តើប្រតិបត្តិការពង្រាយទាហានល្បាត នៅបារាំងមានប្រសិទ្ធភាពដែរឬទេ?
ទាហានល្បាតបារាំង ៦នាក់ ត្រូវបានជនមិនស្គាល់មុខ បើកឡាន បុកឲ្យរបួស នៅព្រឹកថ្ងៃពុធម្សិលមិញ។ ចាប់តាំងពីដើមឆ្នាំ២០១៧ នេះជាលើកទី ៦ ដែលទាហានដើរល្បាត បារាំង រងការវាយប្រហារពីក្រុមភេរវនិយម។ ការណ៍នេះ ធ្វើឲ្យគេចោទសួរពីប្រសិទ្ធភាព និងសារប្រយោជន៍ នៃប្រតិបត្តិការ ដាក់ពង្រាយទាហានឲ្យល្បាតនៅទីសាធារណៈ ដែលរដ្ឋាភិបាលបារាំង ចាប់អនុវត្តធ្វើ នៅក្រោយបារាំងរងការវាយប្រហារភេរវកម្ម ឆ្នាំ ២០១៥។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងប្រតិបត្តិការ Sentinelle ការងាររបស់ទាហានល្បាត បារាំង គឺ ធានាសន្តិសុខជូនជនជាតិបារាំង។ ប៉ុន្តែ ការវាយប្រហារជាបន្តបន្ទាប់ ទៅលើទាហានល្បាតបារាំង បានធ្វើឲ្យ ពួកគេ ក្លាយពីខែលការពារ ប្រជាជន មកជាផ្ទាំងស៊ីប រងការវាយប្រហារដោយផ្ទាល់ពីភេរវជន។ នេះជាការវាយតម្លៃ ជាទូទៅរបស់កាសែត និងអ្នកជំនាញខាងសន្តិសុខផ្ទៃក្នុងបារាំង ដែលបានចោទសួរផងដែរ ពីសារៈសំខាន់នៃប្រតិបត្តិការ Sentinelle ដែលនៅក្នុងនោះ ទាហានបារាំង ៧ពាន់ ត្រូវបានដាក់ពង្រាយ ឲ្យដើរល្បាត នៅតាមកន្លែងសាធារណៈ ក្នុងទឹកដីបារាំង។ តាមកាសែតបារាំង ប្រតិបត្តិការ Sentinelle មិនមែនជាមធ្យោបាយមានប្រសិទ្ធិភាពដើម្បីប្រយុទ្ធប្រឆាំងភេរវកម្មនោះទេ ប៉ុន្តែ វាជាអាវុធឃោសនា របស់រដ្ឋាភិបាលបារាំង ព្រោះថា ដោយបញ្ជូនឲ្យទាហានដើរល្បាត គ្រប់ច្រកល្ហក រដ្ឋាភិបាលចង់ធានាដល់ប្រជាជនថា រដ្ឋាភិបាលបានចាត់វិធានការការពារសន្តិសុខយ៉ាងតឹងរ៉ឹង។
សម្រាប់រដ្ឋមន្រ្តី ការពារជាតិ បារាំង គេមិនអាចសង្ស័យពីប្រតិបត្តិការ Sentinelle ទេ។ ប្រតិបត្តិការនេះ មានសារៈសំខាន់ លើសពេលណាៗទាំងអស់។ ទាហានល្បាតបារាំងមិនត្រឹមតែជាខែល សម្រាប់ការពារសន្តិសុខឲ្យប្រជាជនតែប៉ុណ្ណោះទេ ប៉ុន្តែ ពួកគេបានចូលរួមផងដែរ នៅក្នុងប្រតិបត្តិការបំផ្លាញគម្រោងផែនការធ្វើភេរវកម្ម ក្នុងទឹកដីបារាំង។
ប្រធានមជ្ឈមណ្ឌលគិតពិចារណាពីសន្តិសុខផ្ទៃក្នុង លោក Thibault de Montbrial វិញ យល់ថា រដ្ឋាភិបាលគួរគិតគូរឡើងវិញ ពីប្រតិបត្តិការ Sentinelle ក្នុងរយៈពេលវែង ដើម្បី ប្រយុទ្ធប្រឆាំងនឹងក្រុមភេរវនិយម ដោយប្រសិទ្ធិភាព ពោលគឺរដ្ឋាភិបាល ត្រូវបំពាក់អាវុធ ឲ្យបានច្រើន ដល់ប៉ូលិស និងជនស៊ីវិល ដែលទទួលបន្ទុករក្សាសន្តិសុខ។
សម្រាប់ Thibault de Montbrial ទាហានល្បាត គួរមានវត្តមាន តែ នៅតាម ព្រលានយន្តហោះ ឬ ស្ថានីយ៍រថភ្លើង ចំណែក ការយាមល្បាតនៅតាមកន្លែងសាធារណៈផ្សេងទៀត គួរតែជាបន្ទុករបស់ប៉ូលិស ស៊ីវិល ឬកងអាវុធហត្ថ ដែលមានសិទ្ធិកាន់អាវុធ សម្រាប់តបតនឹងភេរវជន។ តាមអ្នកជំនាញខាងលើ ដោយសារតែភេរវជន ធ្វើសកម្មភាពក្នុងទ្រង់ទ្រាយតូច ដោយប្រើអាវុធ ដូចជាកាំបិត ឬបើកឡានបុកសម្លាប់ មនុស្ស ប៉ូលិស អាចអន្តរាគមភ្លាមៗ ដោយមិនចាំបាច់មានទាហានដើរល្បាតច្រើននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ