នៅរុស្ស៊ី ពួកប្រឆាំងបានធ្វើបាតុកម្មតវ៉ាក្នុងថ្ងៃខួបកំណើតលោកពូទីន
ពលរដ្ឋរុស្ស៊ីរាប់ពាន់នាក់ ដែលជាបក្សពួកខាង មេប្រឆាំងនឹងអំពើពុករលួយនៅរុស្ស៊ី ឈ្មោះ Alexei Navalny ដែលកំពុងជាប់ក្នុងការឃុំឃាំង បាននាំគ្នា ធ្វើបាតុកម្មនៅទូទាំងប្រទេសរុស្ស៊ី ក្នុង ថ្ងៃសៅរិ៍ ៧តុលា ប្រឆាំងនឹងលោកប្រធានាធិបតី វ៉្លាឌីមៀរ ពូទីន ដែលកាន់អំណាចជាង១៧ឆ្នាំហើយ គឺ នៅចំថ្ងៃ ខួបកំណើតគាត់ទី ៦៥ និង ការដែលនៅសល់តែ ៥ ខែ ដល់ពេលបោះឆ្នោតប្រធានាធិបតីនៅរុស្ស៊ី។
ចុះផ្សាយនៅថ្ងៃ៖
តាំងពីមុនចាប់ផ្តើមក្បួនយាត្រាល្ងាចម្សិលមិញ ក្នុងក្រុង Saint-Petersbourg ជាក្រុងកំណើត លោកពូទីន គឺ មានអ្នកស្រុករុស្ស៊ីបានរួមប្រជុំគ្នាទៅហើយនៅតាមក្រុងចំនួន ៨០ ឯណោះ នៃប្រទេសរុស្ស៊ី ទៅតាមសេចក្តីអំពាវនាវ របស់លោក Alexei Navalny មេប្រឆាំងសែនប្រជាប្រិយ អាយុ ៤១ ឆ្នាំ ល្បី ដោយ អត្ថបទគាត់ប្រឆាំងនឹងអំពើពុករលួយ លុះទាល់តែត្រូវអាជ្ញាធរចាប់ខ្លួន ដល់ទៅរាប់សិបដង។ ចំណែកនៅរដ្ឋធានីមូស្គូ មានបាតុករជាង១.០០០ នាក់ ដែលភាគច្រើនជាយុវជន បានទៅជួបជុំគ្នានៅលើ ទីលាន នាម មហាកវីរុស្ស៊ី Pouchkine និងនៅតាមសរសៃផ្លូវដ៏ធំចំកណ្តាលក្រុង ដែលបែកចេញពីវិមាន ក្រេមឡាំងតែម្តង ទោះបីមានការហាមឃាត់ ពីខាងសាលាក្រុងក្តី។
ពួកគេ បាននាំគ្នាស្រែកបន្លឺឡើងនូវ ឃ្លាដៀមដាម បែបយ៉ាង “ជូនពរថ្ងៃកំណើតឬពូទីន ជាក្តីអាម៉ាស់ របស់ប្រទេសរុស្ស៊ី “។ នៅពីមុខមេក្រូអ្នកកាសែត នារី Maria Antonienko ជានិស្សិតអាយុ ១៨ ឆ្នាំ បាននិយាយដូចតទៅថា ខ្ញុំចង់បញ្ឈប់សកម្មភាពមិនគប្បី របស់ពូទីន។ ខ្ញុំចង់ឲ្យរុស្ស៊ីប្រែក្លាយជាប្រទេសអឺរ៉ុប។ ខ្ញុំចង់រស់នៅដោយ មានសេរីភាព។ ខ្ញុំមិនត្រូវការទេ របបដូចនៅអាស៊ី ឬ កូរ៉េខាងជើង។ ចំណែកនិស្សិត Vladimir Nemykh អាយុ ១៨ ឆ្នាំដែរ អះអាងថា ខ្ញុំមិនខ្លាចត្រូវប៉ូលិសចាប់ខ្លួនឡើយ បើពួកគេចាប់រូបខ្ញុំ នោះខ្ញុំត្រៀមដេក ក្នុងគុកប៉ុន្មានយប់ក៏ដោយ ដ្បិតខ្ញុំយល់ថាការប្រឆាំងរបស់ខ្ញុំគឺត្រឹមត្រូវ។
រីឯបុរស Orest Tchentchessov អាយុ ៤៣ ឆ្នាំ ដែលធ្លាប់បានត្រូវឃាត់ខ្លួនទៅហើយ ក្នុងបាតុកម្មកាលពីប៉ុន្មានខែមុន បានពន្យល់ថា ខ្ញុំមិនអាចមិនមកចូលរួម ក្នុងមេទ្ទិញលើកនេះឡើយ។ ខ្ញុំផ្ទាល់មិនគាំទ្រ លោក Navalny ទេ ប៉ុន្តែខ្ញុំមកទីនេះ ពីព្រោះខ្ញុំយល់ថា គាត់មានសិទ្ធិឈរឈ្មោះជាបេក្ខជន ចូលប្រឡូកក្នុងការបោះឆ្នោតថ្ងៃមុខ។ ទោះយ៉ាងណាក្តី ក៏គជប ដោយយោងលើច្បាប់រុស្ស៊ី បានប្រកាសតាំងពីខែមិថុនាម៉្លេះ ថា មេប្រឆាំង ឈ្មោះ Navalny មិនអាចក្លាយជាបេក្ខជន នៅក្នុងការបោះឆ្នោតឆ្នាំក្រោយឡើយ ព្រោះគាត់ជាប់ឈ្មោះជាទណ្ឌិត តាមបទ គៃបន្លំលុយរដ្ឋ។
តាមតួលេខប៉ូលិស បាតុករទាំងនោះ មានចំនួនប្រមាណ ៧០០ នាក់។ អាជ្ញាធរបានចាត់វិធានការសន្តិសុខ យ៉ាងម៉ឺងម៉ាត់ តាមវិធីពង្រាយកងកម្លាំងខាងប្រឆាំងកុប្បកម្ម ឲ្យរក្សាសណ្តាប់ធ្នាប់។ មហាផ្ទៃមូស្គូ សង្កត់ ធ្ងន់ថា ក្នុងមេទ្ទិញដែលបានប្រព្រឹត្តទៅ អស់ ២ម៉ោងកន្លះ គ្មានការឃាត់ខ្លួនបាតុករណាម្នាក់ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ