ក្រុមហ៊ុនប្រេងរុស្ស៊ីចុះកិច្ចព្រមព្រៀងឧស្ម័នជាមួយគួឌីស្ថានអ៊ីរ៉ាក់
ក្រុមហ៊ុនប្រេងដ៏ធំបំផុតនៅរុស្ស៊ី Rosneft នឹងធ្វើវិនិយោគទៅក្នុងហេដ្ឋារចនាសម្ព័ន្ធឧស្ម័ន នៃដែនដីគួឌីស្ថានអ៊ីរ៉ាក់ ហេតុដែលនឹងអនុញ្ញាតឲ្យតំបន់នេះ ក្លាយទៅជាតំបន់ដ៏សំខាន់បង្ហូរឧស្ម័នចេញទៅប្រទេសតួកគីនិងទ្វីបអឺរ៉ុប។ គឺថ្ងៃ២៥កញ្ញាខាងមុខ ដែលនៅគួឌីស្ថានអ៊ីរ៉ាក់ ត្រូវប្រព្រឹត្តទៅប្រជាមតិ ដើម្បីប្រកាសឯករាជ្យ ប៉ុន្តែ អាជ្ញាធរអ៊ីរ៉ាក់បានច្រានចោលទៅហើយការបោះឆ្នោតនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
គឺតាំងពីឆ្នាំ២០១៤មក ដែលគួឌីស្ថានអ៊ីរ៉ាក់តែងនាំប្រេងឆៅដោយម្ចាស់ការខ្លួនឯង ចេញ ទៅក្រៅ ដោយមិនខ្វល់នឹងរដ្ឋាភិបាលអ៊ីរ៉ាក់ឡើយ ចំណែកក្រុមហ៊ុនប្រេង Rosneft ដែលស្ថិតក្នុងកណ្តាប់ដៃរដ្ឋរុស្ស៊ី ក្នុងឆ្នាំ២០១៧នេះ បានភ្ជាប់ខ្លួនទៅក្នុងបញ្ជីអតិថិជននៃតំបន់អឌ្ឍស្វយ័តនេះ របស់អ៊ីរ៉ាក់ ដោយផ្តល់ឲ្យនូវប្រាក់កម្ចីរាប់រយលានដុល្លារជាថ្នូរនឹងប្រេងដែលខ្លួននឹងទទួលបានពីដែនដីនោះឯង។
ចាប់ពីអំណើះតទៅ Rosneft នឹងបង្កើនវិនិយោគខ្លួនទៅក្នុងវិស័យឧស្ម័ន ក្នុងក្របខ័ណ្ឌនៃកិច្ចព្រមព្រៀង ដែលពាំនាំ ទឹកប្រាក់ក្រាស់ក្រែលទៅក្នុងការសាងសង់ខ្សែបំពង់បង្ហូរឧស្ម័ន - ដំណឹងនេះប្រកាសរួមគ្នា នៅ ថ្ងៃចន្ទ ១៨ កញ្ញា ដោយក្រុមហ៊ុនប្រេងរុស្ស៊ី និងរដ្ឋាភិបាលតំបន់គួឌីស្ថានអ៊ីរ៉ាក់។ ស្របនឹងប្រភពពីរ ដែល ជំនិតនឹងកិច្ចចរចាជុំវិញសាច់រឿងនោះ ទឹកប្រាក់វិនិយោគមានទំហំដល់ជាង១ពាន់លានដុល្លារ។
គួឌីស្ថានអ៊ីរ៉ាក់ រាវរកបានធនធានហិរញ្ញវត្ថុមួយភាគ គឺតាមរយៈការចុះកិច្ចព្រមព្រៀងទទួលហិរញ្ញប្បទានជាមុន សម្រាប់ក្រោយមកនាំចេញប្រេងស្តុករបស់ខ្លួន។ មកទល់ឥឡូវ តំបន់អឌ្ឍស្វយ័តនេះ តែងខំប្រឹងអភិវឌ្ឍអណ្តូងឧស្ម័នរបស់ខ្លួន។
ការចូលខ្លួនរបស់Rosneft ជាក្រុមហ៊ុនប្រេងដ៏សំខាន់លើទីផ្សារពិភពលោក ត្រូវតែជំរុញដល់ការអភិវឌ្ឍន៍វិស័យឧស្ម័ននៅគួឌីស្ថានអ៊ីរ៉ាក់ ដែលបច្ចុប្បន្នច្រើនតែរកស៊ីជាមួយ បណ្តាក្រុមហ៊ុនខ្នាតមធ្យម។
សមត្ថភាពនៃខ្សែបំពង់ដែលគ្រោងសង់ឡើងនោះ នឹងអនុញ្ញាតឲ្យគួឌីស្ថានអ៊ីរ៉ាក់ មិនគ្រាន់តែបំពេញដល់តម្រូវការទីផ្សារផ្ទៃក្នុងប៉ុណ្ណោះទេ តែក៏បង្ហូរឧស្ម័នរហូតដល់ ៣០.០០០ លានម៉ែត្រគីប ក្នុង១ឆ្នាំទៅទីផ្សារបរទេស។ បរិមាណនេះ គឺស្មើនឹង ៦%នៃតម្រូវការទ្វីបអឺរ៉ុបខាងឧស្ម័ន និង១ភាគ៦ នៃការនាំចេញសព្វថ្ងៃ របស់រុស្ស៊ី ដែលជាប្រទេសផ្គត់ផ្គង់ឧស្ម័នសំខាន់ជាងគេសម្រាប់អឺរ៉ុប។
ខ្សែបំពង់នោះនឹងដំណើរការក្នុងឆ្នាំ២០១៩ ហើយការបង្ហូរឧស្ម័នចេញពីគួឌីស្ថានអ៊ីរ៉ាក់ ត្រូវចាប់ផ្តើមក្នុងឆ្នាំ២០២០ ទៅកាន់តួកគី ដែលនឹងក្លាយជាឈ្នាន់ សម្រាប់បង្ហូរវាតទៅទ្វីបអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ