អេស្ប៉ាញ បិទការិយាល័យបោះឆ្នោតប្រជាមតិខុសច្បាប់នៅកាតាឡូញ៉ាបានជាងពាក់កណ្តាល
ភាពតានតឹងកំពុងឡើងខ្លាំងនៅប្រទេសអេស្ប៉ាញ ! ម្ខាងជាក្រុមបាតុករប្រមូលផ្តុំគ្នាស្រែកទាមទាររកការរួបរួមជាតិ ម្ខាងជាក្រុមផ្តាច់ទឹកដីនិយមកាតាឡូញ៉ា ដែលកំពុងជំនះឈានទៅសម្រេច ការបោះឆ្នោតប្រជាមតិ ដើម្បីទាមទារឯករាជ្យ។ ការបោះឆ្នោតប្រជាមតិខុសច្បាប់ គ្រោងប្រព្រឹត្តទៅនៅថ្ងៃអាទិត្យទី ១ តុលានេះ។ រដ្ឋាភិបាលតំបន់បានប្រកាសរៀបការិយាល័យបោះឆ្នោត ចំនួន២៣០០កន្លែង។ ប៉ុន្តែអំណាចកណ្តាលអេស្ប៉ាញមិនបណ្តោយនិងបានបិទខ្ទប់ការិយាល័យនោះអស់ជាងពាក់កណ្តាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
សម្រាប់រដ្ឋាភិបាលអេស្ប៉ាញ នឹងគ្មានទេការបោះឆ្នោតប្រជាមតិនៅថ្ងៃទី ១ តុលានេះ ! ក្រុងម៉ាឌ្រីដសង្ឃឹមលើស្មារតីប៉ូលិសកាតាឡូញ៉ា ដែលជាតំណាងរដ្ឋាភិបាល ក្នុងការរារាំងកុំឱ្យការបោះឆ្នោតប្រជាមតិខុសច្បាប់អាចប្រព្រឹត្តទៅបាន។
បើគិតមកទល់នឹងរសៀលថ្ងៃសៅរ៍ទី ៣០កញ្ញា អាជ្ញាធរប៉ូលិសតំបន់កាតាឡូញ៉ា បានប្រកាសបិទខ្ទប់ការិយាល័យបោះឆ្នោត បានជាងពាក់កណ្តាល ពោលគឺប្រមាណ១៣០០កន្លែង។ នៅក្នុងចំណោមនោះ ១៦៣ការិយាល័យ សកម្មជនទាមទារផ្តាច់ទឹកដីនិយម ជាប់នៅខាងក្នុងផង។ សកម្មជនទាំងនោះមានសិទ្ធិសុំដើរចេញ ប៉ុន្តែគ្មាននរណាម្នាក់អាចជ្រៀតចូលការិយាល័យនោះបានវិញទេ។
សូមបញ្ជាក់ថា រដ្ឋាភិបាលតំបន់កាតាឡូញ៉ា បាននិងកំពុងបន្តជំនះរៀបចំការបោះឆ្នោតប្រជាមតិដើម្បីទាមទារឯករាជ្យតំបន់ ផ្តាច់ខ្លួនចេញពីប្រទេសអេស្ប៉ាញ យ៉ាងមុះមុត។ តាំងពីថ្ងៃសុក្រមក សកម្មជនអ្នកផ្តាច់ទឹកដីនិយម ដែលជាប្រជាពលរដ្ឋ ជាមាតាបិតាសិស្ស បាននាំគ្នាចូលទៅកាន់កាប់សាលារៀនជាច្រើន ដើម្បីរៀបចំយកធ្វើជាការិយាល័យបោះឆ្នោត។ ប្រមុខចលនាឯករាជ្យនិយមបានប្រកាសដែរ មាន២៣១៥ការិយាល័យ ចាំទទួលពលរដ្ឋកាតាឡូញ៉ាមកបោះឆ្នោតប្រជាមតិ។
ប្រជាមតិនេះជាទង្វើខុសច្បាប់ ព្រោះវាត្រូវបានហាមឃាត់ដោយរដ្ឋធម្មនុញ្ញ។ តុលាការក៏បានចេញបម្រាម ឱ្យសាលារៀន ព្រមទាំងអាគារសាធារណៈផ្សេងទៀត ដែលអាចប្រែក្លាយជាការិយាល័យបោះឆ្នោតបាន ត្រូវបិទទ្វារ និងបានបញ្ជាឱ្យប៉ូលិសកាតាឡូញ៉ា យាមទៅតាមច្រកចូលស្ថាប័នទាំងនោះ ព្រមទាំងរឹបអូសយករាល់សម្ភារៈបរិក្ខារសម្រាប់បោះឆ្នោត។ ប៉ូលិសដែលមានអារម្មណ៍ជាជនជាតិកាតាឡូញ៉ាផង ជាអ្នកតំណាងរដ្ឋាភិបាលផង ក៏បានទទួលបទបញ្ជាមិនឱ្យប្រើកម្លាំងហិង្សាលើពលរដ្ឋទេ។ ពួកគេបានត្រឹមអញ្ជើញក្រុមអ្នកកាប់កាប់ និងជាប់ក្នុងការិយាល័យ ចេញដោយសម្រួល យ៉ាងយូរត្រឹមព្រឹកថ្ងៃអាទិត្យវេលាម៉ោង៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ