Los Angeles ដកខ្លួន ទុកឲ្យParis ធ្វើជាម្ចាស់ផ្ទះ រៀបចំកីឡាអូឡាំពិក ឆ្នាំ ២០២៤
ប៉ារីស រដ្ឋធានីរបស់បារាំងមានក្តីសង្ឃឹមថា នឹងអាចក្លាយជាម្ចាស់ផ្ទះរៀបចំកីឡាអូឡាំពិក ឆ្នាំ ២០២៤ បន្ទាប់ពី ទីក្រុងLos Angeles របស់អាមេរិក ដែលជាគូប្រកួតប្រជែងចុងក្រោយ និងតែមួយគត់របស់ប៉ារីស នៅថ្ងៃចន្ទម្សិលមិញ បានសម្រេចដកខ្លួន លែងរៀបចំកីឡាអូឡាំពិកឆ្នាំ ២០២៤ ប៉ុន្តែ សម្រាប់ឆ្នាំ ២០២៨វិញ។
ចុះផ្សាយនៅថ្ងៃ៖ កែប្រែថ្ងៃទី៖
នៅថ្ងៃចន្ទម្សិលមិញ នៅក្នុងសន្និសីទកាសែត នៅស្តាត Stubhub ចៅហ្វាយក្រុង លោកEric Garcetti បានប្រកាសថា ជាមួយនឹងកិច្ចព្រមព្រៀងជាមួយគណៈកម្មាធិការអូឡាំពិកអន្តរជាតិ ទីក្រុង Los Angeles នឹងទទួលរៀបចំកីឡាអូឡាំពិក នៅឆ្នាំ ២០២៨។ “ពួកយើងនៅទីនេះ ដើម្បីសរសេរប្រវត្តិសាស្រ្ត។ ខ្ញុំមានមោទនភាពនឹងប្រកាសថា កីឡាអូឡាំពិកនឹងត្រលប់មកអាមេរិក មកLos Angeles”។ ប្រធានាធិបតីអាមេរិក លោកដូណាល់ ត្រាំ បាននិយាយនៅក្នុងសេចក្តីថ្លែងការណ៍របស់សេតវិមានថា លោកជឿជាក់ថា កីឡារដូវក្តៅនឹងត្រលប់មកLos Angeles។
បន្ទាប់ពីការពិភាក្សា រកឃើញកិច្ចព្រមព្រៀងមួយជាមួយ ទីក្រុងប៉ារីស និងជាពិសេសជាមួយ គណៈកម្មាធិការអូឡាំពិកអន្តរជាតិផ្ទាល់ ទីក្រុង Los Angelesរបស់អាមេរិក បានដកខ្លួន មិនរៀបចំកីឡាអូឡាំពិកឆ្នាំ ២០២៤ ប៉ុន្តែ សុខចិត្តទៅរៀបចំនៅឆ្នាំ ២០២៨វិញ។ ដោយសុខចិត្ត រង់ចាំ៤ឆ្នាំ បន្ថែមទៀត ទៅធ្វើជាម្ចាស់ផ្ទះរៀបចំកីឡាអូឡាំពិក ឆ្នាំ ២០២៨ ទីក្រុង Los Angelesត្រូវបានសន្យាថា នឹងទទួលបានទឹកប្រាក់ជំនួយច្រើន ពីគណៈកម្មាធិការអូឡាំពិក ពី ១,៨ ពាន់ លានដុល្លារ ទៅ ២ពាន់លានដុល្លារ។
ទីក្រុងដែលរៀបចំកីឡាអូឡាំពិក នៅឆ្នាំ ២០២៤ បានទទួលកញ្ចប់ថវិកាពីគណៈកម្មាធិការ អូឡាំពិក ១,៥ពាន់លានដុល្លារ ប៉ុន្តែ បើគេរៀបចំកីឡាអូឡាំពិក នៅឆ្នាំ២០២៨ នោះប្រទេសម្ចាស់ផ្ទះនឹងទទួលបានទឹកប្រាក់ជំនួយពីគណៈកម្មាធិការ អូឡាំពិក ដល់ទៅ ១ពាន់ ៨រយលានដុល្លារ។ សម្រាប់ចៅហ្វាយក្រុងLos Angeles គេមិនអាចមើលរំលងទឹកប្រាក់ប៉ះប៉ូវ របស់គណៈកម្មាធិការអូឡាំពិកបានទេ។ ក្រុងនឹងយកទឹកប្រាក់បន្ថែមនេះ ទៅប្រើសម្រាប់ទ្រទ្រង់ កម្មវិធីកីឡារបស់យុវជនអាមេរិកាំង នៅLos Angeles។
Los Angeles រង់ចាំឲ្យអាមេរិក គ្មានលោកដូណាល់ ត្រាំ ក៏ប្រសើរម្យ៉ាងដែរ…
ក្រុងLos Angeles គ្រោងចំណាយថវិកាប្រមាណ ៥ពាន់ ៣រយលានដុល្លារ សម្រាប់រៀបចំកីឡាអូឡាំពិក។ ដោយសារតែទីក្រុង មានហេដ្ឋារចនារួចស្រាប់ ដល់ទៅ ៩៥ភាគរយ ដោយមិនចាំបាច់ ត្រូវសង់ថ្មីបន្ថែម សម្រាប់រៀបចំកីឡាអូឡាំពិក អាជ្ញាធរក្រុង Los Angelesវាយតម្លៃថា គេនឹងមិនត្រូវការលុយរបស់រដ្ឋនោះទេ។ សម្រាប់ចៅហ្វាយក្រុង Los Angeles ការរៀបចំកីឡាអូឡាំពិកនឹងមិនធ្វើឲ្យប្រជាជនអាមេរិកចេញប្រាក់ ខាតបង់សូម្បីមួយសេន (លុយដែលត្រូវរៀបចំចំណាយលើការរៀបចំកីឡាអូឡាំពិកបានមកពីលុយជំនួយរបស់គណៈកម្មាធិការអូឡាំពិក មកពីការលក់សំបុត្រ ហើយនិងការផ្សព្វផ្សាយពាណិជ្ជកម្ម)។
លុយមិនមែនជាបញ្ហាសំខាន់ ដែលធ្វើឲ្យចៅហ្វាយក្រុង Los Angelesសុខចិត្តលះបង់សិទ្ធិ ទៅឲ្យក្រុងប៉ារីស ដើម្បីរៀបចំការប្រកួតកីឡាអូឡាំពិកនោះទេ។ បើនិយាយពីហេដ្ឋារចនាសម្ព័ន្ធ និងទឹកចិត្តចង់ធ្វើជាម្ចាស់ផ្ទះ រៀបចំកីឡាអូឡាំពិក រដូវក្តៅ ឆ្នាំ ២០២៤ គឺប៉ារីស និងទីក្រុង Los Angelesមាន មិនចាញ់គ្នានោះទេ។ ប៉ុន្តែ អ្វីដែលចោទជាបញ្ហាសម្រាប់ភាគីអាមេរិក គឺនយោបាយប្រឆាំង ជនអន្តោប្រវេសន៍របស់ប្រធានាធិបតី ដូណាល់ ត្រាំ ដែលខុស ផ្ទុយស្រឡះ ពីស្មារតីរបស់កីឡាអូឡាំពិក។
នៅពេលបោះឆ្នោត ជ្រើសរើសនៅខែកញ្ញា ខាងមុខ នៅប្រទេសប៉េរូ គណៈកម្មាធិការអូឡាំពិក នឹងពិចារណាខ្លាំងណាស់ទៅលើគ្រប់ទិដ្ឋភាព។ ឧបមារថា ទីក្រុង Los Angelesត្រូវគេជ្រើសរើសឲ្យធ្វើជាម្ចាស់ផ្ទះ រៀបចំកីឡាអូឡាំពិកឆ្នាំ ២០២៤ ប៉ុន្តែ បើលោកដូណាល់ ត្រាំ ឈ្នះឆ្នោតបន្ត ធ្វើជាប្រធានាធិបតី នៅឆ្នាំ ២០២០ នោះនយោបាយរបស់លោកដូណាល់ ត្រាំ ដែលហាមមិនឲ្យ អ្នកកាន់សាសនាអ៊ីស្លាម ចូលទឹកដី អាមេរិក នឹងបង្កភាពស្មុគស្មាញ ដល់ការរៀបចំកីឡាអូឡាំពិក ដែលតាមពិត ត្រូវស្វាគម កីឡាករមកពីគ្រប់ប្រទេស ដោយគ្មានប្រកាន់ពូជសាសន៍។ បើរៀបចំនៅឆ្នាំ ២០២៨ នឹងគ្មានឡើយ លោកដូណាល់ ត្រាំ។ ដូច្នេះ ក្រុង Los Angelesនឹងច្បាស់ក្នុងចិត្តតែម្តងថា នឹងគ្មានហេតុផលនយោបាយ មករារាំង ដំណើរការរៀបចំការប្រកួតកីឡាអូឡាំពិកនោះទេ។
ប៉ារីសឈ្នះដោយស្រួលដើម្បីធ្វើម្ចាស់ផ្ទះរៀបចំកីឡាអូឡាំពិក
ចៅហ្វាយក្រុងប៉ារីស លោកស្រី អាន អ៊ីលដាល់ហ្គោ បានអបអរដំណឹងនេះតាំងពីយប់ម្សិលមិញ។ ត្រេកអរ ព្រោះថា ប៉ារីស តាំងពីដើមមក បានធ្វើយុទ្ធនាការសម្បើមណាស់ ដើម្បីចង់ក្លាយជាម្ចាស់ផ្ទះរៀបចំការប្រកួតកីឡាអូឡាំពិក។ ខុសពីទីក្រុង Los Angeles ប៉ារីសមិនដែលមានចេតនាចង់ពន្យារពេលទៅរៀបចំ កីឡាអូឡាំពិកនៅឆ្នាំ ២០២៨នោះទេ។ គណៈកម្មាធិការអូឡាំពិកបារាំងធ្លាប់បានពន្លយឲ្យដឹងហើយថា ប៉ារីស ចង់ឲ្យខាងតែបានរៀបចំកីឡាអូពិក នៅឆ្នាំ ២០២៤ ដោយម្យ៉ាង ដើម្បីប្រារព្ធខួប ១០០ ឆ្នាំដែលកីឡាអូពិក បានត្រលប់មករៀបចំធ្វើនៅប៉ារីស និងដោយម្យ៉ាងទៀត អាជ្ញាធរមិនអាចធានាបានទេថា ដីធ្លី សម្រាប់រៀបចំ សាងសង់អគារ ទទួល កីឡាអូឡាំពិក នឹងអាចនៅទំនេរ រហូតដល់ឆ្នាំ ២០២៨នោះ។
ឥលូវនេះ ប៉ារីសបានសម្រេចបំណងប្រាថ្នា មែន បន្ទាប់ពីទីក្រុង Los Angelesដកខ្លួន ប៉ុន្តែ នៅមិនទាន់ផ្លូវការទេ។ ប៉ារីសនឹងអរមែនទែន នៅក្រោយគណៈកម្មាធិការអូឡាំពិក បោះឆ្នោតជាផ្លូវការ នៅខែកញ្ញាខាងមុខ។ ត្រូវដឹងថា បើទោះបីជា Los Angeles ដកខ្លួនមែន ធ្វើឲ្យប៉ារីស ជាបេក្ខជនតែមួយសម្រាប់ ទទួលកីឡាអូឡាំពិកឆ្នាំ ២០២៤ ប៉ុន្តែគេនៅតែត្រូវការការសម្រេចជាផ្លូវការពីគណៈកម្មាធិការអូឡាំពិកអន្តរជាតិដែរ។
ក្រៅតែពីប៉ារីស គ្មានអ្នកណាចង់ទទួលធ្វើជាម្ចាស់ផ្ទះ កីឡាអូឡាំពិក
រដ្ឋាភិបាលបារាំង សង្ឃឹមថា កីឡាអូឡាំពិកដ៏ ល្បីល្បាញក្នុងពិភពលោក នឹងអាចជួយយឹតយោងសេដ្ឋកិច្ចបារាំង ជាពិសេស ដើម្បីទាក់ទាញជនបរទេស ឲ្យត្រលប់មកទស្សនាបារាំង ឡើងវិញ។ សេដ្ឋកិច្ចបារាំង ដែលពឹងអាស្រ័យខ្លាំងលើចំណូលបានមកពីវិស័យទេសចរណ៍ បានរងប៉ះពាល់ ដោយសារតែការវាយប្រហារភេរវកម្ម នៅប៉ុន្មានឆ្នាំនេះ។
ដោយរៀបចំទទួលការប្រកួតកីឡាអូឡាំពិក នៅឆ្នាំ ២០២៤ រដ្ឋាភិបាលបារាំងចង់បង្ហាញថា ទីក្រុងប៉ារីស នៅតែមានសំរស់ស្រស់ស្អាត ក្នុងលោក និងមានសមត្ថភាព រក្សាសន្តិសុខ និងមានហេដ្ឋារចនាសម្ព័ន្ធគ្រប់គ្រាន់ ដើម្បី ស្វាគម ទទួលជនបរទេស ដែលមកទស្សនាប៉ារីស។ ទាក់ទាញជនបរទេសឲ្យមកទស្សនាក្រុងប៉ារីស គឺជាហេតុផលសំខាន់ ដែលធ្វើឲ្យរដ្ឋាភិបាលបារាំង និងប្រជាជនសម្រេចគាំទ្រ ចង់បានការរៀបចំកីឡាអូឡាំពិក នៅទីក្រុងប៉ារីស។ ម្យ៉ាងប៉ារីសបានសន្យាចំណាយទឹកប្រាក់ ប្រមាណ ៦ពាន់ ២រយលានដុល្លារតែប៉ុណ្ណោះ គឺ មិនឲ្យច្រើនជាងនេះទេ និងមិនធ្វើឲ្យរដ្ឋខាតបង់ថវិកាដូចប្រទេសដទៃនោះទេ។
ទីក្រុងHambourg របស់អាល្លឺម៉ង់ ទីក្រុងប៊ុយដាប៉ែសរបស់ហុងគ្រី ទីក្រុងរ៉ូម របស់អ៊ីតាលី និងបូស្តុនរបស់អាមេរិក បានដកខ្លួនជាបន្តបន្ទាប់ ដោយសារតែចលនាប្រឆាំងពីប្រជាជន ដែលមើលឃើញ ការរៀបចំកីឡាអូឡាំពិកថា ជាការចាយ ខ្ជះខ្ជាយ ជាជាងការនាំប្រយោជន៍សេដ្ឋកិច្ច។ ប្រជាជនអឺរ៉ុបទាំងនោះយល់មិនខុសទេ ព្រោះតាមបទពិសោធន៍ នៃការរៀបចំកីឡាអូឡាំពិករហូតមក ប្រទេសម្ចាស់ផ្ទះ មិនថា ចិន អង់គ្លេស ឬសូម្បីចុងក្រោយគឺប្រេស៊ីល គឺសុទ្ធតែខាតបង់ រាប់រយលានដុល្លារ។ ក្រិក ចិន ឬ ប្រេស៊ីល ជាដើម បានចំណាយលុយរាប់ពាន់លានដុល្លារ សម្រាប់សាងសង់បន្ថែម ហេដ្ឋារចនាសម្ព័ន្ធ ដើម្បីទទួលការប្រកួតកីឡាអូឡាំពិក ប៉ុន្តែ នៅទីបំផុត ប្រជាជនមិនបានទាញប្រយោជន៍ ពីហេដ្ឋារចនាសម្ព័ន្ធថ្មីនោះទេ។ ជាទូទៅ ប្រជាជនទាមទារឲ្យរដ្ឋាភិបាលយកលុយសម្រាប់រៀបចំកីឡាអូឡាំពិក ទៅផ្តោតចាយទៅលើវិស័យ អប់រំ និងសុខភាពវិញ គឺបានប្រយោជន៍ច្រើន ជាងការរៀបចំកីឡាអូឡាំពិកទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ