សកម្មជនការពារសិទ្ធិមនុស្ស ជាប់ក្នុងសំណាញ់ច្បាប់តួកគី
រដ្ឋអាជ្ញាតួកគី បានទាមទារឲ្យតុលាការផ្តន្ទាទោស លើសកម្មជនការពារសិទ្ធិមនុស្សនៅតួកគី។ តាមការចុះផ្សាយរបស់ទីភ្នាក់ងារព័ត៌មានតួកគី ឈ្មោះ Dogan រដ្ឋអាជ្ញាតួកគីបានចោទប្រកាន់សកម្មជនការពារសិទ្ធិមនុស្សចំនួន ១១នាក់ ពីបទការពារក្រុមភេរវជនប្រដាប់អាវុធ និងទាមទារឲ្យតុលាការផ្តន្ទាទោសពួកគេឲ្យជាប់ពន្ធនាគារពី៧ ទៅ ១៥ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងបទចោទប្រកាន់ របស់រដ្ឋអាជ្ញាតួកគី សកម្មជនការពារសិទ្ធិមនុស្សទាំង១១នាក់ ត្រូវបានចោទពីបទប៉ុនប៉ងព្យាយាមបង្កើតឲ្យមានចលាចល នៅក្នុងសង្គម។ ជាបទចោទប្រកាន់ដែលតុលាការតួកគីធ្លាប់បានអនុវត្តកន្លងមក ប្រឆាំងនឹងបាតុករ ប្រឆាំងរដ្ឋាភិបាលតួកគី កាលពីឆ្នាំ ២០១៣។
ក្នុងចំណោមមនុស្ស១១ នាក់ ដែលត្រូវរដ្ឋអាជ្ញាចោទប្រកាន់ លើកនេះ មាន១នាក់ ជាប្រធានរបស់អង្គការការពារសិទ្ធិមនុស្ស Amnesty International នៅតួកគី ដែលត្រូវបានប៉ូលិសតួកគីចាប់ឃុំខ្លួន តាំងពី ខែមិថុនា ពីបទមានជាប់ទាក់ទងនឹងផែនការធ្វើរដ្ឋប្រហារមិនបានសម្រេច កាលពីពាក់កណ្តាលខែ កក្កដា កន្លងទៅ។ ចំណែក ជនចោទប្រកាន់ ១០នាក់ផ្សេងទៀត ដែលនៅក្នុងនោះមាននាយិការរបស់អង្គការ Amnesty International នៅតួកគីផង ត្រូវបានប៉ូលិសក្តោបក្រសោបចាប់ខ្លួន នៅពេលពួកគេចូលរួម នៅក្នុងសិក្ខាសាលាមួយរៀបចំដោយ Amnesty International។ ក្នុងចំណោមនោះជនត្រូវចោទប្រកាន់ មានផងដែរ ជនជាតិអាល្លឺម៉ង់ ១នាក់ និងជនជាតិស៊ុយអែត ១នាក់ ដែលជាគ្រូបណ្តុះបណ្តាលផ្នែកសន្តិសុខព័ត៌មានវិទ្យា និងគ្រប់គ្រងទិន្នន័យ នៅក្នុងសិក្ខាសាលា រៀបចំ ធ្វើ នៅទីក្រុងអ៊ីស្តង់ប៊ូល កាលពីដើមខែកក្កដា។
ក្រុមសកម្មជនការពារសិទ្ធិមនុស្ស ត្រូវរដ្ឋអាជ្ញាចោទប្រកាន់ថា បានជួយក្រុមភេរវនិយម។ ប៉ុន្តែ ទីភ្នាក់ងារព័ត៌មានDoganមិនបានបញ្ជាក់ឈ្មោះអង្គការភេរវនិយមនោះទេ។ ជាទូទៅ នៅតួកគី អាជ្ញាធរតួកគីបានចាត់ទុក ទាំងចលនារបស់មេដឹកនាំប្រឆាំង Gülen ក្រុមគួដ នៅតួកគី ហើយនិងក្រុមឆ្វេងនិយម ថា ជាក្រុមភេរវនិយម។ លោកប្រធានាធិបតីអ៊ែរដូហ្កាន បានចោទប្រកាន់រួចហើយ ថា ចលនារបស់មេដឹកនាំប្រឆាំង Gülen ដែលនិរទេសនៅបរទេស ជាអ្នកផ្តួចផ្តើម ឲ្យមានរដ្ឋប្រហារយោធាមិនបានសម្រេច នៅខែកក្កដា។
នៅពេលប៉ូលិសតួកគីចាប់ខ្លួន ប្រធានរបស់អង្គការ Amnesty International ប្រចាំនៅតួកគី និងសកម្មជនការពារសិទ្ធិមនុស្ស អង្គការ Amnesty Internationalអន្តរជាតិ ធ្លាប់បានបរិហារម្តងហើយពីជញ្ជីងលំអៀងរបស់តុលាការតួកគី។ ការចាប់ខ្លួនជនជាតិអាល្លឺម៉ង់ កាន់តែច្រើន ដោយអាជ្ញាធរតួកគី នៅក្រោយរដ្ឋប្រហារ យោធា មិនបានសម្រេច បានបណ្តាលឲ្យមានប្រតិកម្មខឹងច្រលោត ពីសំណាក់ រដ្ឋាភិបាលអាល្លឺម៉ង់ ដែលបានគំរាមសើរើឡើងវិញ ទំនាក់ទំនងសេដ្ឋកិច្ច និងនយោបាយជាមួយ តួកគី ដែលធ្លាប់ជាប្រទេសដៃគូប្រវត្តិសាស្រ្តរបស់អាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ