ម៉ាក្រុង៖"បារាំងនៅតែប្រកាន់ជំហរថាដែនដីគ្រីមេ គឺជាដែនដីរបស់អ៊ុយក្រែន"
នៅឱកាសសន្និសីទសាព័ត៌មានមួយជាមួយលោក Porochenko ប្រធានាធិបតីអ៊ុយក្រែននៅទីក្រុងប៉ារីស លោកប្រធានាធិបតីបារាំង Emmanuel Macron បានថ្លែងបញ្ជាក់យ៉ាងម៉ឹងម៉ាត់នៅថ្ងៃចន្ទម្សិលមិញថា”ប្រទេសបារាំងនឹងមិនទទួលស្គាល់ជាដាច់ខាតចំពោះការដែលរុស្ស៊ីកាត់ទឹកដីគ្រីមេនៅភាគខាងកើតអ៊ុយក្រែន មកធ្វើជាកម្មសិទ្ធិរបស់ខ្លួន"។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
« ប្រទេសបារាំង ចង់បានឲ្យប្រទេសអ៊ុយក្រែនមានអធិបតេយ្យភាពពេញលេញនៅទូទាំងប្រទេស"-នេះជាការថ្លែងបញ្ជាក់របស់ប្រមុខរដ្ឋបារាំងក្រោយបន្ទាប់ពីជំនួបប្រាស្រ័យមួយក្នុងរយៈពេលមួយម៉ោងជាមួយប្រមុខរដ្ឋអ៊ុយក្រែនលោក Porochenko ។
លោកម៉ាក្រុង បានថ្លែងប្រាប់លោក Porochenko ជាថ្មីទៀត អំពីឆន្ទះរបស់លោកនៅក្នុងការបន្តដំណើរស្វែងរកសន្តិភាពនៅតំបន់ខាងកើតអ៊ុយក្រែន និងចង់បានការជួបពិភាក្សាគ្នាមួយជាចតុភាគីរវាងបារាំង អាល្លឺម៉ង់ អ៊ុយក្រែននិងរុស្ស៊ី ឲ្យបាននៅមុនពេលជំនួបកំពូលG20។ ប្រធានាធិបតីបារាំង បានថ្លែងបញ្ជាក់ផងដែរពីជំហរអន្ទះសាររបស់លោកនៅក្នុងការចង់បានដំណឹងល្អមួយដើម្បីស្វែងរកដំណោះស្រាយមួយឲ្យបានច្បាស់លាស់និងចេញផុតពីវិបត្តិខាងលើ។
ម្យ៉ាងទៀតនៅឱកាសជំនួបពិភាក្សារវាងចតុភាគីដែលនឹងត្រូវធ្វើឡើងនៅចុងខែមិថុនាឬក៏នៅដើមខែកក្កដាខាងមុខ លោក ម៉ាក្រុង ក៏ប្រាថ្នាចង់ឲ្យមានការគិតគូដោះស្រាយនៅលើបញ្ហាមួយចំនួនជាមុនសិន ដើម្បីឲ្យដំណើរស្វែងរកសន្តិភាពនោះ មានការវិវឌ្យន៍ទៅមុខ។ បញ្ហាទាំងអស់នោះ មានដូចជាការដករាល់កម្លាំងទ័ពនៅជិតព្រំដែន ក្រោមការត្រួតពិនិត្យរបស់អង្គការ OSCE ឬក៏កងសមត្ថកិច្ចរបស់អង្គការអន្តរជាតិ ឬក៏នៅលើបញ្ហារាំងខ្ទប់ខាងសេដ្ឋកិច្ច ក៏ព្រមទាំងនៅលើបញ្ហាអ្នកទោសផងដែរ។ ហើយអ្វីដែលសំខាន់មុនគេ គឺជំនួយឧបត្ថម្ភពីអង្គការ OSCE ពាក់ព័ន្ធនឹងព័ត៌មានជាក់ស្តែងនៅតាមតំបន់ព្រំដែន។
គួររំលឹកថា អ៊ុយក្រែននិងសហគមន៍អន្តរជាតិ មិនទទួលស្គាល់ឡើយ ការដែលរុស្ស៊ីកាត់យកទឹកដីគ្រីមេរបស់អ៊ុយក្រែនមកធ្វើជាកម្មសិទ្ធរបស់រុស្ស៊ីតាំងពីឆ្នាំ២០១៤។
ចាប់តាំងពីនោះមក អ៊ុយក្រែន បានផុងខ្លួនជ្រៅទៅក្នុងសង្គ្រាមរវាងកងទ័ពអ៊ុយក្រែននឹងពួកទាមទារផ្តាច់ទឹកដីនិយមដែលមាននិន្នាការខាងរុស្ស៊ីនៅភាគខាងកើតប្រទេស ជាហេតុបណ្តាលឲ្យមានមនុស្សស្លាប់ជាង១ម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ