អង្គការសហប្រជាជាតិ ៖ រុស្ស៊ីរំលោភសិទ្ធិមនុស្សធ្ងន់ធ្ងរនៅគ្រីមេ
នៅក្នុងរបាយការណ៍ចេញផ្សាយជាសាធារណៈនៅថ្ងៃចន្ទទី ២៥ កញ្ញា២០១៧នេះ អង្គការសហប្រជាជាតិបានសន្និដ្ឋានថា រុស្ស៊ី បានប្រព្រឹត្តកំហុសដ៏ធ្ងន់ធ្ងរមួយ គឺការរំលោភសិទ្ធិមនុស្សនៅតំបន់គ្រីមេ។ សកម្មភាពរំលោភសិទ្ធិមនុស្សទាំងនោះមានជាអាទិ៍ ការចាប់ខ្លួន ឃុំឃាំងមនុស្ស ដោយគ្មានឆ្លងកាត់ តុលាការ ឬក៏បង្ខំពលរដ្ឋគ្រីមេ ឱ្យកាន់សញ្ជាតិរុស្ស៊ី ជាដើម។ល។
ចុះផ្សាយនៅថ្ងៃ៖
ស្តាប់ - ០១:៤៤
“រុស្ស៊ីបានរំលោភសិទ្ធិមនុស្សយ៉ាងធ្ងន់ធ្ងរ ដោយបានប្រើអំណាចចាប់ខ្លួនមនុស្ស ចាប់ឃុំឃាំង ធ្វើឱ្យមានការបាត់ខ្លួន ធ្វើបាប ធ្វើទារុណកម្ម និងយ៉ាងហោចណាស់បានប្រហារជីវិតមនុស្សម្នាក់ ដោយមិនឆ្លងកាត់តុលាការ”។ នេះបើការសរសេររៀបរាប់លម្អិត នៅក្នុងរបាយការណ៍របស់អង្គការសហប្រជាជាតិ។ ជានេះទៀត បើតាមរបាយការណ៍ ជនជាប់ឃុំឃាំង មួយចំនួនដែលចាប់ខ្លួនបាននៅគ្រីមេ ត្រូវបញ្ជូនពន្ធនាគាររុស្ស៊ី។ ទង្វើបែបនេះ ខុសនិងផ្ទុយស្រឡះអំពីច្បាប់អន្តរជាតិ។
រុស្ស៊ី បានក្រសោបយកទឹកដីគ្រីមេ ដែលជារបស់អ៊ុយក្រែន ទៅគ្រប់គ្រង កាលពីខែមីនាឆ្នាំ២០១៤។ ប្រជាពលរដ្ឋរស់នៅក្នុងតំបន់នេះ ត្រូវក្លាយជាទៅជនជាតិរុស្ស៊ីទាំងអស់ លើកលែងតែជនណាដែលបានសរសេរលិខិតជាលាយលក្ខណ៍អក្សរសុំប្រឆាំងតែប៉ុណ្ណោះ។
“បង្ខំពលរដ្ឋរស់នៅក្នុងដែនដីអាណានិគម ឱ្យកាន់សញ្ជាតិរុស្ស៊ី ស្មើនឹងបង្ខំពួកគេឱ្យទទួលស្គាល់និងគាំទ្ររដ្ឋអំណាចដែលគេប្រឆាំង ! សកម្មភាពនេះ ត្រូវបានហាមឃាត់ដោយសន្ធិសញ្ញាក្រុងហ្សឺណែវ” ! នេះជាការគូសបញ្ជាក់របស់ឧត្តមស្នងការពារសិទ្ធិមនុស្សអង្គការសហប្រជាជាតិ លោក Zeid Ra’ad al Hussein។
គិតត្រឹមខែឧសភា ២០១៥ មានពលរដ្ឋគ្រីមេ ប្រមាណ១០ម៉ឺននាក់ ពោលគឺស្មើនឹង៤%នៃប្រជាជនសរុបប៉ុណ្ណោះ ដែលគ្មានសញ្ជាតិរុស្ស៊ី។ នេះបើតួលេខផ្តល់ដោយអ្នកទទួលខុសត្រូវរុស្ស៊ី ដែលអង្គការសហប្រជាជាតិទទួលបាន។
របាយការណ៍ដដែលនេះបានលម្អិតបន្ថែមទៀតថា ក្រុមសកម្មជនអ្នកប្រឆាំងនឹងប្រជាមតិប្រគល់គ្រីមេ បានក្លាយជាផ្ទាំងស៊ីបនៃការចាប់ចង ក្រោមហេតុផលអនុវត្តច្បាប់ប្រឆាំងនឹងភេរវកម្ម ប្រឆាំងនឹងជនជ្រុលនិយម និងក្រុមផ្តាច់ទឹកដីនិយម។ ជនខ្លះ ត្រូវបានអាជ្ញាធរចាប់បង្ខំទៅដាក់ក្នុងមន្ទីរពេទ្យឆ្កួត។ ការសិក្សាជាភាសអ៊ុយក្រែន ស្ទើរតែរលុបបាត់ ស្ថាប័នសភា តំណាងក្រុមជនជាតិដើម Tatarsនៅគ្រីមេ ក៏ត្រូវម៉ូស្គូហាមឃាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ