សង្រ្គាមប៉ាកកាកំពុងបន្តមានយ៉ាងផុសផុលរវាងរដ្ឋអំណាចអេស្ប៉ាញ និងរដ្ឋអំណាចស្វយ័តកាតាឡូញ៉ា
ចុះផ្សាយនៅថ្ងៃ៖
ស្តាប់ - ០៧:០៩
នៅថ្ងៃអង្គារ ទី១០ តុលានេះ ប្រមុខដឹកនាំតំបន់កាតាឡូញ៉ាលោក Carles Puigdemont ចូលខ្លួនថ្លែងនៅក្នុងសភាកាតាឡូញ៉ា។ អន្តរាគមន៍របស់លោក Puigdemont បានធ្វើឡើង បន្ទាប់ពីតំបន់ស្វយ័តរបស់អេស្ប៉ាញមួយនេះបានរៀបចំបោះឆ្នោតប្រជាមតិដើម្បីទាមទារឯករាជ្យផ្តាច់ខ្លួនចេញពីការគ្រប់គ្រងរបស់អេស្ប៉ាញកាលពីថ្ងៃទី១ តុលា។ ការរៀបចំបោះឆ្នោតប្រជាមតិដែលទីក្រុងម៉ាឌ្រីដមិនទទួលស្គាល់ ព្រមទាំងបានព្រមានដកសិទ្ធិស្វ័យភាពពីតំបន់កាតាឡូញ៉ានៅក្នុងករណីណាដែលតំបន់មួយនេះហ៊ានប្រកាសឯករាជ្យដោយខ្លួនឯង។ ចំណែកសហភាពអឺរ៉ុបបន្តបដិសេធមិនចូលខ្លួនអន្តរាគមន៍ដោយចាត់ទុកវិបត្តិមួយនេះថាជារឿងផ្ទៃក្នុងរបស់អេស្ប៉ាញ។
អន្តរាគមន៍របស់ប្រមុខដឹកនាំតំបន់កាតាឡូញ៉ាលោក Carles Puigdemont នៅក្នុងសភាតំបន់ពេលនេះ គឺជាបទអន្តរាគមន៍មួយដែលគ្រប់គ្នាកំពុងទន្ទឹងរង់ចាំជាទីបំផុត ពិសេសពលរដ្ឋកាតាឡូញ៉ា និងរដ្ឋអំណាចកណ្តាលនៅអេស្ប៉ាញ។ នៅក្នុងបទអន្តរាគមន៍នោះ លោក Puigdemont និយាយពីស្ថានការណ៍នយោបាយទូទៅនៅក្នុងតំបន់កាតាឡូញ៉ា ពិសេសពីលទ្ធផលបោះឆ្នោតប្រជាមតិស្តីពីការទាមទារឯករាជ្យរបស់ពលរដ្ឋកាតាឡូញ៉ាកាលពីថ្ងៃទី១ តុលាកន្លងទៅ។
បន្ទាប់មក លោក Puigdemont អាចប្រកាស ឬមិនប្រកាសឯករាជ្យតំបន់កាតាឡូញ៉ាជាឯកតោភាគី។ សូមជម្រាបជូនថា នៅក្នុងកិច្ចសន្ទនាជាមួយទូរទស្សន៍សាធារណៈនៅកាតាឡូញ៉ានាថ្ងៃអាទិត្យ ទី៨ តុលាថ្មីៗនេះ លោក Puigdemont បានបញ្ជាក់ជាថ្មីថា លោកនឹងប្រកាសឯករាជ្យតំបន់កាតាឡូញ៉ា ប្រសិនបើរដ្ឋអំណាចកណ្តាលអេស្ប៉ាញមិនព្រមចរចា និងមិនយល់ព្រមទទួលសំណើរបស់លោកដែលសុំឲ្យមានអន្តរាគមន៍ពីភាគីទី៣ ដើម្បីដោះស្រាយបញ្ហាទេនោះ។
តែរដ្ឋអំណាចកណ្តាលអេស្ប៉ាញ និងរូបនាយករដ្ឋមន្រ្តីអេស្ប៉ាញធ្លាប់បានបញ្ជាក់ និងព្រមានម្តងជាពីរដងថា រដ្ឋអំណាចអេស្ប៉ាញមិនចរចាជាដាច់ខាត ដរាបណារដ្ឋអំណាចកាតាឡូញ៉ាមិនដកគំនិតចង់បានឯករាជ្យចេញវិញទេ ព្រមទាំងព្រមានត្រង់ៗថា បើតំបន់កាតាឡូញ៉ាហ៊ានប្រកាសឯករាជ្យជាឯកតោភាគី រដ្ឋអំណាចអេស្ប៉ាញនឹងដកសិទ្ធិស្វ័យភាពពីតំបន់កាតាឡូញ៉ាវិញ។
សេណារីយ៉ូក្នុងករណីដែលកាតាឡូញ៉ាប្រកាសឯករាជ្យ
ក្នុងករណីដែលលោក Carles Puigdemont ប្រកាសឯករាជ្យតំបន់កាតាឡូញ៉ា ភាពប្រេះឆាមានកាន់តែខ្លាំង និងកាន់តែធ្ងន់ធ្ងររវាងរដ្ឋអំណាចកណ្តាលអេស្ប៉ាញ និងរដ្ឋអំណាចតំបន់កាតាឡូញ៉ា។ វិបត្តិនយោបាយរវាងអេស្ប៉ាញ និងតំបន់ស្វយ័តកាតាឡូញ៉ាហាក់បានឈានមកដល់ផ្លូវទាល់មួយដែលគ្មានច្រកចេញដោយភាគីម្ខាងៗបន្តប្រកាន់ជំហរតឹងរឹងរៀងៗខ្លួន។ នៅម្ខាង ប្រមុខដឹកនាំកាតាឡូញ៉ាលោក Carles Puigdemont នៅតែចចេសចង់បានឯករាជ្យ នោះបើទោះបីជាលោកបានទុកផ្លូវចរចា និងចង់ឲ្យមានអន្តរាគមន៍ពីភាគីទី៣។ ចំណែកនៅម្ខាងទៀត រដ្ឋអំណាចកណ្តាលអេស្ប៉ាញបានបដិសេធយ៉ាងដាច់អហង្ការដោយមិនចង់ឮ និងមិនចង់ឃើញតំបន់ស្វយ័តកាតាឡូញ៉ាផ្តាច់ខ្លួនចេញពីការគ្រប់គ្រងរបស់ខ្លួន។
នៅត្រង់ចំណុចនេះ ថ្នាក់ដឹកនាំអេស្ប៉ាញបានលើកយកច្បាប់រដ្ឋធម្មនុញ្ញត្រង់មាត្រាទី១៥៥ ទៅសំអាងដែលថា ទីក្រុងម៉ាឌ្រីដមានសិទ្ធិដកស្វ័យភាពពីតំបន់ណាមួយ និងយកតំបន់នោះមកគ្រប់គ្រងវិញ ប្រសិនបើតំបន់ស្វយ័តនោះបំពានច្បាប់រដ្ឋធម្មនុញ និងធ្វើឲ្យប៉ះពាល់ដល់ផលប្រយោជន៍ទូទៅរបស់អេស្ប៉ាញ។ តែបញ្ហានៅត្រង់ថា មាត្រាទី១៥៥ ហាក់បានបង្កប់ដោយភាពស្រពិចស្រពិលមួយចំនួនទាក់ទងនឹងការព្យួរដំណើរការរបស់រដ្ឋាភិបាល ឬមួយក៏ការរំលាយសភាតំបន់ស្វយ័តដែលជាប់ពាក់ព័ន្ធ។ ម្យ៉ាងទៀត ការអនុវត្តន៍នីតិវិធីមួយនេះក៏ត្រូវឆ្លងកាត់ច្រើនដំណាក់ការរហូតដល់ការបោះឆ្នោតនៅព្រឹទ្ធសភាអេស្បាញ។
យ៉ាងណាក៏ដោយ និងក្នុងករណីណាដែលតំបន់កាតាឡូញ៉ាប្រកាសឯករាជ្យ រដ្ឋាភិបាលអេស្ប៉ាញក៏អាចប្រើមាត្រាទី១១៦ មុននឹងមាត្រាទី១៥៥ នៃច្បាប់រដ្ឋធម្មនុញ្ញ។ មាត្រាទី១១៦ គឺការប្រកាសអាសន្ននៅតំបន់កាតាឡូញ៉ា។ កន្លងមក លោកប្រមុខរដ្ឋាភិបាលអេស្ប៉ាញ Mariano Rajoy មិនដែលបានលើកមាត្រាទី ១១៦ ទៅនិយាយទេ តែលោកធ្លាប់បានបញ្ជាក់ថា លោកមិនញញើតនឹងចាត់វិធានការគ្រប់បែបយ៉ាងដែលស្របច្បាប់ទេ។
តើតំបន់កាតាឡូញ៉ាអាចនឹងរស់នៅ និងកសាងអនាគតដោយខ្លួនឯងបានដែរឬទេ?
ពិតមែនតែកាតាឡូញ៉ាជាតំបន់ស្វយ័តរបស់អេស្ប៉ាញមែន តែជាតំបន់ដែលស្ថិតក្នុងតំបន់ចាយប្រាក់អឺរ៉ូដូចនៅក្នុងប្រទេសអេស្ប៉ាញទាំងមូលដែរ។ តែបើធៀបនឹងតំបន់ស្វយ័តផ្សេងទៀតនៅអេស្ប៉ាញ កាតាឡូញ៉ាជាតំបន់ដែលមានសក្តានុពលសេដ្ឋកិច្ចដ៏សំខាន់ជាងគេរបស់អេស្ប៉ាញ។ ចំពេលដែលពលរដ្ឋអេស្ប៉ាញទូទៅទទួលបានប្រាក់បៀវត្សប្រចាំឆ្នាំជាមធ្យមចំនួន ២២ ៩៧៨អឺរ៉ូ ពលរដ្ឋកាតាឡូញ៉ាទទួលបានជាមធ្យមចំនួន ២៩ ៧២៨អឺរ៉ូ។ កាតាឡូញ៉ាជាតំបន់សេដ្ឋកិច្ចទី៥ និងជាប្រភពចំណូលដ៏សំខាន់របស់អេស្ប៉ាញ ព្រោះជាតំបន់ដែលតាំងដោយរោងចក្រ សហគ្រាសគ្រប់ប្រភេទ ដូចយ៉ាងគីមី វាយនភ័ណ្ឌ អេឡិចត្រូនិក ម្ហូបអាហារ រថយន្ត ឬមួយក៏គ្រឿងម៉ាស៊ីនគ្រប់ប្រភេទ។
អ្វីដែលកាតាឡូញ៉ាមាននាពេលបច្ចុប្បន្ន ពិតជាគ្រប់គ្រាន់ដើម្បីឲ្យតំបន់មួយនេះអាចរស់នៅ និងកសាងអនាគតដោយខ្លួនឯងផ្តាច់ចេញពីការគ្រប់គ្រងរបស់រដ្ឋអំណាចកណ្តាលអេស្ប៉ាញ។ តែសំណួរដែលកំពុងចោទពេលនេះគឺថា បើកាតាឡូញ៉ាប្រកាសឯករាជ្យផ្តាច់ខ្លួនពីអាណាព្យាបាលអេស្ប៉ាញ តើស្ថានភាពសេដ្ឋកិច្ចរបស់តំបន់កាតាឡូញ៉ានៅតែដដែល ឬមួយក៏មានការផ្លាស់ប្តូរ ហើយបើមានការផ្លាស់ប្តូរ តើផ្លាស់ប្តូរក្នុងទិសដៅមួយណា។ លោករដ្ឋមន្រ្តីសេដ្ឋកិច្ចអេស្ប៉ាញបានព្រមានទុកមុនថា បើកាតាឡូញ៉ាប្រកាសឯករាជ្យ តំបន់មួយនេះនឹងខ្ទាតចេញពីសមាជិកអឺរ៉ុប និងចេញពីតំបន់ចាយប្រាក់អឺរ៉ូ ហើយផលិតផលសរុបក្នុងស្រុករបស់កាតាឡូញ៉ាអាចនឹងធ្លាក់ចុះពី ២៥ ទៅ ៣០%។
ពិតណាស់ថាខណៈនេះ សង្រ្គាមប៉ាកការវាងរដ្ឋអំណាចអេស្ប៉ាញ និងរដ្ឋអំណាចកាតាឡូញ៉ាហាក់មិនសូវប៉ះពាល់លើផ្នែកសេដ្ឋកិច្ចប៉ុន្មានទេ តែបើវិបត្តិមួយនេះអូសបន្លាយយូរគ្មានច្រកចេញ និងការធ្វើពហិការមិនទិញផលិផលកាតាឡូញ៉ាពីពលរដ្ឋអេស្ប៉ាញទូទៅ ផលវិបាកសេដ្ឋកិច្ចនឹងកើតមានដោយចៀសមិនរួច។ ចូរកុំភ្លេចថា ពលរដ្ឋអេស្ប៉ាញភាគច្រើនបានប្រឆាំងនឹងការទាមទារឯករាជ្យរបស់ពលរដ្ឋកាតាឡូញ៉ា។ ទន្ទឹមគ្នានេះ ភាពស្រពិចស្រពិលផ្នែកនយោបាយនៅកាតាឡូញ៉ានឹងអាចធ្វើឲ្យក្រុមអ្នកវិនិយោគកាតាឡូញ៉ា និងបរទេសប្តូរទីតាំងទៅរកស៊ីនៅកន្លែងផ្សេង។ បើតាមមើលទៅ ភាពប្រទូស្រ្តាយរវាងរដ្ឋអំណាចអេស្ប៉ាញ និងរដ្ឋអំណាចកាតាឡូញ៉ាអាចនឹងអូសបន្លាយយូរដោយគេនៅមិនទាន់អាចដឹងពីទីបញ្ចប់របស់វា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ