បាតុកម្មដំបូងប្រឆាំងនឹងកំណែទម្រង់ការងាររបស់ប្រធានាធិបតីថ្មី
តើលោកប្រធានាធិបតី អេម៉ានុយអែល ម៉ាក្រុង អាចធន់បានប៉ុណ្ណា ? ទើបតែចាប់ផ្តើមអាណត្តិជាអ្នកដឹកនាំប្រទេសបានមិនដល់បួនខែផង បាតុកម្មមួយនឹងត្រូវរៀបចំឡើង នៅថ្ងៃអង្គារទី ១២ កញ្ញានេះ ដើម្បីសម្តែងការប្រឆាំងនឹងគម្រោងកំណែទម្រង់ស្នើឡើងដោយរដ្ឋាភិបាល។ ក្រោមការអំពាវនាវរបស់សហជីព បាតុករជាច្រើនគ្រោងនឹងនាំគ្នាចុះថ្នល់ នៅតាមក្រុងធំៗដូចជា ប៉ារីស ម៉ាកសី លីយ៉ុង ទូលូ ។ល។ និង។ល។
ចុះផ្សាយនៅថ្ងៃ៖
ស្តាប់ - ០១:៥០
សហជីពការងារ CGT បានរាប់ឃើញថានឹងមានបាតុកម្មចំនួនប្រមាណជិត២០០ នឹងត្រូវរៀបចំធ្វើនៅទូទាំងប្រទេសបារាំង និងការអំពាវនាវដល់ទៅជាង៤ពាន់ ដោយមានឃើញ បុគ្គលិកក្នុងវិស័យដឹកជញ្ជូន ថាមពល និងសុខភាព បានដាក់ពាក្យជូនដំណឹងសុំធ្វើបាតុកម្មរួចរាល់ហើយ។ សហជីពមួយចំនួនផ្សេងទៀត ដូចជាសហជីពសាមគ្គី Solidaire FSU សហជីពនិស្សិត និងសហជីពកម្មករ Force ouvrière មួយភាគក៏នឹងចូលរួមធ្វើបាតុកម្មនៅថ្ងៃអង្គារនេះដែរ។
កម្មវត្ថុនៃបាតុកម្មនៅថ្ងៃអង្គារទី១២កញ្ញា២០១៧នេះ ធ្វើឡើងដើម្បីបរិហារគម្រោងកំណែទម្រង់ច្បាប់ការងារដែរ ដែលបើតាមពួកគេរដ្ឋាភិបាលថ្មីបានទម្លាក់សិទ្ធិការងារពីបុគ្គលិកកម្មករដើម្បីយកចិត្តក្រុមថៅកែ។ សហជីពដដែលនេះ គ្រោងនឹងអំពាវនាវធ្វើបាតុកម្មទីពីរនៅថ្ងៃទី ២១កញ្ញាទៀត។
បើតាមការសន្និដ្ឋាន បាតុកម្មដំបូងក្នុងអាណត្តិរបស់លោកម៉ាក្រុងជាប្រធានាធិបតី មានសន្ធឹកខ្លាំង ប្រហាក់ប្រហែលនឹងកម្លាំងបាតុកម្មប្រឆាំងច្បាប់ការងារឆ្នាំ២០១៦ សម័យដឹកនាំដោយលោក ហ្វ្រង់ស័រ ហូឡង់ ដែលកាលណោះមានពលរដ្ឋបារាំងប្រមាណជាង៤០ម៉ឺននាក់នាំគ្នាចុះថ្នល់ (តួលេខផ្តល់ដោយក្រសួងមហាផ្ទៃ)។ នេះបើតាមការរំពឹងរបស់សហជីពCGT។ តែជាសំណាងអាក្រក់ក្រុមសហជីពនេះមិនបានទទួលការគាំទ្រពីក្រុមសហជីពបារាំងធំៗផ្សេងទៀត ព្រមទាំងពីសំណាក់បក្សប្រឆាំង។ បក្សInsoumisesរបស់លោកមេឡង់ស្ហុង គ្រោងនឹងរៀបចំបាតុកម្មដែរតែនៅថ្ងៃទី ២៣កញ្ញា ប្រឆាំងនឹងអ្វីដែលលោកហៅថា រដ្ឋប្រហារសង្គមរបស់ម៉ាក្រុង។
ប៉ុន្តែលោកប្រធានាធិបតីបារាំង ម៉ាក្រុង ដែលបើទោះបីជាប្រជាប្រិយភាពបានធ្លាក់ចុះខ្លាំងបំផុត នៅតែអះអាងយ៉ាងដាច់ខាតថា ប្រទេសបារាំងត្រូវការធ្វើកំណែទម្រង់ ដូច្នេះលោកមិនដកថយដាច់ខាត នៅចំពោះមុខក្រុមមនុស្សកំជិល ជ្រុលនិយម។ ប្រសាសន៍ប្រធានាធិបតីដែលហាក់ដូចជាដាក់ដុតឱ្យក្រុមបាតុករកាន់មានកំហឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ