ជំនួយវេជ្ជសាស្ត្រដើម្បីមានកូន និងស៊ីឈ្នួលពរពោះខុសគ្នាយ៉ាងដូចម្តេច ?
ចុះផ្សាយនៅថ្ងៃ៖
ស្តាប់ - ០៤:៣៦
នៅថ្ងៃអង្គារទី ២៨មិថុនានេះ គណៈកម្មការពិគ្រោះជាតិពន្ធុបារាំងបានត្រួសត្រាយផ្លូវឱ្យមានការធ្វើវិសោធនកម្មរដ្ឋធម្មនុញ្ញ ស្តីពីបង្កកំណើតដោយជំនួយវេជ្ជសាស្ត្រ។ គណៈកម្មការបានប្រកាសព្រមព្រៀងឱ្យស្ត្រី គ្រប់រូប មិនថាស្ត្រីមានគូស្វាមីភរិយា ស្ត្រីស្រលាញ់ភេទដូចគ្នា និងស្ត្រីនៅលីវទេ សុទ្ធតែអាចមានសិទ្ធិសុំជំនួយវេជ្ជសាស្ត្រស្មើៗគ្នា ប្រសិនបើមានឆន្ទៈចង់បានកូនពិតៗ។ ប៉ុន្តែស្ត្រីនោះមិនអាចពរពោះឱ្យអ្នកដទៃបានទេ។ ការស៊ីឈ្នួលពរពោះ ត្រូវបានហាមឃាត់ដដែលនៅប្រទេសបារាំង។
គណៈកម្មការនេះត្រូវធ្វើសេចក្តីសម្រេច តាំងពីឆ្នាំ២០១៣ ឆ្នាំដែលរដ្ឋាភិបាលធ្វើកំណែទម្រង់ច្បាប់អាពាហ៍ពិពាហ៍អ្នកស្រលាញ់ភេទដូចគ្នាម្ល៉េះ។ តែកាលណោះ ចលនាបាតុកម្មប្រឆាំងនឹងកំណែទម្រង់ច្បាប់ មានស្ទើរទូទាំងប្រទេស ក៏ព្រោះតែពួកគេខ្លាចមានការបង្កកំណើតដោយអត់ឪពុកនេះឯង។ នៅថ្ងៃនេះគណៈកម្មការបានផ្តល់ចម្លើយ ដែលមានតម្លៃជាការពិគ្រោះ តែប្រធានាធិបតីបារាំងថ្មី លោក ម៉ាក្រុង ធ្លាប់បានព្រលយពាក្យយល់ព្រមឱ្យស្ត្រីស្រលាញ់ភេទដូចគ្នាពរពោះបាន ដោយជំនួយវេជ្ជសាស្ត្រ។
វេជ្ជសាស្ត្របារាំងជឿនលឿនណាស់ អាចជួយបង្កកំណើតកូនបានយ៉ាងមានប្រសិទ្ធភាព ប៉ុន្តែ មកទល់នឹងពេលនេះម៉ោងនេះ នៅប្រទេសបារាំង ជំនួយវេជ្ជសាស្ត្រក្នុងការបង្កកំណើតកូន អាចអនុវត្តបានចំពោះគូស្វាមីភរិយា និងគូជីវិតដែលមានភេទផ្ទុយគ្នាតាមបែបធម្មជាតិ និងគ្មានសមត្ថភាពបង្កកំណើតកូនដោយធម្មជាតិតែប៉ុណ្ណោះ។ បើតាមជំរឿន នៅឆ្នាំ២០១៤ មានគូស្វាមីភរិយាប្រមាណ ១៥ម៉ឺននាក់ បានប្រើវិធីជំនួយវេជ្ជសាស្ត្រនេះ ក្នុងនោះ ៩៥%ប្រើមេជីវិតផ្ទាល់របស់ពួកគេ។ ចំណែកស្ត្រីនៅលីវ (ទោល) ឬស្ត្រីស្រលាញ់ភេទដូចគ្នាទៅ ត្រូវរត់ទៅរកជំនួយនៅអង់គ្លេស អេស្ប៉ាញ ឬបែលហ្សិក បើចង់មានកូនខ្លួនឯង ព្រោះប្រទេសនេះមានច្បាប់អនុញ្ញាត។
នៅថ្ងៃនេះគណៈកម្មការបានផ្តល់យោបល់វិជ្ជមានចំពោះស្ត្រី ដោយឈរលើគោលការណ៍សេរីភាព និងសមភាព ក្នុងការទទួលបានបច្ចេកវិទ្យា “បង្កកំណើតដោយជំនួយ” បើទោះបីជាស្ត្រីទាំងនោះ គ្មានដៃគូបុរស សម្រាប់ផ្តល់មេជីវិតដើម្បីបង្កកំណើតតាមបែបធម្មជាតិក៏ដោយ។
ការបង្កកំណើតដោយជំនួយវេជ្ជសាស្ត្រ ឬ ជំនួយវេជ្ជសាស្ត្រនៃការបង្កកំណើត គឺជាបច្ចេកទេស នៃការជួយចាប់ភ្ជុលមេជីវិតឈ្មោល Spermatozoïdes និងមេជីវិតញី Ovules ឱ្យបានជួបគ្នាដើម្បីអាចជួយស្វាមីភរិយាអារ ឱ្យមានកូនបាន។ ដោយមិនឆ្លងកាត់ការរួមរក្ស គ្រូពេទ្យត្រូវបាញ់បញ្ជូលមេជីវិតឈ្មោល ស្ពែម៉ាតូហ្សូអ៊ីត របស់បុរសជាស្វាមី ឬជាអំណោយ ទៅក្នុងមាត់ស្បូន ឬ ក្នុងស្បូនរបស់ស្ត្រី ឱ្យទៅជួបអូវ៉ុលដើម្បីបង្កកំណើត។ ជួនកាល គ្រូពេទ្យអាចយកមេជីវិតឈ្មោល និងមេជីវិតញី របស់គូស្វាមីភរិយា ដាក់ភ្ជុលឱ្យមានការបង្កកំណើតនៅខាងក្រៅ តាមបែបសម្បនិម្មិត្តសិន ដល់ក្លាយជាអំប្រ៊ីយ៉ុង ទើបចាក់បញ្ជូលអំប្រ៊ីយ៉ុងកូននោះ ចូលទៅក្នុងស្បូនស្ត្រី ឱ្យចាប់បន្តកំណើតក្នុងផ្ទៃដូចការពរពោះធម្មជាតិ។ ជំនួយវេជ្ជសាស្ត្រនៃការបង្កកំណើត បានសម្រួលជីវិតគូស្វាមីភរិយាធម្មតា ស្រី និងប្រុស ! ច្រើនណាស់ ព្រោះពាក្យថាជីវិតគូប្តីប្រពន្ធ ជាទូទៅកាន់តែមានន័យនៅពេលកូនពូនជាចៅ។
ចំពោះស្ត្រីរស់នៅតែម្នាក់ឯង និងស្ត្រីស្រលាញ់ភេទដូចគ្នារស់នៅគូស្រីៗ ជំនួយវេជ្ជសាស្ត្រនៃការបង្កកំណើតប្រព្រឹត្តដោយពិធីពីរយ៉ាងដូចរៀបរាប់ខាងលើ គ្រាន់តែថាស្ត្រីនោះត្រូវការរកមេជីវិតឈ្មោល ស្ពែម៉ាតូហ្សូអ៊ីត ពីសប្បុរសជនណាស់ម្នាក់ សម្រាប់មកចាក់បញ្ចូលឱ្យជួបនឹងមេជីវិតញីអូវ៉ុល របស់ស្ត្រីដែលចង់បានកូន។ នៅប្រទេសបារាំង គណៈកម្មការជាតិបានកំណត់យ៉ាងច្បាស់លាស់រក្សានិងពង្រឹងវិធានការដដែល គឺអំណោយមេជីវិត ស្ពែម៉ាតូហ្ស៊ូអ៊ីត ត្រូវតែធ្វើឡើងឥតគិតថ្លៃ និងដោយគ្មានអត្តសញ្ញាណ។
ហើយអ្វីដែលកាន់តែច្បាស់លាស់ និងតឹងតែងក្នុងច្បាប់បារាំង ស្ត្រីម្នាក់មិនអាចទទួលអំណោយមេជីវិតពីរផ្ទួនគ្នា (ពីសប្បុរសជនអ្នកផ្តល់អំណោយមិនបញ្ចេញអត្តសញ្ញាណបានឡើយ) ទោះក្នុងវិធីសាស្ត្របង្កកំណើតដោយជំនួយវេជ្ជសាស្ត្រណាក៏ដោយ។ ហេតុអ្វី ? ព្រោះនៅពេលនិយាយអំពីការបង្កកំណើតដោយជំនួយវេជ្ជសាស្ត្រ គេចៀសមិនផុតត្រូវគិតដល់ស៊ីឈ្នួលពរពោះបានឡើយ។ ជំនួយវេជ្ជសាស្ត្រនៃការបង្កកំណើត ជាវិធីសាស្ត្រជួយគូស្វាមី និងស្ត្រី ដែលមានបំណងក្លាយជាម្តាយ ឱ្យមានកូន ដោយពរពោះដោយខ្លួនឯង។ ពឹងអ្នកដទៃឱ្យពរពោះជំនួស ជាការស៊ីឈ្នួលពរពោះ ជាជំនួញ ជាអំពើហិង្សាច្បាប់ និងសេដ្ឋកិច្ច ! នៅប្រទេសបារាំង ការពរពោះឱ្យអ្នកដទៃ ត្រូវបានហាមឃាត់ទាំងស្រុង ហើយគណៈកម្មការពិគ្រោះជាតិពន្ធុបារាំង ប្រឆាំងដាច់ខាតនឹងការបង្កកំណើតដោយជំនួយលើពោះអ្នកទីបី។ ហេតុដូច្នេះហើយបានជាបារាំងរក្សាជំហរជាក់លាក់ ដាក់បម្រាមមិនឱ្យស្ត្រីទទួលអំណោយមេជីវិតពីរ ក្នុងពេលតែមួយ ព្រោះវាអាចធ្វើឱ្យស្ត្រីក្លាយទៅជាឧបករណ៍ផលិតកូន ក្រោមលេសប្រើជំនួយវេជ្ជសាស្ត្រដើម្បីបង្កកំណើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ