ការវាយប្រហារតាមអ៊ីនធ័រនែតទ្រង់ទ្រាយធំទូទាំងពិភពលោក ដោយមេរោគថ្មីឈ្មោះ Petrwrap
ចុះផ្សាយនៅថ្ងៃ៖
ស្តាប់ - ០៤:៣៩
ការវាយប្រហារតាមអ៊ីនធ័រនែត ជាទ្រង់ទ្រាយធំ ទូទាំងពិភពលោក ដោយប្រើកម្មវិធីចាប់ជំរិត បានកើតមានជាថ្មីទៀតហើយ គឺតាំងពីថ្ងៃអង្គារ២៧ឧសភាម្សិលមិញនេះ ដោយប៉ះពាល់មុនគេទៅលើប្រទេសអ៊ុយក្រែននិងរុស្ស៊ី រួចបន្តរាលដាលមកតាមប្រទេសអឺរ៉ុបផ្សេងទៀតដូចជាបារាំង ដាណឺម៉ាក រឺក៏អាល្លឺម៉ង់ ហើយក៏មាននៅអាមេរិកដែរ។ វីរុសថ្មីនេះ ទាមទារអោយគេបង់ប្រាក់៣០០ដុល្លារ បានវាយ ប្រហារកុំព្យូរទ័ររាប់ពាន់គ្រឿង តាមសហគ្រាសជាច្រើន ប៉ះពាល់ដល់ទាំងកន្លែងធ្វើការរដ្ឋាភិបាល អ៊ុយក្រែន។
នេះជាលើកទី២ហើយ គិតតែក្នុងរវាង២ខែប៉ុណ្ណោះ ដែលពិភពលោករងការវាយប្រហារ ទ្រង់ទ្រាយធំតាមអ៊ីនធ័រនែត ដោយកម្មវិធីចាប់ជំរិតប្រាក់។ ការវាយប្រហារទ្រង់ទ្រាយធំលើកទី១ បង្កឡើងដោយវីរុសWannacry នៅថ្ងៃ១២ឧសភាខែមុននេះ ដែលបានប៉ះពាល់ជាង១០០ប្រទេស។
ការវាយប្រហាររបស់វីរុសកម្មវិធីចាប់ជំរិតប្រាក់ Petwrap តាមអ៊ីនធ័រនែត
យោងតាមMicrosoft វីរុសកម្មវិធីចាប់ជំរិតប្រាក់៣០០ដុល្លារ តាមអ៊ីនធ័រនែតលើកនេះ ធ្វើការរាលដាល ដោយប្រើបច្ចេកទេសច្រើន។ បែបយ៉ាងវីរុសនេះបានចាប់ចំណុចខ្សោយរបស់Windows ដើម្បីវាយប្រហារ។ Windows បានចាត់វិធានការកែប្រែប្រព័ន្ធខ្លួនរួចហើយ។ ដំបូង អ្នកជំនាញខ្លះអោយឈ្មោះវីរុសនេះថា Petya ជាវីរុសដែលធ្លាប់វាយប្រហារនៅឆ្នាំមុននេះ។ ប៉ុន្តែ វីរុសចាប់ជំរិតលើកនេះមិនមែនឈ្មោះ Petya ទេ វាជាវីរុសអ៊ីនធ័រនែតថ្មីមួយទៀត ដែលឥឡូវ អ្នកជំនាញមួយចំនួនអោយឈ្មោះថា NotPetya រឺក៏ឈ្មោះថា Pertwrapវិញ។
អ៊ុយក្រែន និងរុស្ស៊ី រងការប៉ះពាល់មុនគេ តាំងពីម្សិលមិញមក។ វីរុសចាប់ជំរិតថ្មីនេះ បានបង្អាក់កុំព្យូរទ័រ នៅតាមធនាគារ ផ្សារទំនិញ និងកន្លែងធ្វើការរដ្ឋាភិបាល។ អញ្ចឹងទៅ អតិថិជនមិនអាចបង់ប្រាក់តាមកាតធនាគារទេ។ វីរុសនេះវាយប្រហាររហូតដល់មជ្ឈមណ្ឌលនុយក្លេអ៊ែរ Tchernobyl ដែលយើងចាំថា មជ្ឈមណ្ឌលនេះធ្លាប់រងមហន្តរាយនុយក្លេអ៊ែរ កាលពីឆ្នាំ១៩៨៦នោះឯង។ ពេលនេះ បុគ្គលិកនៅមជ្ឈមណ្ឌលនេះលែងអាចវាស់ធាតុវិទ្យុសកម្មតាមកុំព្យូទ័រទៀតហើយ ត្រូវប្រើខួរក្បាល ប្រើដៃជើងធ្វើការវិញម្តង។
នៅអឺរ៉ុប វីរុសNotPetya ថ្មីនេះបានបង្កបញ្ហាតាមប្រទេសដូចជាបារាំង ដាណឺម៉ាក អង់គ្លេស អាល្លឺម៉ង់ ដោយបានវាយប្រហារផ្សារទំនិញ ក្រុមហ៊ុនដឺកជញ្ជុន ក្រុមហ៊ុនផ្សាយពាណិជ្ជកម្ម ក្រុមហ៊ុនផលិតគ្រឿងសម្អាងនីវេអា Nivea ជាដើម។ វីរុសនេះក៏បានប៉ះពាល់វិទ្យាស្ថានឱសថសាស្ត្រនៅសហរដ្ឋអាមេរិកដែរ។ ការវាយប្រហារទ្រង់ទ្រាយធំតាមអ៊ីនធ័រនែតទូទាំងពិភពលោកលើកនេះ ទំនង មិនធ្ងន់ធ្ងរ ដូចការវាយប្រហាររបស់វីរុស Wannacry កាលពីខែឧសភាទេ។ ទោះយ៉ាងនេះក្តី យើងមិនទាន់អាចដឺងទំហំនៃការវាយប្រហារលើកនេះទេ ត្រូវរង់ចាំការស៊ើបអង្កេតសិន។ បារាំងបានបើកការស៊ើបអង្កេតហើយ។
អ៊ុយក្រែនចោទថា រុស្ស៊ីនៅពីក្រោយការវាយប្រហារអ៊ីនធ័រនែតនេះ
អ៊ុយក្រែនចោទរុស្ស៊ី ជារឿងធម្មតា ព្រោះអ៊ុយក្រែននិងរុស្ស៊ីមិនត្រូវគ្នាទេ ដោយសារតែរុស្ស៊ីបានភ្ជាប់តំបន់គ្រីមេអ៊ុយក្រែន ចូលជាទឹកដីរុស្ស៊ីនោះឯង។ តាំងពីរុស្ស៊ីយកគ្រីមេធ្វើជាទឹកដីរុស្ស៊ីមក អោយតែមានបញ្ហាវាយប្រហារវីរុសតាមអ៊ីនធ័រនែត នៅតាមស្ថាប័ន រឺធនាគារផ្សេងៗ ទាំងអ៊ុយក្រែន ទាំងរុស្ស៊ី គឺតែងទំលាក់កំហុសគ្នាទៅវិញទៅមកជានិច្ច។
មើលជាក់ស្តែង ការវាយប្រហារដោយកម្មវិធីវីរុសជំរិតប្រាក់ ឈ្មោះ NotPetya លើកនេះ គឺប៉ះផ្ទាល់ទៅលើរុស្ស៊ីដែរ។ ប៉ះក្រុមហ៊ុនប្រេងRosneft ប៉ុន្តែក្រុមហ៊ុនប្រេងនេះអាចបន្តផលិតប្រេងបាន ដោយសារចេះមានServeur បម្រុងទុក ដើម្បីចៀសបញ្ហាមេរោគតាមកុំព្យូរទ័រ។ តែក្រៅពីក្រុមហ៊ុនប្រេងនេះ សហគ្រាសផ្សេងៗរបស់រុស្ស៊ីបានរងការប៉ះពាល់ដូចគេឯងដែរ។ អញ្ចឹងត្រូវរង់ចាំការស៊ើបអង្កេតសិន ទើបអាចដឹងថា វីរុសនេះចេញពីប្រភពណា។ យើងចាំថា កាលពីមានការវាយប្រហារទ្រង់ទ្រាយធំ ដោយវីរុស Wannacry តាមអ៊ីនធ័រនែត ខែមុននេះ ក្រុមស្រាវជ្រាវសន្តិសុខអ៊ីនធ័រនែតរកឃើញភស្តុតាងជាច្រើនបង្ហាញថា Wannacry បង្កឡើងដោយក្រុមចោរព័ត៌មានវិទ្យាដែលជាប់ពាក់ព័ន្ធនឹងកូរ៉េខាងជើង។
ដំបូន្មានអ្នកជំនាញដើម្បីចៀសកុំអោយកុំព្យូទ័ររងការវាយប្រហារដោយកម្មវិធីចាប់ជំរិតតាមអ៊ីនធ័រនែត
វីរុសចាប់ជំរិតប្រាក់ ធ្វើការលាក់ខ្លួនក្នុងឯកសារដែលភ្ជាប់ជាមួយសារអ៊ីមែល។ ក្រុមជំនាញផ្តល់ដំបូន្មានថា បើយើងទទួលសារអ៊ីមែលពីជនមិនស្គាល់ឈ្មោះ ចៀសវាងកុំបើកឯកសារដែលភ្ជាប់ជាមួយអ៊ីមែលនោះ។ យើងត្រូវមានកម្មវិធីសុវត្ថិភាពកុំព្យូទ័រ អោយទៀងពេលវេលា។ ប៉ុន្តែ បើកុំព្យូទ័ររងការប៉ះពាល់ដោយវីរុសចាប់ជំរិតប្រាក់នេះហើយ ដាច់ខាតកុំចុះចាញ់ព្រមបង់ប្រាក់ជំរិតអោយសោះ។ យើងត្រូវបិទសេវាភ្ជាប់អ៊ីនធ័រនែតចោលភ្លាម។ ត្រូវដាក់ប្រព័ន្ធស្អាតស្អំ ក្នុងកុំព្យូរទ័រឡើងវិញ រួចហើយដាក់ពាក្យប្តឹងទៅ។
ដោយឡែក បារាំងប្រាប់ថា ម៉ូតកម្មវិធីវីរុសចាប់ជំរិតប្រាក់នេះ បានចាប់ផ្តើមក្លាយជារឿងទូទៅជាបញ្ហាធម្មតាហើយពេលនេះ ហើយអាចកើតឡើងរាលដាលជាថ្មីទៀត ក្នុងពេលខាងមុខ។ ដូច្នេះត្រូវប្រយ័ត្នសុវត្ថិភាពកុំព្យូទ័រយើងជានិច្ច។
សម័យនេះ ជាសម័យទំនើបផ្នែកឧស្សាហកម្ម ព័ត៌មានវិទ្យា ធ្វើអោយ មនុស្សលែង ឯករាជ្យ លែងចេះប្រើខួរក្បាលគិត លែងចេញប្រើដៃជើងធ្វើការដូចចាស់ៗជំនាន់មុនទៀតហើយ។ ថ្ងៃណាមួយ បើប្រព័ន្ធទំនើ់បនេះជួបបញ្ហាធ្ងន់ រឺក៏ត្រូវរលត់រលាយទៅ យើងច្បាស់ជាយំលែងចេញហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ