ការបោះឆ្នោតប្រធានាធិបតីដ៏កម្រ ក្នុងលំហអាស៊ីកណ្តាល នៃអតីតសហភាពសូវៀត
កៀហ្ស៊ីស៊ីស្ថាន ជារដ្ឋឯករាជ្យ ដែលខុសពី ៤ ប្រទេសទៀត នៃតំបន់អាស៊ីកណ្តាល ជាទី ដែលប្រធានាធិបតី តែងនៅកាន់អំណាចពេញមួយជីវិត ក្នុងថ្ងៃអាទិត្យ ១៥តុលា នឹងធ្វើការបោះឆ្នោតត្រង់ ផ្ទាល់រើសប្រធានាធិបតីថ្មី ដើម្បីប្រតិបត្តិ ការផ្ទេរអំណាចយ៉ាងស្រទន់ ក្នុងបរិយាកាសដែលនាំឲ្យគេ ចង់ ឃើញ មិនធ្លាប់មាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
កៀហ្ស៊ីស៊ីស្ថាន ល្បីជាប្រទេសប្រជាធិបតេយ្យជាងគេ ក្នុងចំណោម ៥ អតីតសាធារណរដ្ឋសូវៀត តំបន់អាស៊ីកណ្តាល ទោះបី ក្នុង២៥ឆ្នាំនៃឯករាជ្យខ្លួន ធ្លាប់បានឆ្លងកាត់បដិវត្តន៍ពីរលើក គឺក្នុងឆ្នាំ២០០៥ និង ២០១០ ព្រមទាំង រលកកុប្បកម្មជាច្រើនលើក ហែហមទៅដោយអំពើហិង្សាយ៉ាងខ្លាំងក្លា តម្រង់ប្រឆាំង ជាពិសេស នឹងជនជាតិភាគតិចអ៊ូសបេក ក្តី។
ជាតុល្យាការនៃការបោះឆ្នោតប្រធានាធិបតី ថ្ងៃអាទិត្យស្អែក រដ្ឋនេះសង្ឃឹមក្លាយជាសាក្សីនៃការផ្ទេរអំណាច ដោយសន្តិវិធី ពីដៃប្រធានាធិបតីផុតអាណត្តិ ទៅក្នុងដៃប្រធានាធិបតីឈ្នះឆ្នោត។
ដោយហេតុថា មានបេក្ខជនចូលប្រឡូកដល់ទៅ១១ នាក់ បានជា គ្មាននរណាម្នាក់ ប្រាកដថានឹងឈ្នះឆ្នោត តាំងពីជុំទី១ ឡើយ។ ម៉្លោះហើយ បានជាការដែលអាចនឹងប្រព្រឹត្តទៅជុំទី២ គឺនាំឲ្យអ្នកស្រុកម្ចាស់ឆ្នោត ជាច្រើនព្រួយបារម្ភ ចំពោះការមិនទទួលស្គាល់លទ្ធផលជុំទី១នោះ លុះទាល់តែអាចបោកបក់ជារលកហិង្សា។
គួរនិយាយថា កៀហ្ស៊ីស៊ីស្ថាន ជាប្រទេសតែមួយគត់លើផែនដី ដែលធ្លាប់មានមូលដ្ឋានយោធាអាមេរិកាំងផង មូលដ្ឋានយោធារុស្ស៊ីផង។ ក្នុងឆ្នាំ ២០០១ ក្រោយពីចាប់ផ្តើមអន្តរាគមន៍យោធានៅអាហ្វហ្កានីស្ថាន សរអា បានបង្កើតមូលដ្ឋានយោធាខ្លួន នៅ កៀហ្ស៊ីស៊ីស្ថាន និងមួយទៀតនៅ អ៊ូសបេកគីស្ថានជិតខាង ដែលត្រូវ មតិខ្លះចាត់ទុកជាការបញ្ឈឺចិត្តរុស្ស៊ី ដ្បិតតំបន់នេះ តែងស្ថិតនៅក្រោមឥទ្ធិពលម៉ូស្គូទេតើ។ ប្រធានាធិបតី កៀហ្ស៊ីស៊ីស្ថានបច្ចុប្បន្ន លោក Almazbek Atambayev ក្នុងឆ្នាំ ២០១៤ បានបញ្ជាឲ្យបិទ គឺ មូលដ្ឋាន យោធាអាមេរិកាំង ដូច្នេះ នៅកៀហ្ស៊ីស៊ីស្ថាន បន្តមានអត្ថិភាពខ្លួនដដែល គឺមូលដ្ឋានកងអាកាសរុស្ស៊ី សល់ តាំងពី ជំនាន់សូវៀតមក។
កៀហ្ស៊ីស៊ីស្ថាន តែងមានចំណងស្អិតរមួតជាមួយរុស្ស៊ីលុះទាល់តែពីក្នុងចំណោម បណ្តាជន ៦លាននាក់ នៃប្រទេសនេះ បើតាមស្ថិតិផ្លូវការនៃរដ្ឋាភិបាលរុស្ស៊ី គឺមានដល់ជាង ៦សែននាក់ ហើយតាមតួលេខក្រៅផ្លូវការ គឺមានដល់ ១លាននាក់ដែលធ្វើការនៅរុស្ស៊ី ហើយប្រាក់ដែលពលករទាំងនោះ ផ្ញើទៅផ្គត់ផ្គង់ដល់គ្រួសារខ្លួន នៅស្រុក បូកទាំងពលករកៀហ្ស៊ីសចំណាកស្រុក ដែលធ្វើការនៅកាហ្សាក់ស្ថាន តួកគី នៅតំបន់ ដើមបូព៌ា ផង តាមតួលេខ ធនាគារពិភពលោក គឺ ក្នុងទំហំពី ១ភាគ៤ ទៅ ១ភាគ៣ នៃ ផលិតផលសរុបក្នុងស្រុក ហៅថា GDP ប្រទេសនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ