បារាំងកំពុងរងគ្រោះភ្លើងឆេះព្រៃខ្លាំង នៅភាគខាងត្បូងប្រទេស
មានមនុស្សយ៉ាងហោចណាស់១ម៉ឺននាក់ ក្នុងនោះ ជាងបីពាន់អ្នកជាទេសចរបោះតង់ក្នុងព្រៃ ត្រូវជម្លៀសចេញទាំងកណ្តាលអាធ្រាត្រ យប់ថ្ងៃអង្គារឆ្លងចូលថ្ងៃពុធនេះ ដោយហេតុតែមានគ្រោះភ្លើងឆេះព្រៃ នៅភាគខាងត្បូងប្រទេសបារាំង។ តំបន់ភាគខាងត្បូងដែលជាកន្លែងទេសចរណ៍ដ៏ពេញនិយម និងដែលទើបរងគ្រោះអគ្គីភ័យឆេះព្រៃអស់ជាង៥ពាន់ហិចតារ កាលពីមួយថ្ងៃមុននេះសោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
ក្រុមពន្លត់អគ្គិភ័យជាង៥រយនាក់ ឧទ្ធម្ភាគចក្រពន្លត់ភ្លើង៨៧គ្រឿង អាជ្ញាធរបារាំងបានប្រើគ្រប់មធ្យោបាយតាមផ្លូវអាកាស តាំងពីម៉ោង៧ព្រឹក និងបានស្នើសុំជំនួយយន្តហោះពន្លត់ភ្លើងអឺរ៉ុបពីរគ្រឿងមកបន្ថែមទៀត ដើម្បីយកឈ្នះព្រះអគ្គី ដែលកំពុងឆេះលេបត្របាក់ព្រៃអស់ប្រមាណជាង៨រយហិចតារ ក្នុងរយៈពេលតែប៉ុន្មានម៉ោង។ អណ្តាតភ្លើង និងកម្លាំងឆេះរាលរឹតតែមានសន្ធឹកលឿនខ្លាំង ដោយសារមានជំនួយខ្យល់បកបោកខ្លាំង ពី៦០ទៅ៧០គីឡូម៉ែត្រក្នុងមួយម៉ោង។
ជាសំណាងល្អ គ្មានជនរងគ្រោះដល់បាត់ជីវិតទេ មានតែកងកម្លាំងពន្លត់ភ្លើង និងក្រុមសង្គ្រោះជាងម្ភៃរូប។ ប្រជាពលរដ្ឋជាងមួយម៉ឺននាក់បានត្រូវជម្លៀសចេញទៅរកកន្លែងមានសុវត្ថិភាព។ បើតាមរូបភាពបង្ហោះតាមប្រព័ន្ធសង្គម មានពលរដ្ឋបានយកឆ្នេរធ្វើជាជម្រកសម្រាក។ ដំណើរកំសាន្តសម្រាកវិស្សមកាល បានក្លាយជាដំណើររត់ប្រាសតែអាយុ។ ផ្លូវថ្នល់ ត្រូវបិទ តាំងពីយប់មិញមក ជាកិច្ចការពារ ព្រោះដំណាក់កាលនេះជារយៈកាលវិស្សមកាល ចំនួនអ្នកធ្វើដំណើរទៅកាន់ និងស្នាក់នៅសម្រាកកំសាន្តនៅភាគខាងត្បូង បានកើនឡើងមួយជាបី។
ភាគខាងត្បូងបារាំងត្រូវស្ថិតក្នុងស្ថានភាពប្រុងប្រយ័ត្នខ្ពស់រហូតដល់ថ្ងៃព្រហស្បតិ៍ស្អែក។ តាំងពីថ្ងៃចន្ទមក តំបន់នេះបានរងគ្រោះភ្លើងឆេះព្រៃធំៗពីរកន្លែងអស់ប្រមាណជាង៥ពាន់ហិចតារ។ ក្រុមពន្លត់អគ្គីភ័យទើបគ្រប់គ្រងស្ថានការណ៍បាន បន្ទាប់ប្រើកម្លាំងប្រយុទ្ធប្រឆាំងអស់ពីរថ្ងៃ ស្រាប់តែមានករណីឆេះព្រៃមួយកន្លែងនៅយប់មិញ។
ភាពរាំងស្ងួតខ្លាំងនិងយូរ នារយៈពេលប៉ុន្មានខែចុងក្រោយនេះ បូកផ្សំវត្តមានខ្សល់កួចបោចបក់កម្លាំងខ្លាំង បានរុញច្រានភាគខាងត្បូងប្រទេសបារាំង ឱ្យមានហានិភ័យខ្ពស់ងាយជួបគ្រោះភ្លើងឆេះភ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ