ប្រមុខការទូតប្រទេសបស្ចឹមលោកបន្តគ្នាទៅតំបន់ឈូងសមុទ្ទពែក្ស
ប្រមុខការទូតអាល្លឺម៉ង់ និងអង់គ្លេស បានចុះទៅតំបន់ឈូងសមុទ្ទនេះ កាលពីពីរសប្តាហ៍មុន។ ចំណែកប្រមុខការទូតអាមេរិកវិញ កំពុងស្ថិតនៅក្នុងប្រទេសកាតាតែម្តង តាំងពីថ្ងៃអង្គារមក។ ហើយបន្ទាប់ពីអាមេរិក ប្រមុខការទូតបារាំងក៏នឹងអញ្ជើញទៅបំពេញទស្សនកិច្ចមួយជុំដែរ នៅតំបន់ឈូងសមុទ្ទពែក្ស។ កម្មវត្ថុមានតែមួយដូចគ្នា គឺស្វែងរកមធ្យោបាយបន្ធូរបន្ថយសម្ពាធតានតឹងឱ្យបានកាន់ឆាប់រវាងកាតា និងអារ៉ាប៊ីសាអូឌីត ព្រមទាំងសម្ព័ន្ធជិតខាងផ្សេងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ចាប់ពីថ្ងៃសៅរ៍ ដល់ថ្ងៃអាទិត្យខាងមុខ ដល់វេនប្រមុខការទូតបារាំងម្តងដែលត្រូវអញ្ជើញទៅកាតា អារ៉ាប៊ីសាអូឌីត ព្រមទាំងកូវ៉ែតជាអន្តរការី។ នេះបើតាមការជូនដំណឹងរបស់អ្នកនាំពាក្យក្រសួងការបរទេសបារាំង ដោយបានគូសបញ្ជាក់ថា បារាំងព្រួយបារម្ភខ្លាំងណាស់នឹងវិបត្តិតានតឹងនៅតំបន់ ព្រោះសុទ្ធតែជាប្រទេសដែលមានទំនាក់ទំនងសកម្មនិងមេត្រីភាពជាមួយប៉ារីស។ ដូច្នេះការបន្ធូរបន្ថយសម្ពាធជាប្រយោជន៍សម្រាប់គ្រប់គ្នា។
សូមបញ្ជាក់ថា បារាំងមានទំនាក់ទំនងពាណិជ្ជកម្មធំសំខាន់ណាស់ ជាមួយអារ៉ាប៊ីសាអូឌីត និងកាតា ដែលកំពុងបញ្ចេញធ្មុងដាក់គ្នា។ កិច្ចព្រមព្រៀងពាណិជ្ជកម្មចុងក្រោយ គឺការចុះកិច្ចព្រមព្រៀងជាផ្លូវការរវាងក្រុមហ៊ុនប្រេងរដ្ឋកាតា និងក្រុមហ៊ុនតូតាល់បារាំង ធ្វើជាដៃគូគ្នារយៈពេល២៥ឆ្នាំ ក្នុងការអភិវឌ្ឍន៍អណ្តូងប្រេងOffshore នៅ Al –Chahine។
នៅក្នុងដំណើរទស្សនកិច្ចរបស់លោក Jean Yves La Drian ពីរថ្ងៃទៀតនេះ លោកប្រមុខការទូតបារាំង នឹងទៅដាស់តឿនរំលឹកសមភាគីអំពីផលវិបាកអវិជ្ជមាននៃវិបត្តិ ចំពោះវិស័យការទូត នយោបាយ និងសន្តិសុខ។ ហើយក៏ជាឱកាសដែលបារាំងត្រូវបញ្ជាក់ជាថ្មីអំពីការពង្រឹងអាទិភាពរបស់បារាំងក្នុងការប្រយុទ្ធប្រឆាំងនឹងភេរវនិយម។
វិបត្តិរវាងកាតានិងអារ៉ាប៊ីសាអូឌីត ជាមួយអេមីរ៉ាតអារ៉ាប់ បារ៉ែន និងអេហ្ស៊ីប បានផ្ទុះឡើងកាលពីដើមខែមិថុនា ដល់ថ្នាក់ផ្តាច់ទូតនិងបិទព្រំដែន ដាក់ឱ្យដូហានៅឯកា ក៏ព្រោះសម្ព័ន្ធមិត្តទាំងបួនយល់ថា កាតាគាំទ្រពួកភេរវនិយមនិងមានទំនាក់ទំនងស្អិតជ្រុលជាមួយអ៊ីរ៉ង់។ កាលពីថ្ងៃអង្គារ ប្រមុខការទូតអាមេរិកបានទទួលការព្រមព្រៀងពីកាតាលើកម្មវិធីប្រយុទ្ធប្រឆាំងនឹងការផ្តល់ហិរញ្ញវត្ថុដល់ពួកភេរវនិយម។ ប៉ុន្តែក្រុមសម្ព័ន្ធមិត្តអារ៉ាប៊ីសាអូឌីត យល់ថាមិនគ្រប់គ្រាន់ទេ ! ពួកគេត្រូវការឱ្យកាតាគោរពតាមសំណើ១៣ចំណុចរបស់គេ រាប់ទាំងការបិទទូរទស្សន៍Al-Jazeeraផងនិងមូលដ្ឋានទ័ពតួកគីនៅកាតាផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ