តើបារាំងមានភាពតឹងតែងយ៉ាងណាក្នុងផ្នែកប្រឆាំងភេរវកម្ម ?
ចុះផ្សាយនៅថ្ងៃ៖
ស្តាប់ - ០៤:១៤
ក្រោយពីដាក់ប្រទេសក្នុងភាពអាសន្នអស់រយៈពេល២២ខែ នៅថ្ងៃទី៣តុលានេះ សភាបារាំងបានបោះឆ្នោតអនុម័តគម្រោងច្បាប់ភេរវកម្មថ្មី។ ជាគម្រោងច្បាប់ដ៏ចាំបាច់និងមានលំនឹង សម្រាប់នាំប្រទេសចេញពីភាពអាសន្ន ហើយអាចធានាបានសុវត្ថិភាពនិងសន្តិសុខជូនពលរដ្ឋបានយ៉ាងពេញលេញ។ នេះបើតាមការអះអាងរបស់រដ្ឋមន្ត្រីក្រសួងមហាផ្ទៃ។ ប៉ុន្តែគម្រោងច្បាប់នេះបានទទួលរកការរិះគន់យ៉ាងខ្លាំង សូម្បីតែសមាជិកសភានៃបក្សកាន់អំណាចផ្ទាល់ក៏មានអ្នកបោះឆ្នោតអនុប្បវាទដែរ។ តើច្បាប់ប្រឆាំងភេរវកម្មនេះមានតម្លៃពិតយ៉ាងណា បើប្រៀបទៅនឹងប្រទេសផ្សេង ?
សភាបារាំងបានអនុម័តច្បាប់ប្រឆាំងភេរវកម្មតែពីរថ្ងៃក្រោយភេរវកម្មចាក់សម្លាប់មនុស្សនៅម៉ាកសី ក្រុងភាគខាងត្បូងប្រទេស និងឃាតកម្មនៅឡាស់វេហ្កាស ដែលអង្គការរដ្ឋអ៊ីស្លាមបានប្រកាសថាជាស្នាដៃរបស់ពួកគេ។ គម្រោងច្បាប់នេះនឹងចូលជាធរមាននៅថ្ងៃទី ១ វិច្ឆិកា ពោលគឺមកជំនួសច្បាប់ដាក់ប្រទេសភាពអាសន្នភេរវកម្ម ដែលបារាំងបានប្រកាន់យកតាំងពីថ្ងៃទី ១៣វិច្ឆិកា២០១៥មក។ ក៏ប៉ុន្តែសម្រាប់បក្សកុម្មុយនិស្តបារាំង និងបក្សស្តាំជ្រុលនិយម គម្រោងច្បាប់នេះ គឺជាការប្រែក្លាយច្បាប់អាសន្នឱ្យទៅជាច្បាប់ព្រហ្មទណ្ឌទូទៅ។ ឯខាងអ្នកសាធារណរដ្ឋ យល់ថាមិនសូវតឹងតែង ព្រោះការគំរាមកំហែងភេរវកម្មនៅខ្ពស់ខ្លាំង។ តើការរិះគន់នេះមានមូលដ្ឋានត្រឹមត្រូវទេ ?! ចុះបើប្រៀបនឹងប្រទេសផ្សេង តើច្បាប់ប្រឆាំងភេរវកម្មបារាំងធូររលុងប៉ុណ្ណា ?
តាមការពិតថ្វីបើអង្គការការពារសិទ្ធិមនុស្ស Amnesty International ទើបបានចេញរបាយការណ៍បន្ទោសសមាជិកអឺរ៉ុបថាយកច្បាប់អាសន្នមកប្រើជាធម្មតាមែន តែប្រធានមជ្ឈមណ្ឌលវិភាគភេរវកម្មបារាំងយល់ថាច្បាប់ភេរវកម្មបារាំងនៅធូររលុងខ្លាំង។
ដែនអំណាចការពារ
តាមរយៈគម្រោងច្បាប់ថ្មី មេប៉ូលិសមានលទ្ធភាពជាអ្នកចាត់វិធានការការពារ ជាអ្នកគ្រប់គ្រងធ្វើអធិការកិច្ច និងចម្រោះ ដោយប្រើកម្លាំងសន្តិសុខឯកជនផងក៏បាន។
ក្នុងវិស័យនយោបាយការពារនេះ អ៊ីស្រាអែលមានបទពិសោធន៍ខ្លាំងជាងគេ។ ស្គាល់សង្គ្រាម៧លើក សង្គ្រាមសាសនាគប់ដំថ្ម ២លើក អ៊ីស្រាអែលបានអភិវឌ្ឍន៍វិធានការការពារខ្លាំងណាស់ ជាពិសេសនៅតាមតំបន់ មណ្ឌលសំខាន់ៗ ដូចជាការប្រើរនាំងនៅច្រកចូលដើម្បីចម្រោះមនុស្ស ប្រើសរសរដែកថែបដើម្បីបញ្ឈប់ឬពន្យឺតរថយន្តកុំឱ្យបើកសម្រុកទៅបុកហ្វូងមនុស្សដើរ… តាំងពីឆ្នាំ២០១៥មក បារាំងបានក្លាយជាអតិថិជនដ៏សំខាន់របស់ក្រុមហ៊ុនសន្តិសុខអ៊ីស្រាអែល។
ការឆែកឆេរ
នៅក្នុងស្ថានភាពប្រទេសក្នុងភាពអាសន្ន ការឆែកឆេរអាចប្រព្រឹត្តទៅដោយគ្មានឆ្លងកាត់តុលាការទេ។ ជាមួយច្បាប់បារាំងថ្មី មេប៉ូលិសនៅតែជាអ្នកសម្រេចដដែល ដោយគ្រាន់តែសុំការយល់ព្រមពីចៅក្រម និងទៅពិគ្រោះជាមួយរដ្ឋអាជ្ញាប៉ារីស ព្រមទាំងប្រើពាក្យទៅមើល ជំនួសពាក្យថាឆែកឆេរ។
នៅសហរដ្ឋអាមេរិក ច្បាប់ Patriot Act អនុម័តនៅឆ្នាំ២០០១ បានផ្តល់អំណាចឱ្យFBI ឆែកឆេរដោយមិនបាច់សុំការអនុញ្ញាតពីតុលាការ ទោះបីក្នុងករណីអវត្តមានម្ចាស់ផ្ទះក៏ដោយ។ មុននឹងធ្វើវិសោធនកម្មវិញ។ ប៉ុន្តែច្បាប់បារាំង មានលក្ខខណ្ឌច្បាស់លាស់ជាង ការឆែកឆេរត្រូវធ្វើក្រោមវត្តមានម្ចាស់ផ្ទះ ឬអ្នកតំណាង ហើយក្នុងករណីអវត្តមាន ត្រូវមានសាក្សីឯករាជ្យពីរនាក់។
បិទទីតាំងសាសនា
ក្នុងក្របខ័ណ្ឌច្បាប់ថ្មី ក៏ដូចស្ថិតក្នុងភាពអាសន្នដែរ មេប៉ូលិសអាចបញ្ជាឱ្យបិទកន្លែងសាសនាណាមួយ ដែលមានផ្សព្វផ្សាយ ឃ្លាឃ្លោង សំណេរ គំនិត ក្បួនច្បាប់ ឬខ្លឹមសារជាការញុះញង់ឱ្យមានអំពើហិង្សា ការស្អប់ខ្ពើមគ្នា ការរើសអើង និងបែបភេរវនិយម ក្នុងរយៈពេល៤៨ម៉ោង ទល់នឹង៦ខែកាលពីមុន។ ទង្វើបែបនេះមានស្ទើរនៅគ្រប់ប្រទេសក្នុងអឺរ៉ុប។ កាលពីខែកុម្ភៈដើមឆ្នាំ អាល្លឺម៉ង់បានបិទវិហារអ៊ីស្លាមជ្រុលនិយមមួយ។ ការបិទទីតាំងសាសនាមិនមែនជាអាទិភាពរបស់ច្បាប់ប្រឆាំងភេរវកម្មទេ តែជាកម្មវត្ថុចំបងមួយនៃការការពារ ដែលបារាំងមានយុទ្ធសាស្ត្រមិនគ្រប់គ្រាន់ពីមុនមក។
ឃាត់ខ្លួនឱ្យនៅក្នុងគេហដ្ឋាន
ខុសពីច្បាប់អាសន្ន ច្បាប់ប្រឆាំងនឹងភេរវកម្មថ្មី នឹងជំនួសការឃាំងឱ្យនៅតែក្នុងគេហដ្ឋាន ទៅជាវិធានការតាមដានបុគ្គល ដោយពង្រីករង្វង់ឃុំឃាំងក្នុងផ្ទះ ទៅជាការឃុំឃាំងក្នុងភូមិ ឬដល់កំរិតខេត្តផងប្រសិនបើជនជាប់សង្ស័យនោះព្រមពាក់ខ្សែជើងអេឡិចត្រូនិក។
ត្រង់ចំណុចនេះ ច្បាប់អង់គ្លេសមានលក្ខណៈតឹងតែងជាងឆ្ងាយណាស់។ ច្បាប់ឆ្នាំ២០១១ អនុញ្ញាតឱ្យរដ្ឋមន្ត្រីក្រសួងមហាផ្ទៃសម្រាចឃុំឃាំងឱ្យនៅតែក្នុងផ្ទះបុគ្គលណាម្នាក់ ឬច្រើននាក់ ចេញក្រិត្យឱ្យនៅជាមួយនរណា ដើរបានត្រឹមណា និងកំរិតសិទ្ធិនិយាយស្រ្តី ឬសិទ្ធទាក់ទងជាមួយមនុស្សផ្សេងទៀត។
ត្រួតពិនិត្យអត្តសញ្ញាណនៅព្រំដែន
គម្រោងច្បាប់បានពង្រីកដែនអំណាចរបស់ប៉ូលិសក្នុងការត្រួតពិនិត្យអត្តសញ្ញាណ នៅតាមព្រំដែនដោយមិនបាច់ឆ្លងកាត់តុលាការ ដូចជាឆែកនៅជិតចំណតរទេះភ្លើង (មិនមែនតែខាងក្នុង) និងនៅរង្វង់២០គីឡូម៉ែត្រពីអាកាសយានដ្ឋានអន្តរជាតិ។ ច្បាប់នេះមានកំរិតប្រហាក់ប្រហែលគ្នាទាំងអស់នៅអឺរ៉ុប លើកលែងតែក្រុមប្រទេសអឺរ៉ុបកណ្តាល ដែលភាពតឹងតែងខ្លាំងមែនទែន។
មណ្ឌលឃុំឃាំង
អ្នកសាធារណរដ្ឋមួយចំនួនធំបានបន្ទោសច្បាប់ប្រឆាំងភេរវកម្មថ្មីនេះថាមានរាក់កំផែល។ ពួកគេចង់បង្កើតមណ្ឌលឃុំឃាំងថ្មី ដើម្បីឱ្យសក្តិសមទៅនឹងស្ថានការណ៍។ នៅសហរដ្ឋអាមេរិក ច្បាប់បើកសិទ្ធិឱ្យមានចោទប្រកាន់ជនសង្ស័យដោយគ្មានកំរិតចំនួនមនុស្ស និងអាចបញ្ជូនចូលពន្ធនាគារដោយមិនឆ្លងកាត់តុលាការ។ នៅអង់គ្លេស ការឃុំឃាំងជនសង្ស័យពីបទភេរវកម្ម ដោយគ្មានការចោទប្រកាន់ អាចមានរយៈពេលដល់ទៅ២៨ថ្ងៃ។
បញ្ជូនទៅស្រុកដើមជនបរទេសជាប់បញ្ជីខ្មៅភេរវកម្ម
រដ្ឋាភិបាលធ្លាប់បានបណ្តេញជនអ៊ីស្លាមជ្រុលនិយមបរទេសជាច្រើននាក់ហើយ (ប្រមាណ៦០នាក់ កាលពីឆ្នាំ២០១២។ ឯក្នុងក្របខ័ណ្ឌច្បាប់ថ្មី សភាបារាំងបានច្រានចោលសំណើរបស់បក្សសាធារណរដ្ឋ និងបក្សរណសិរ្សជាតិ បញ្ជូនជាស្វ័យប្រវត្តិរាល់គ្រប់ជនបរទេសជាប់ក្នុងបញ្ជីអ្នកជ្រុលនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ