បារាំងបើកប្រតិបត្តិការជម្លៀសអន្តោប្រវេសន៍ជាថ្មីចេញពីភាគខាងជើងក្រុងប៉ារីស
ស្ថានភាពនៅភាគខាងជើងរដ្ឋធានីប៉ារីស កាន់តែដុនដាបខ្លាំងឡើងៗ ជំរំរខេករខាករីកធំឡើងៗ មិនអាចបណ្តោយបានទៀត ! នៅព្រហាម ថ្ងៃសុក្រទី ៧ កក្កដានេះ អាជ្ញាធរបារាំងបានបើកប្រតិបត្តិការជម្លៀសឈូសចេញ។ អន្តោប្រវេសន៍ ប្រមាណយ៉ាងហោចណាស់២ពាន់នាក់ ត្រូវបានចាប់បញ្ជូនទៅកាន់ទីស្នាក់បណ្តោះអាសន្ន ក្នុងតំបន់ជិតទីក្រុង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ក្រៅអំពីការភ័យព្រួយបន្តិចបន្តួច ខ្លាចបែកខ្ញែកក្រុមគ្រួសារ ស្ថានភាពទូទៅនៃការជម្លៀសបានប្រព្រឹត្តទៅដោយស្ងប់ស្ងាត់ល្អទេ។ ដោយប្រើកងកម្លាំងរក្សាសណ្តាប់ធ្នាប់ប្រមាណជិត ៣៥០នាក់ អាជ្ញាធរបានផ្តើមប្រតិបត្តិការ ដោយការរាប់ចំនួនអន្តោប្រវេសន៍ មុននឹងបញ្ជូនឡើងឡានក្រុងចាកចេញពីទីក្រុង។ ពួកគេនឹងត្រូវទទួលឱ្យស្នាក់នៅបណ្តោះអាសន្ន នៅតាមមជ្ឈមណ្ឌល ឬសាលកីឡា នៃឃុំស្រុកផ្សេងក្នុងតំបន់ជិតរដ្ឋធានី។
នេះគឺជាលើកទី៣៤ហើយ គិតចាប់តាំងពីឆ្នាំ២០១៥មក ដែលអាជ្ញាធរបារាំង បានធ្វើការជម្លៀសអន្តោប្រវេសន៍ដែលនាំគ្នាមកបោះតង់ ក្រោមស្ពាន ក្រោមផ្លូវក្រវ៉ាត់ក្រុងនៅភាគខាងជើងក្រុងប៉ារីស។ ជំរំរខេករខាក គ្មានអនាម័យ គ្មានសុវត្ថិភាពដ៏គួរឱ្យខ្មាសអៀនបំផុតសម្រាប់ប្រទេសបារាំងនេះ ដុះដាលរីកធំឡើងជារៀងរាល់ថ្ងៃ ដោយមានអន្តោប្រវេសន៍មកថ្មីបន្ថែមប្រមាណ២០០នាក់ ក្នុងមួយសប្តាហ៍ៗ ក្បែរមជ្ឈមណ្ឌលមនុស្សធម៌។ កាលពីខែវិច្ឆិកា២០១៦ ប៉ារីសបានបើកមជ្ឈមណ្ឌលមនុស្សធម៌មួយ ទទួលអន្តោប្រវេសន៍ ដើម្បីបញ្ចៀសភាពអនាធិបតេយ្យនេះ ប៉ុន្តែមិនគ្រប់គ្រាន់ !
តាំងពីបានគាស់រំលើងរំលាយជំរំអន្តោប្រវេសន៍នៅកាឡេ ភាគខាងជើងប្រទេសមក ប៉ារីស បានក្លាយជាទីស្នាក់ដ៏ធំរបស់ជនអន្តោប្រវេសន៍ ដែលមកសំកុករង់ចាំសុំសិទ្ធិជ្រកកោន។
ក្រសួងមហាផ្ទៃបារាំង នឹងបង្ហាញវិធានការថ្មីស្តីពីការសុំសិទ្ធិជ្រកកោន និងវិធានការទប់សា្កត់ចរន្តអន្តោប្រវេសន៍ខុសច្បាប់មិនប្រាកដប្រជានេះ នៅពីរថ្ងៃទៀតខាងមុខ។ ចំណែកសាលាក្រុងប៉ារីស ក៏បានរៀបចំគម្រោងច្បាប់មួយស្នើទៅដែរ ទាក់ទងនឹងការទទួលជនអន្តោប្រវេសន៍ និងការសម្របខ្លួនរបស់ជនភៀសខ្លួនក្នុងសហគមន៍បារាំង។ ប៉ារិស ចង់ឱ្យរដ្ឋាភិបាលចាត់ចែង ចែកអន្តោប្រវេសន៍ជាបណ្តើរ និងទូទាំងប្រទេស តាមដំណើរផ្លូវដែលអន្តោប្រវេសន៍នោះឆ្លងកាត់ ឱ្យហើយ ដោយមិនរង់ចាំឱ្យតែពួកគេធ្វើដំណើរមកដល់រដ្ឋធានី ផ្តុំគ្នាអាក្រក់មើលខ្លាំង ទើបចែកចាយគ្នាទទួលបន្ទុកជាក្រោយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ