ហេតុអ្វីមានការរិះគន់ការថ្លែងសុន្ទរកថារបស់ប្រធានាធិបតីបារាំង នៅចំពោះមុខសភាពេញអង្គ ?!
ចុះផ្សាយនៅថ្ងៃ៖
ស្តាប់ - ០៤:០៥
ប្រធានាធិបតីបារាំង លោក អេម៉ាណុយអែល ម៉ាក្រុង សកម្មណាស់លើឆាកអន្តរជាតិ ប៉ុន្តែនៅក្នុងប្រទេសវិញ គេស្ទើរតែមិនបានឮប្រសាសន៍លោកសោះ តាំងពីឡើងកាន់តំណែងមក ! ទើបតែនៅថ្ងៃចន្ទនេះទេ ដែលលោកប្រធានាធិបតីបានថ្លែងសុន្ទរកថានៅចំពោះមុខសភាពេញអង្គតែម្តង ដើម្បីបង្ហាញអំពីគោលនយោបាយរួម ក្នុងអាណត្តិ៥ឆ្នាំរបស់លោក។ សុន្ទរកថាប្រធានាធិបតីបែបនេះ ពុំធ្លាប់មានប្រមុខដឹកនាំមុនៗរូបណាធ្លាប់ធ្វើឡើយ។ ហេតុអ្វីបានជាដូច្នេះ ?! លោកម៉ាក្រុងធ្វើខុសទម្លាប់ ? ឬក៏ប្រធានាធិបតីបារាំងមុនៗ គ្មានទំនាក់ទំនងជាមួយសភា ឬយ៉ាងណា ?
និយាយកាន់តែតិចកាន់តែល្អ ! របស់កម្រទើបមានតម្លៃ ! លោកប្រធានាធិបតីបារាំងថ្មី លោក អេម៉ានុយអែលម៉ាក្រុង បានប្រកាន់យកទស្សនៈនេះ និងបានធ្វើឱ្យខុសប្លែកពីប្រធានាធិបតីបារាំងពីររូបមុន ដែលនិយាយស្តីញឹកញយជ្រុល។ តាំងពីចូលកាន់តំណែងមក លោក ម៉ាក្រុង ទើបបានថ្លែងសុន្ទរកថានៅចំពោះមុខសភាពេញអង្គ នៅថ្ងៃទី ៣កក្កដានេះ ជាលើកទីមួយ និងជាលើកចុងក្រោយ ប្រសិនបើគ្មានព្រឹត្តិការណ៍ធ្ងន់ធ្ងរអ្វីឡើងទេក្នុងអាណត្តិនេះ។ លោក ម៉ាក្រុង ក៏បានសម្រេចផ្តាច់ទម្លាប់ជាប្រពៃណី ជាង៤០ឆ្នាំ មិនផ្តល់បទសម្ភាសន៍តាមកញ្ចក់ទូរទស្សន៍ទៀតទេ ក្នុងថ្ងៃបុណ្យជាតិ។
អញ្ចឹងហើយបានជាសុន្ទរកថាថ្ងៃនេះ ក្លាយជាព្រឹត្តិការណ៍។ ម្យ៉ាងវិញទៀត នេះជាលើកទីបីប៉ុណ្ណោះ ក្នុងរបបសាធារណរដ្ឋបារាំង ដែលប្រធានាធិបតីថ្លែងទៅកាន់សភាពេញអង្គ (សភានិងព្រឹទ្ធសភា) យ៉ាងដូច្នេះ ៖ ទីមួយគឺលោកប្រធានាធិបតីនីកូឡា សាកូហ្ស៊ី នៅឆ្នាំ២០០៩ ដើម្បីប្រកាសចាត់វិធានការជាតិក្រោយមានវិបត្តិហិរញ្ញវត្ថុ និងទីពីរគឺដោយលោកប្រធានាធិបតីហ្វ្រង់ស័រ ហូឡង់ នៅថ្ងៃទី ១៦វិច្ឆិកា ២០១៥ ដើម្បីប្រកាសវិធានការប្រយុទ្ធប្រឆាំងនឹងភេរវនិយម បីថ្ងៃក្រោយភេរវកម្មនៅប៉ារីស។
ថ្មីនិងរងការរិះគន់
តែជាលើកទីមួយបង្អស់ក្នុងប្រវត្តិសាស្ត្របារាំង ដែលប្រធានាធិបតីទើបជាប់ឆ្នោតថ្មី ថ្លែងសុន្ទរកថាទៅកាន់សភាពេញអង្គ ក្នុងទម្រង់ជាសុន្ទរកថាទៅកាន់ប្រជាជាតិ តាំងពីដើមអាណត្តិតែម្តងយ៉ាងដូច្នេះ ! ទង្វើបែបនេះបានទទួលការរិះគន់ច្រើន ពីសំណាក់បក្សប្រឆាំង ដោយពួកគេយល់ថា ប្រធានាធិបតីចង់បង្ហាញអំណាច ចង់ប្រើឥទ្ធិពលជាប្រធានាធិបតី និងបន្តុះបង្អាប់តួនាទីនាយករដ្ឋមន្ត្រី ដែលលោកក៏ត្រូវទៅលម្អិតគោលនយោបាយរដ្ឋាភិបាលនៅចំពោះមុខសភានៅថ្ងៃអង្គារ ទី៤ កក្កដា អមដោយការតស៊ូមតិនិងការបោះឆ្នោតផ្តល់ទំនុកចិត្តនៅសភានិងព្រឹទ្ធសភា។
សូមបញ្ជាក់ថា មុនការកែប្រែរដ្ឋធម្មនុញ្ញឆ្នាំ២០០៨ដោយលោកនីកូឡាសាកូហ្ស៊ី ប្រធានាធិបតីបារាំងគ្មានសិទ្ធិថ្លែងទៅកាន់សភាផ្ទាល់ទេ។ រដ្ឋធម្មនុញ្ញបារាំង បានកំរិតអំណាចប្រធានាធិបតីបែបនេះ តាំងពីឆ្នាំ១៨៧៣មក។ នៅឆ្នាំ១៩៥៨ ពេលបារាំងបានប្រកាន់យករបបសាធារណរដ្ឋទី៥ រដ្ឋធម្មនុញ្ញនៅតែរក្សាបម្រាមមិនឱ្យប្រធានាធិបតីថ្លែងផ្ទាល់ទៅកាន់សភាដដែល។ ប្រធានាធិបតីអាចទាក់ទងទៅសភា តាមរយៈរដ្ឋមន្ត្រី និងតាមរយៈសារ ដែលគ្មានការតស៊ូមតិអ្វីទាំងអស់។
តាំងពីលោក De Gaulle មកដល់លោក Chirac ប្រធានាធិបតីបារាំង នៅពេលចូលកាន់តំណែងភ្លាម បានពីរឬបីថ្ងៃ ឬយ៉ាងយូរមួយអាទិត្យ សុទ្ធតែបាន សរសេរលិខិតបង្ហាញផែនការដឹកនាំប្រទេស ផ្ញើជាសារកាន់សភា និងអានដោយឥស្សរជនណាម្នាក់ជូនអង្គសភា និងអង្គព្រឹទ្ធសភា ដែលត្រូវងើបឈរទាំងអស់គ្នាស្តាប់។ បន្ទាប់មក នាយករដ្ឋមន្ត្រីត្រូវធ្វើសេចក្តីប្រកាសនយោបាយទូទៅរបស់រដ្ឋាភិបាល បន្តដោយការតស៊ូមតិ និងការបោះឆ្នោតអនុម័ត ក្នុងថ្ងៃតែមួយ ឬនៅថ្ងៃបន្ទាប់។
សារប្រធានាធិបតី
សារប្រធានាធិបតីជូនទៅកាន់សភានិងព្រឹទ្ធសភាបានក្លាយប្រពៃណីនេះ ដែលប្រធានាធិបតីបារាំងគ្រប់រូប បានគោរព ដោយមានការកែសម្រួលបន្តិចបន្តួច។ ប៉ុន្តែនៅឆ្នាំ២០០៨ លោក នីកូឡា សាកូហ្ស៊ី បានផ្តាច់ទម្លាប់នេះមុនគេ ដោយមិនសរសេរសារទៅសភា នៅពេលជាប់ឆ្នោតភ្លាមទេ។ លោក ហ្វ្រង់ស័រ ហូឡង់ ដែលតាំងខ្លួនជាប្រធានាធិបតីធម្មតា ក៏លែងធ្វើសារនោះដែរ។ ដូច្នេះ តាមពិតទៅគឺលោក អេម៉ាណុយអែល ម៉ាក្រុង ជាអ្នកវិលមកប្រកាន់ទម្លាប់ជាប្រពៃណីនៃរបបសាធារណរដ្ឋ។
របបសាធារណរដ្ឋ ដែលចង់បានដោយថ្នាក់ដឹកនាំមុនៗ តម្រូវឱ្យប្រមុខរដ្ឋថ្លែងជាមុនទៅកាន់តំណាងរាស្រ្តនូវ បន្ទាត់ និងទិសដៅនយោបាយ ដែលប្រធានាធិបតីចង់បាន និងចង់ឱ្យរដ្ឋាភិបាលប្រតិបត្តិ។ បន្ទាប់មកទើបនាយករដ្ឋមន្ត្រី ឡើងលម្អិតសេចក្តីថ្លែងការណ៍នយោបាយទូទៅ ដែលរដ្ឋាភិបាលយល់និងត្រូវអនុវត្ត។ នេះបើតាមមាត្រ២០នៃច្បាប់ធម្មនុញ្ញបារាំង។ គ្រាន់តែថា ទម្រង់នៃថ្លែងរបស់លោកប្រធានាធិបតីម៉ាក្រុង មានលក្ខណៈឧឡាឫកខ្លាំង ជាសភាពេញអង្គ (សភានិងព្រឹទ្ធសភា) នៅក្នុងរាជរាំងវែកសៃត៍ដែលជាចំណាយធំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ