ពួកឧទ្ទាមរុស្ស៊ីនិយម គ្រោងបង្កើតរដ្ឋថ្មី ជំនួស រដ្ឋអ៊ុយក្រែនសព្វថ្ងៃ
អាជ្ញាធរពួកបះបោរផ្តាច់ទឹកដីនិយម នៅប៉ែកខាងកើតអ៊ុយក្រែនដែលប្រឆាំងនឹងអំណាច នៅក្រុងគៀវ បានប្រកាសថ្ងៃអង្គារម្សិលមិញ ថាគ្រោងបង្កើតជារដ្ឋថ្មីទុកសម្រាប់ជំនួស រដ្ឋអ៊ុយក្រែនបច្ចុប្បន្ន ហើយប្រទេសថ្មីនេះ នឹងមានរដ្ឋធានី ស្ថិតក្នុងតំបន់ដែលស្ថិតនៅក្រោមការត្រួតត្រារបស់គេ។ ចំណែកក្រុង គៀវ ប្រតិកម្មដោយចំអកឲ្យថា រឿងដែលមានគ្រាន់តែជា”ឈុតល្ខោនផ្សារណាត់នៃពួកអាយ៉ងក្រេមឡាំង”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ស្របនឹងគម្រោងបង្ហាញដោយពួកឧទ្ទាមរុស្ស៊ីនិយម ប្រទេសថ្មីនេះដែលគ្មានភ័ព្វសំណាងនឹង ឃើញថ្ងៃឡើយ នឹងត្រូវបង្កើតឡើង តាមផ្លូវប្រជាមតិពេញលើដែនដីអ៊ុយក្រែន ហើយត្រូវប្រសិទ្ធិនាម ថា Malorossia ឫ រុស្ស៊ីតូច ពាក្យប្រើជំនាន់ស្តេច Tsar ដើម្បីសម្គាល់ទឹកដីអ៊ុយក្រែនបច្ចុប្បន្ន។
ប្រទេសថ្មីនឹងរួមក្តោបអ៊ុយក្រែនសព្វថ្ងៃ លើកលែងតែទៀបកោះគ្រីមេ ដែលបានភ្ជាប់ខ្លួនទៅហើយ ទៅនឹង រុស្ស៊ី កាលពី ខែមិនាឆ្នាំ២០១៤ ហើយរដ្ឋធានីវា គឺក្រុង Donetsk តែម្តង ដែលជាកំពែងការពារមួយសែនមាំ របស់ពួកផ្តាច់ទឹកដីនិយម ចំណែកក្រុងគៀវ នឹងមានលក្ខន្តិកៈ ជា “មជ្ឈមណ្ឌលប្រវត្តិសាស្ត្រនិងវប្បធម៌ “។
រដ្ឋធម្មនុញ្ញនៃរដ្ឋអនាគត ត្រូវបានបង្ហាញថ្ងៃអង្គារ១៨កក្កដា ដោយមេដឹកនាំ សាធារណរដ្ឋបះបោរស្វ័យ ប្រកាសដូណេត DNR លោក Alexandre Zakhartchenko ។ ចេញផ្សាយដោយទីភ្នាក់ងារពត៏មាន ពួក ផ្តាច់ទឹកដី រដ្ឋធម្មនុញ្ញនេះបញ្ជាក់ថា ពួកអ្នកតំណាងនៃ សាធារណរដ្ឋស្វ័យប្រកាសដូណេត និង លូហ្កាន់ ព្រមទាំងបណ្តាតំណាងនៃខេត្តចំនួន ១៩ ពីក្នុងចំណោមខេត្តទាំង២៥ របស់អ៊ុយក្រែន បាន ព្រមព្រៀងគ្នា ដើម្បី” ប្រកាសបង្កើតរដ្ឋថ្មី ដែលនឹងបន្តកេរ្ត៏ ពី អ៊ុយក្រែនសព្វថ្ងៃ “។
ប៉ុន្តែ ការប្រកាសយ៉ាងទាន់ហន់ អំពីគម្រោងបង្កើតរដ្ឋថ្មីនេះ បានញ៉ាំងមេដឹកនាំ សាធារណរដ្ឋបះបោរស្វ័យ ប្រកាសលូហ្កាន់ LNR គឺ លោក Igor Plotnitski ឲ្យគាត់អាក់អន់ចិត្ត មកពីគេ មិនសួរយោបល់គាត់ឯណា។
ជាប្រតិកម្មភ្លាមភ្លែត លោករដ្ឋមន្ត្រីការបរទេសអ៊ុយក្រែន Pavlo Klimkine លើទំព័រ Twitter ខ្លួន បានហៅ រឿងដែលមាន ដោយចំអកបញ្ឈឺចិត្តថា គ្រាន់តែជា” ឈុតល្ខោនផ្សារណាត់នៃពួកអាយ៉ងក្រេមឡាំង”។
ពាក្យថា Malorossia ធ្វើឲ្យនឹកឃើញពាក្យថា Novorossia ឫ រុស្ស៊ីថ្មី ប្រើដោយវិមានក្រេមឡាំង នា ប៉ុន្មានខែដំបូងនៃ សង្គ្រាមនៅតំបន់ខាងកើតអ៊ុយក្រែន សម្រាប់សម្គាល់ខេត្តបះបោររុស្ស៊ីនិយម នៅប៉ែក ខាងកើត និង ខាងត្បូងប្រទេសនេះ។
ក្នុងភ្លើងជម្លោះជាង៣ឆ្នាំកន្លងទៅ រវាង ពួកផ្តាច់ទឹកដីរុស្ស៊ីនិយម និង កងទ័ពរដ្ឋាភិបាលអ៊ុយក្រែន មានមនុស្សធ្លាក់ខ្លួនស្លាប់ ជាង ១០.០០០នាក់ ទៅហើយ។
ក្រុងគៀវនិងបស្ចិមលោក ចោទរុស្ស៊ីថា ចេះតែគាំទ្រដោយផ្តល់លុយនិងអាវុធដល់ពួកឧទ្ទាមនៅទីនោះ ប៉ុន្តែ ម៉ូស្គូ រមែងបដិសេធច្រានចោល ការចោទប្រកាន់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ