នៃម៉ារ កីឡាករបាល់ទាត់ដែលមានតម្លៃខ្លួន ២២២លានអឺរ៉ូ
២២២លានអឺរ៉ូ។ នេះជាទឹកប្រាក់ដែល ក្លឹបបាល់ទាត់បារាំង PSG បានចំណាយ សម្រាប់ទិញ កីឡាករ ប្រេស៊ីល នៃម៉ា ចេញពីក្លឹបបាល់ទាត់អេស្ប៉ាញ។ ចាប់ពីថ្ងៃសុក្រនេះទៅ កីឡាករឆ្នើមរបស់ប្រេស៊ីល នៃម៉ា នឹងក្លាយជាកម្មសិទ្ធិ របស់ក្លឹបបារាំង PSG ដែលដូចជាអ្នកគាំទ្រ របស់ខ្លួន បានស្វាគមកីឡាករនៃម៉ា ជាស្តេចបាល់ទាត់ ក្នុងទឹកដីបារាំង។
ចុះផ្សាយនៅថ្ងៃ៖ កែប្រែថ្ងៃទី៖
នៅប្រទេសបារាំង ការទិញ ផ្ទេរកីឡាករប្រេស៊ីល នៃម៉ា Neymar ចូលក្លឹបPSG Paris Saint Germain របស់បារាំង ជាដំណឹងនាំមុខ និងរំជើបរំជួលមិនថាក្នុងពិភពកីឡា ឬនយោបាយ។ សូម្បី ប្រធានាធិបតីបារាំង វ័យក្មេង លោកអេម៉ានុយអែល ម៉ាក្រុង ក៏មិនអាចទប់ជាប់អារម្មណ៍ រំភើប បន្ទាប់ពីការចរចា ទិញ ផ្ទេរ កីឡាករនៃម៉ា បានបិទបញ្ចប់ នៅថ្ងៃម្សិលមិញ។ សម្រាប់ប្រធានាធិបតីបារាំង ពិតណាស់ វាជាដំណឹងល្អ។ កិច្ចសន្យានេះនឹងធ្វើឲ្យបារាំងរឹតតែមានភាពទាក់ទាញ។
ទៅតាមការគ្រោងទុក កីឡាករឆ្នើមរបស់ប្រេស៊ីលបានមកដល់ព្រលានយន្តហោះ Bourget នៅព្រឹកថ្ងៃសុក្រនេះ ដើម្បីចូលរួមនៅក្នុងសន្និសីទកាសែត នៅស្តាតបារាំង Parc des princes។ នៅមុនមកដល់ទឹកដីបារាំងម្ល៉េះ អនាគតខ្សែប្រយុទ្ធរបស់ក្លឹប បារាំង PSGបាននិយាយរួចហើយថា លោកសប្បាយចិត្តណាស់ដែលបានចូលរួមជាមួយក្លឹបParis Saint Germainរបស់ បារាំង។ នៅក្លឹបPSG នៃម៉ារនឹងទទួលបានប្រាក់ប្រចាំឆ្នាំ ៣០លានអឺរ៉ូ គឺច្រើនជាងកីឡាករ មេស៊ី(២៥លានអឺរ៉ូ) នៅក្លឹបបាសឺឡូន និងគ្រីសយ៉ាណូ(២៣,៦លានអឺរ៉ូ) នៅរៀលម៉ាឌ្រីដទៅទៀត។
នៅថ្ងៃម្សិលមិញ បន្ទាប់ពីចរចា ដោយចម្រូងចម្រាស និងប្រទាញប្រទង់ខ្លាំងជាមួយក្លឹប Barcelon ដែលធ្លាប់ជាម្ចាស់របស់កីឡាករ នៃម៉ារ ក្លឹបបារាំង PSGបានសុខចិត្តចំណាយប្រាក់ ២២២លានអឺរ៉ូ ដើម្បីទិញផ្ទេរ កីឡាករ នៃម៉ារចេញពីក្លឹបអេស្ប៉ាញ។ ដោយចំណាយ២២២លានអឺរ៉ូ សម្រាប់ ទិញ និងបង់សងជម្ងឺចិត្ត ដែល នៃម៉ារ ដកខ្លួន មុនចប់កុងត្រា ជាមួយ ក្លឹបអេស្ប៉ាញ ក្លឹបបារាំង បានធ្វើឲ្យតម្លៃខ្លួន ទិញផ្ទេរកីឡាករ ឡើងខ្ពស់ មិនធ្លាប់មានក្នុងប្រវត្តិបាល់ទាត់។
មួយវិញទៀត ការដែលក្លឹបបារាំង PSG ហ៊ានបង់តម្លៃខ្ពស់ ដើម្បីចង់បានកីឡាករនៃម៉ារបានធ្វើឲ្យមានមតិរិះគន់ពីក្លឹបកីឡាអន្តរជាតិដទៃទៀត ព្រោះថា ការណ៍នេះនឹងធ្វើអតិផរណា នៅពេលដែលតម្លៃខ្លួនរបស់កីឡាករផ្សេងទៀត ក៏នឹងអាចឡើងតាមដែរ។
សហព័ន្ធបាល់ទាត់អេស្ប៉ាញ គ្រោងនឹងលើកផងដែរពីជម្លោះផលប្រយោជន៍ និងការរំលោភច្បាប់ ដែលបានតម្រូវឲ្យរាល់ក្លឹបបាល់ទាត់ អាចចំណាយលុយ ប្រមាណតែ៣០ភាគរយនៃចំណូលរបស់ខ្លួន ដើម្បីទិញកីឡាករ។ ២២២លានអឺរ៉ូគឺជាចំនួនច្រើនណាស់ បើប្រៀបធៀបនឹងចំណូលរបស់ក្លឹបPSG។ គេសង្ស័យដែរ ថា ការទិញដូរកីឡាករប្រេស៊ីលលើកនេះ មានជាប់ទាក់ទងនឹងហេតុផលនយោបាយ។ គេជឿថា រដ្ឋាភិបាលកាតារ ដែលជាម្ចាស់ក្លឹបបារាំង PSG និងដែលនឹងធ្វើជាម្ចាស់ផ្ទះ រៀបចំការប្រកួតបាល់ទាត់ពិភពលោក នៅឆ្នាំ ២០២២ ទំនងជាបានលូកដៃ ចាក់បញ្ចូលលុយរាប់លានអឺរ៉ូ ដើម្បី ឲ្យក្លឹបអាចទិញកីឡាករប្រេស៊ីល នៃម៉ារ លើកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ