ការផ្ទេរកីឡាករនៃម៉ារ មកក្លឹបបាល់ទាត់ប៉ារីស ជាល្បែងឃោសនារបស់កាតា
ចុះផ្សាយនៅថ្ងៃ៖
ស្តាប់ - ០៤:០៩
ការផ្ទេរកីឡាករប្រេស៊ីល នៃម៉ារ មកកាន់ក្លឹបបាល់បារាំងប៉ារីស PSG បានក្លាយជាព្រឹត្តិការណ៍ដ៏រំជើបរំជួល ពេញមួយចុងសប្តាហ៍កន្លងទៅនេះ មិនថាសម្រាប់ពិភពកីឡា ឬក៏ពិភពនយោបាយទេ។ ប៉ុន្តែក្រៅអំពីកកើកភ្ញាក់ផ្អើលនឹងតម្លៃផ្ទេរ ដ៏ខ្ពស់បំផុតមិនធ្លាប់មានប្រវត្តិកីឡាបាល់ទាត់ពិភពលោក ការផ្ទេរនៃម៉ារ មានបង្កប់នូវអត្ថន័យនយោបាយយ៉ាងជ្រាលជ្រៅសម្រាប់ប្រទេសកាតាដែលជាម្ចាស់ក្លឹប។ តើកាតាបានទទួលប្រយោជន៍អ្វីខ្លះពីការផ្ទេរតារាបាល់ទាត់ ?
ថ្លៃប៉ុន្មានក៏មិនមែនជាបញ្ហាដែរសម្រាប់កាតា ! កាតាមានមធ្យោបាយហិរញ្ញវត្ថុគ្មានព្រំដែនទេ ! ព្រះចៅកាតាម្ចាស់ក្លឹបកីឡាបាល់ទាត់ប៉ារីស និងរូបប្រធានក្លឹប Nasser al-Khelaïfi បានជំនួយពីក្រុមហ៊ុនហិរញ្ញវត្ថុយក្ស ពីមូលនិធិវិនិយោគ ពីក្រុមហ៊ុនទូរស័ព្ទ ពីក្រុមហ៊ុនទេសចរណ៍តាកាដ៏មានមហិទ្ធិរិទ្ធទៀត។ នៅពេលប្រទេសមួយជាម្ចាស់ក្លឹបកីឡា គេលែងនិយាយអំពីកំរិតកញ្ចប់ថវិកាទៀតហើយ ព្រោះប្រទេសនោះអាចមើលឃើញផលប្រយោជន៍ផ្សេងទៀតនៃកីឡាបាល់ទាត់ និងភាពល្បីល្បាញរបស់កីឡាករ។
កីឡាករជា រដ្ឋទូត! នេះមិនមែនជាលើកទីមួយទេ ដែលកាតាទាញប្រយោជន៍ពីតារាបាល់ទាត់នោះ។ កីឡាករ Ibrahimovic David Beckham ធ្លាប់បានដើរតួនេះរួចមកហើយ។ Zinedine Zidane ក៏ធ្លាប់ត្រូវបានតាកាជ្រើសរើសក្នុងតម្លៃកប់ពពក ដើម្បីមកឃោសនាកាតាឱ្យបានក្លាយជាប្រទេសម្ចាស់ផ្ទះទទួលរៀបចំកីឡាបាល់ទាត់ពិភពលោកឆ្នាំ២០២២។ កាតាចំណាយអស់រាប់លាន ជាថ្នូរនឹងការបង្កើនទំនាក់ទំនងការទូត។
ល្បែងនយោបាយ
ករណីនៃម៉ារ ក៏មានបង្កប់យុទ្ធសាស្ត្រដ៏ខ្ពស់ដែរ។ ការផ្ទេរតារាបាល់ទាត់ជាតិប្រេស៊ីលដ៏ល្បីល្បាញមកកាន់ក្លឹបប៉ារីស ក្នុងតម្លៃដ៏មហាសាល មិនធ្លាប់មានក្នុងប្រវត្តិបាល់ទាត់ បានក្លាយជាព្រឹត្តិការណ៍ ! តើសារព័ត៌មានណា អ្នកវិភាគណា អ្នកតាមដានណា មិនលើកនិយាយអំពីប្រធានបទនេះ ?! កាតាបានបង្វែរចំណាប់អារម្មណ៍ពិភពលោក ពីភេរវកម្ម ឱ្យមកផ្តោតតែលើសំណុំរឿងបាល់ទាត់ អស់ពេញមួយសប្តាហ៍។
សម្រាប់អ្នកវិភាគ ការផ្ទេរនៃម៉ា គឺជោគជ័យរបស់កាតា ក្នុងនយោបាយទំនាក់ទំនង និងការផ្សព្វផ្សាយរបស់ខ្លួន ! កាតាអាចធ្វើឫកអឿ ដាក់គូប្រជែងក្នុងតំបន់ដែលប៉ុនប៉ងដាក់កាតាដោយឯកា។
តាំងពីដើមខែមិថុនាមក អេមីរ៉ាអារ៉ាបរួម អារ៉ាប៊ីសាអូឌីត អេហ្ស៊ីប និងបារ៉ែន បានប្រកាសផ្តាច់ទូតពីកាតា ដោយចោទថាដូហាគាំទ្រភេរវនិយម។ ប្រទេសទាំងបួនបានធ្វើយុទ្ធនាការបំផុសព័ត៌មានស្ទើររាល់ថ្ងៃ ក្នុងពិភពអារ៉ាប និងឆាកអន្តរជាតិផង ធ្វើយ៉ាងណាឱ្យកាតាឯកា។
ប៉ុន្តែពេលនេះ កាតាកាន់តែលេចមុខខ្លាំងឡើងនៅលើពិភពលោក ! កាន់តែមានមុខមានមាត់ដោយប្រើ “អំណាចស្រទន់” តាមរយៈកីឡា។ យុទ្ធសាស្ត្រ “អំណាចស្រទន់” ត្រូវបានកាតាប្រកាន់យកតាំងពីយូរមកហើយ។
កាតាតូច តែមានខ្លាំង បានដើរតួនាទីកាន់តែធំឡើងៗ ក្នុងជម្លោះនិងសំណុំរឿងរសើបៗនៅក្នុងពិភពអារ៉ាប តាំងពីជាង២០ឆ្នាំមកហើយ។ កាតាក៏បានបង្កើនឥទ្ធិពលរបស់ខ្លួន តាមរយៈការវិនិយោគអន្តរជាតិដ៏សម្បើម ក្នុងវិស័យអចលនទ្រព្យ សណ្ឋាគារ ឧស្សាហកម្ម ដឹកជញ្ជូនផ្លូវអាកាស ហិរញ្ញវត្ថុ ប្រព័ន្ធផ្សព្វផ្សាយព័ត៌មាន និង កីឡា។ ដោយមិនរាប់អំពីកាតាអ៊ែរវ៉េ ឬការឧបត្ថម្ភអាវកីឡាក្លឹបFC Barcelone និម្មិត្តរូបចំបងនៃ “អំណាចស្រទន់” របស់កាតាមួយទៀតគឺ ទូរទស្សន៍ Al-Jazeera ទូរទស្សន៍កីឡា Beln Sports។
កាលពីថ្ងៃទី ២១កក្កដា ព្រះចៅកាតា បានបញ្ជាក់អំពីភាពចាំបាច់នៃការអភិវឌ្ឍន៍ នយោបាយស្រទន់របស់ខ្លួននៅលើឆាកអន្តរជាតិ ដោយមានការចូលរួមពីអ្នកជំនាញកំពូលៗរបស់ជាតិ អារ៉ាបនិងបរទេស។ នៅសប្តាហ៍នេះ ក្នុងខណៈដែលប្រទេសកំពុងស្ថិតក្នុងស្ថានភាពតានតឹងជាមួយអ្នកជិតខាង កាតាបានរំលេចខ្លួនឱ្យផុសឡើងតាមរយៈការផ្ទេរតារាបាល់ទាត់នៃម៉ារ។
យុទ្ធសាស្ត្រផ្សព្វផ្សាយរបស់កាតាពេលនេះ ប្រទេសជាគូប្រជែងត្រូវតែស្រឡះកាំង ព្រោះពួកគេទាំងបួន គ្មានអំណាចនិងមធ្យោបាយទំនាក់ទំនងខ្លាំង ក្នុងវិស័យកីឡាថ្នាក់អន្តរជាតិ ដូចឡើយ។ ជាច្រើនថ្ងៃមកនេះ គ្មាននរណាបង្ហាញរូបភាពអវិជ្ជមានរបស់កាតាទេ គេចាប់អារម្មណ៍តែលើការផ្ទេរនៃម៉ារ។ នៅបស្ចឹមលោក គេផ្តល់តម្លៃដល់ព័ត៌មានកីឡាណាស់ ! ដូច្នេះវាច្បាស់ណាស់ ថាកីឡា “ក្នុងករណីផ្ទេរនៃម៉ារនេះ” ត្រូវបានកាតាប្រើសម្រាប់បំបែកភាពឯកានយោបាយរបស់ខ្លួននោះ។ បារាំងក៏បានទទួលស្គាល់ថាជា ការផ្ទេរនៃម៉ារជាប្រតិបត្តិការទំនាក់ទំនងដែរ ហេតុដូច្នេះហើយបានជាបារាំងជំរុញកាតាត្រូវមានតម្លាភាពហិរញ្ញវត្ថុជាមួយក្លឹប កុំឱ្យដូចការចោទប្រកាន់ថាកាតាផ្តល់ហិរញ្ញវត្ថុដល់ពួកភេរវនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ