅពីនេះ ប្រធានបទចំបងផ្សេងទៀត ដែលមេដឺកនាំអឺរ៉ុបលើកយកមកពិភាក្សាដែរ គឺមានដូចជា បញ្ហាអន្តោប្រវេសន៍ ការប្រកួតប្រជែងពាណិជ្ជកម្ម ការការពារការវិនិយោគ ប្រឈមការលក់បង្ខូចថ្លៃទំនិញ រឺក៏បញ្ហាអាកាសធាតុ ពិសេសពេលនេះ អាមេរិកដកខ្លួនពីកិច្ចព្រមព្រៀងអាកាសធាតុក្រុងប៉ារីសផងនោះ។
ក្នុងជំនួបនៅក្រុងព្រុចសែលថ្ងៃនេះ យើងឃើញថា លោកអេម៉ានុយអែល ម៉ាក្រុង ដែលជាប្រធានាធិបតីថ្មីរបស់បារាំង ក៏មានវត្តមានជាលើកដំបូងដែរ។ លោកម៉ាក្រុង និងប្រមុខដឹកនាំអាល្លឺម៉ង់ អាន់ហ្កឺឡា មែរគែល នឹងជជែកគ្នាពីការអនុវត្តកិច្ចព្រមព្រៀងទីក្រុងមីនស្ក៍ ឆ្នាំ២០១៥។ កិច្ចព្រមព្រៀងនេះ មានទិសដៅនាំសន្តិភាពអោយភាគខាងកើតអ៊ុយក្រែនវិញ។ កិច្ចព្រមព្រៀងនេះ នៅមិនទាន់ទទួលជោគជ័យនៅឡើយទេ។ បើគ្មានអីទៅមុខទេ តាមមើល បារាំងនិងអាល្លឺម៉ង់ប្រហែលជាស្នើអោយមានទណ្ឌកម្មប្រឆាំងរុស្ស៊ី៦ខែថែមទៀតផងមិនដឺង។
មេដឹកនាំអឺរ៉ុបមានទំនុកចិត្តខ្ពស់ឡើងវិញ និងបង្ហាញភាពសាមគ្គីគ្នាកាន់តែខ្លាំង ប្រឈមនឹងអង់គ្លេស
ក្នុងកិច្ចប្រជុំល្ងាចថ្ងៃព្រហស្បតិ៍នេះ នាយករដ្ឋមន្ត្រីអង់គ្លេស តេរេសា មៃ ប្រហែលពិបាកមើលមុខ មេដឺកនាំអឺរ៉ុបផ្សេងៗទៀត អោយចំមុខ អោយចំក្រសែភ្នែកហើយ ព្រោះមេដឹកនាំប្រទេសសមាជិកអឺរ៉ុបកាន់តែបង្ហាញទំនុកចិត្តខ្ពស់ឡើងវិញ បង្ហាញសាមគ្គីភាពគ្នាកាន់តែទូលំទូលាយ។
ក្នុងពេលអង់គ្លេសកំពុងចរចាដើរចេញពីអឺរ៉ុប លោកស្រីនាយករដ្ឋមន្ត្រីអង់គ្លេស តេរេសា មៃ កំពុងស្ថិតក្នុងស្ថានភាពលំបាក ដោយសារតែត្រូវប្រឈមវិបត្តិក្នុងស្រុក បែបយ៉ាង រដ្ឋាភិបាលលោកស្រីរងការរិះគន់ទាក់ទងចំណាត់ការមិនល្អ ចំពោះគ្រោះអគ្គិភ័យក្រុងឡុងដ៍ នេះនៅមិននិយាយពីការវាយប្រហារភេរវកម្មផង។ អ្នកនយោបាយបក្សលោកស្រីទៀតសោត ក៏លែងពេញចិត្តលោកស្រីដូចមុន ហើយអ្នកនយោបាយខ្លះចង់ទំលាក់លោកស្រីពីតំណែងទៀតផង។ អញ្ចឹង បើប្រទេសសមាជិកអឺរ៉ុប២៧ទៀត បង្ហាញជំហរសាមគ្គីគ្នា បន្តស្ថិតក្នុងអឺរ៉ុប នោះវាជាការព្រមានដ៏ល្អមួយ ដល់អង់គ្លេស ដែលចង់ចាកចេញពីអឺរ៉ុប ពិសេសពេលអង់គ្លេសកំពុងរងការគំរាមភេរវកម្ម អង់គ្លេសប្រហែលអាចស្តាយក្រោយដែរ ព្រោះអឺរ៉ុបកំពុងសាមគ្គីគ្នាក្នុងការប្រឆាំងភេរវកម្ម ការពារពលរដ្ឋអឺរ៉ុប ការពារប្រទេសសមាជិក។ ប្រឈមអង់គ្លេស ប្រឈមនឹងអាមេរិករបស់លោកដូណាល់ ត្រាំដែលហាក់លែងចង់ជួយសមាជិកអូតង់ ប្រទេសអឺរ៉ុបមិនអាចអោបដៃទេ ត្រូវតែរួបរួមគ្នា ការពារគ្នាអញ្ចឹងហើយ។
លោកអេម៉ានុយអែល ម៉ាក្រុង ជាប្រធានាធិបតីបារាំងថ្មី ជាអ្នកការពារនយោបាយអឺរ៉ុបពេញទី ជាមដឺកនាំវ័យក្មេងដែលមានការតាំងចិត្តខ្ពស់ដូចជាអតីតប្រធានាធិបតីបារាំងសាកូហ្ស៊ី។ លោកម៉ាក្រុងក៏ជាអ្នកមានចិត្តធម៌ ចង់ជួយជនភៀសខ្លួនដូចអតីតប្រធានាធិបតីហូឡង់ដែរ។ ចំណុចទាំងអស់នេះហើយ ដែលធ្វើអោយមេដឺកនាំអឺរ៉ុបពេញចិត្តលោក។ ក្នុងជំនួបក្រុងព្រុចសែលទាំង២ថ្ងៃនេះ លោកម៉ាក្រុងច្បាស់ជាចេញមុខការពារនយោបាយអឺរ៉ុបមិនណយដែរទេ ដើម្បីបង្ហាញថា អឺរ៉ុបរួបរួមគ្នា ទោះជាថ្ងៃក្រោយគ្មានអង់គ្លេសក្តី។ នេះជាការលើកទឹកចិត្តមួយ ដល់អឺរ៉ុបប្រឈមអង់គ្លេស។
សាមគ្គីភាពនៅអឺរ៉ុបនេះ ត្រូវបានបង្ហាញកាន់តែច្រើន ខុសពីប៉ុន្មានខែមុននេះ។ នេះបើយោងតាមលោកដូណាល់ ថាស្ក ជាប្រធានក្រុមប្រឹក្សាអឺរ៉ុប។ លោកថាស្ក ប្រាប់ថា បក្សនយោបាយតាមប្រទេសអឺរ៉ុបដែលធ្លាប់ស្អប់នយោបាយសហភាពអឺរ៉ុបពេលនេះ លែងរិះគន់នយោបាយអឺរ៉ុបខ្លាំងក្លាដូចពេលមុនទៀតហើយ។ អង់គ្លេស ប្រហែលគិតថា អឺរ៉ុបជាបញ្ហាហើយ បានជាបោះឆ្នោតដើរចេញពីអឺរ៉ុប តែសម្រាប់ប្រធានក្រុមប្រឹក្សាអឺរ៉ុបវិញ អឺរ៉ុបគឺជាដំណោះស្រាយ អឺរ៉ុបមិនមែនជាបញ្ហាទេ។
ទាក់ទងប្រិចស៊ីតនេះ នាយករដ្ឋមន្ត្រីអង់គ្លេសត្រៀមអោយអង់គ្លេសចរចាស្វិតស្វាញជាមួយអឺរ៉ុប ចៀសវាងសម្រេចកិច្ចព្រមព្រៀងដែលមិនល្អ នាំតែវីវរដល់អង់គ្លេសវិញ។ ក្នុងពេលឆាប់ៗខាងមុខនេះ លោកស្រីតេរេសា មៃនឹងបង្ហាញគោលការណ៍ដែលអ្នកចរចាប្រិចស៊ីតត្រូវអនុវត្ត ក្នុងការចរចាជាមួយអឺរ៉ុប។ សូមបញ្ជាក់ដែរថា ទាក់ទងប្រិចស៊ីតនេះ ស្ថាប័នអឺរ៉ុបចំនួន២នឹងចាកចេញពីក្រុងឡុងដ៍។ ២ថ្ងៃនេះ ប្រទេសអឺរ៉ុបទាំង២៧ នឹងជជែកគ្នាដែរថា តើត្រូវជ្រើសរើសប្រទេសណា សម្រាប់ជាទីតាំងថ្មីរបស់ស្ថាប័នទាំង២នេះ។
គោលការណ៍ការពារប្រយោជន៍អឺរ៉ុបមិនអាចផុងជ្រៅ រហូតភ្លេចគិតទំនាក់ទំនងជាមួយប្រទេសមិនមែនអឺរ៉ុប
ប្រទេសអឺរ៉ុបមួយចំនួន ដូចជាអាល្លឺម៉ង់ មិនចង់អោយនយោបាយការពារផលប្រយោជន៍អឺរ៉ុបនេះ ផុងជ្រៅងុបងុលតែនឹងអឺរ៉ុបពេកដែរ មិនដូច្នេះទេ វាអាចធ្វើអោយគេមើលឃើញថា អឺរ៉ុបគិតតែប្រយោជន៍ជាតិអឺរ៉ុបជ្រុលហួសបាន ដែលនេះអាចបង្កផលវិបាកដល់ទំនាក់ទំនងរវាងអឺរ៉ុប និងប្រទេសមិនមែនសមាជិកអឺរ៉ុប រឺក៏បណ្តាប្រទេសដែលនៅក្រៅដែនដីអឺរ៉ុបជាដើម។
អាល្លឺម៉ង់ និងប្រទេសអឺរ៉ុបខ្លះ មានសហគ្រាស ក្រុមហ៊ុនរកស៊ីនៅក្រៅស្រុក ក្រៅដែនដីអឺរ៉ុប។ អាល្លឺម៉ង់មានក្រុមហ៊ុនរកស៊ីនៅចិន ដូច្នេះ មិនអាចយកប្រយោជន៍អឺរ៉ុបជាធំ ភ្លេចគិតប្រយោជន៍ស្រុកចិនទេ។ មេដឹកនាំអឺរ៉ុបច្បាស់ជាគិតបញ្ហានេះជាធំហើយ ព្រោះពេលនេះ អឺរ៉ុបកំពុងប្រជែងជាមួយសហរដ្ឋ អាមេរិក ដើម្បីដណ្តើមយកឈ្មោះជាអ្នកដឹកនាំការផ្តោះប្តូរសេរីនៅស្រុកចិនផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ