Global Witness៖មានស្លាប់សកម្មជនការពារបរិស្ថានយ៉ាងតិច ២០០នាក់ក្នុងឆ្នាំ ២០១៦
នៅថ្ងៃព្រហស្បតិ៍ ទី១៣ កក្កដា អង្គការក្រៅរដ្ឋាភិបាល Global Winess បានផ្សព្វផ្សាយរបាយការណ៍មួយស្តីពីស្ថានភាពអ្នកការពារបរិស្ថានក្នុងលោកនាឆ្នាំ ២០១៦។ របាយការណ៍បានប្រាប់ឲ្យដឹងពីកំណើនមនុស្សស្លាប់នៅក្នុងបុព្វហេតុបរិស្ថាន និងកំណើនចំនួនប្រទេសដែលមានស្លាប់សកម្មជនការពារបរិស្ថាន។ តាមរបាយការណ៍ មានស្លាប់អ្នកការពារបរិស្ថានយ៉ាងតិច ២០០នាក់នៅទូទាំងពិភពលោកក្នុងឆ្នាំ ២០១៦ ពោលមានការកើនឡើងចំនួន ១៥នាក់ធៀបនឹងឆ្នាំ ២០១៥។ Global Witness បានទម្លាក់កំហុសដាក់ក្រុមអ្នកវិនិយោគរដ្ឋ និងឯកជន។
ចុះផ្សាយនៅថ្ងៃ៖
ស្តាប់ - ០២:០៩
ពីទ្វីបអាមេរិកឡាទីនឆ្លងចូលទ្វីបអាស៊ី និងទ្វីបអាហ្រ្វិក កំណើននៃការតស៊ូដើម្បីការពារបរិស្ថានមានការកើនឡើងពីមួយឆ្នាំទៅមួយឆ្នាំ និងចំនួនសកម្មជនស្លាប់ដោយបុព្វហេតុបរិស្ថានក៏មានការកើនឡើងដែរ នេះបើតាមរបាយការណ៍របស់ Global Witness។ គ្រាន់តែក្នុងឆ្នាំ ២០១៦ មានស្លាប់សកម្មជនបរិស្ថានយ៉ាងតិច ២០០នាក់ ពោលលើសឆ្នាំ ២០១៥ ចំនួន ១៥នាក់ ហើយចំនួនប្រទេសដែលមានស្លាប់អ្នកការពារបរិស្ថានបានកើនពី ១៦ប្រទេសក្នុងឆ្នាំ ២០១៥ ទៅ ២៤ប្រទេសក្នុងឆ្នាំ ២០១៦។ តែ Global Witness បានទទួលស្គាល់ថា តួលេខពិតប្រាកដអាចមានច្រើនជាងនេះ ដោយសារតែមានទង្វើឃាតកម្មខ្លះមិនត្រូវបានបែកធ្លាយជាសាធារណៈទេ។
តាម Global Witness ជនរងគ្រោះភាគច្រើន ជាអ្នកដែលបានចេញមុខការពារការរឹបអូសដីធ្លីរបស់ប្រជាជន ការកាប់បំផ្លាញព្រៃឈើ និងការចាក់ដីលុបស្ទឹងបឹងបួរជាដើម។ នៅត្រង់ចំណុចនេះ Global Witness បានទម្លាក់កំហុសត្រង់ដាក់ក្រុមអ្នកវិនិយោគរដ្ឋ និងឯកជនដែលបិទភ្នែក ធ្វើគ ធ្វើថ្លង់នៅពេលដែលដឹងថា ដីធ្លី ឬព្រែឈើដែលពួកគេទទួលបានការអភិវឌ្ឍន៍ពីរដ្ឋអំណាចនោះត្រូវបានរឹបអូសពីប្រជាជនដោយគ្មានការចរចា ឬពិគ្រោះយោបល់ជាមួយម្ចាស់ពាក់ព័ន្ធជាមុនទេ។ អាមេរិកឡាទីនជាទ្វីបដែលមានឃាតកម្មសម្លាប់សកម្មជនបរិស្ថានច្រើនជាងគេ ហើយប្រទេសនាំមុខគេ គឺប្រេស៊ីលមានស្លាប់ ៤៩នាក់ និង ៣៧នាក់នៅកូឡុំប៊ី។
នៅអាស៊ី ប្រទេសនាំមុខគេ គឺហ្វីលីពីនដែលមានស្លាប់ ២៨នាក់ នៅឥណ្ឌាស្លាប់ ១៦នាក់ និងស្លាប់ ៧នាក់នៅក្នុងប្រទេសបង់ក្លាដែស។ នៅទ្វីបអាហ្រ្វិក ស្ថានការណ៍បានកើតមានធ្ងន់ធ្ងរជាងគេនៅសាធារណរដ្ឋប្រជាធិបតេយ្យកុងហ្គោ នៅអាហ្រ្វិកខាងត្បូង នៅកាមេរូន នៅតង់សានី នៅអ៊ូហ្កង់ដា និងនៅស៊ីមបាវ៉េ។ នៅសហរដ្ឋអាមេរិក Global Witness បារម្ភពីកំណើនបទឧក្រិដ្ឋទាក់ទងនឹងសកម្មភាពការពារបរិស្ថាន ពិសេសវិធានការកម្រិតបាតុកម្មនៅក្នុង១៨រដ្ឋ តាំងពីលោកដូណាល់ ត្រាំឡើងកាន់តំណែងប្រធានាធិបតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ