បារាំង-អ៊ីរ៉ង់៖លោកម៉ាក្រុងពិចារណាទៅទស្សនកិច្ចនៅអ៊ីរ៉ង់តាមការអញ្ជើញរបស់លោករ៉ូហានី
នៅក្នុងប្រទេសបារាំង វិមានប្រធានាធិបតីបានប្រកាសឲ្យដឹងនាថ្ងៃសៅរ៍ ទី១៤ តុលាថា លោកប្រធានាធិបតីអេម៉ានុយអែល ម៉ាក្រុងបានពិចារណាទៅបំពេញទស្សនកិច្ចនៅក្នុងប្រទេសអ៊ីរ៉ង់តាមការអញ្ជើញរបស់សមភាគីអ៊ីរ៉ង់លោកហាសាន រ៉ូនហានី។ ប្រសិនបើលោកម៉ាក្រុងយល់ព្រមជាផ្លូវការតាមការអញ្ជើញរបស់លោករ៉ូហានីមែន នេះជាលើកទី១ គិតតាំងពីឆ្នាំ ១៩៧៦ ដែលមានប្រមុខរដ្ឋបារាំងម្នាក់ដាក់ជើងជាន់ទឹកដីអ៊ីរ៉ង់។ អ្វីជាការកត់សម្គាល់ សំណើរបស់ប្រមុខរដ្ឋអ៊ីរ៉ង់ដូចនេះបានធ្វើឡើង ចំពេលដែលលោកប្រធានាធិបតីអាមេរិកដូណាល់ ត្រាំបានប្រកាសមិនគាំទ្រកិច្ចព្រមព្រៀងនុយក្លេអ៊ែរអ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
ការប្រកាសយ៉ាងដូចនេះរបស់វិមានប្រធានាធិបតីបារាំងបានធ្វើឡើង បន្ទាប់ពីលោកប្រធានាធិបតីបារាំងអេម៉ានុយអែល ម៉ាក្រុង និងសមភាគីអ៊ីរ៉ង់លោកហាសាន រ៉ូហានីបានជួបសន្ទនាគ្នាតាមទូរស័ព្ទនារសៀលថ្ងៃសុក្រ ទី១៣ តុលា។ នៅក្នុងកិច្ចសន្ទនានោះ លោកម៉ាក្រុងបានបញ្ជាក់ធានាប្រាប់សមភាគីអ៊ីរ៉ង់លោករ៉ូហានីពីការគាំទ្រពេញទំហឹងរបស់បារាំងចំពោះកិច្ចព្រមព្រៀងនុយក្លេអ៊ែរដែលអ៊ីរ៉ង់បានចុះហត្ថលេខាជាមួយសហគមន៍អន្តរជាតិកាលពីពាក់កណ្តាលខែកក្កដា ឆ្នាំ ២០១៥។ ជំហររបស់លោកម៉ាក្រុងដូចនេះបានធ្វើឡើង បន្ទាប់ពីសមភាគីអាមេរិកលោកដូណាល់ ត្រាំបានប្រកាសមិនគាំទ្រកិច្ចព្រមព្រៀងនុយក្លេអ៊ែរអ៊ីរ៉ង់។
នៅត្រង់ចំណុចនេះ លោកម៉ាក្រុងបានរម្លឹកថា ការសម្រេចចិត្តរបស់លោកដូណាល់ ត្រាំមិនមែនជាការបិទបញ្ចប់កិច្ចព្រមព្រៀងនុយក្លេអ៊ែរអ៊ីរ៉ង់ទេ និងថា បារាំងរួមជាមួយដៃគូអឺរ៉ុបទាំងអស់នឹងបន្តអនុវត្តកិច្ចសន្យារបស់ខ្លួន។ ទន្ទឹមគ្នានេះនិងក្រៅពីការបន្តអនុវត្តកិច្ចព្រមព្រៀង ប្រមុខរដ្ឋបារាំងក៏បានស្នើឲ្យបន្តកិច្ចសន្ទនាលើសំណុំរឿងផ្សេងទៀតដែលមិនបានចែងនៅក្នុងកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ តែវាចាំបាច់ខ្លាំងណាស់នៅក្នុងកាលៈទេសៈបច្ចុប្បន្ន។ អ្វីដែលលោកម៉ាក្រុងចង់លើកឡើងនោះ គឺក្តីបារម្ភរបស់សហគមន៍អន្តរជាតិទាក់ទងនឹងកម្មវិធីគ្រាប់មីស៊ីលបាលីស្ទិកអ៊ីរ៉ង់ និងបញ្ហាសន្តិសុខនៅក្នុងតំបន់។
បន្ទាប់មក លោកម៉ាក្រុងក៏បានឆ្លៀតប្រាប់សមភាគីអ៊ីរ៉ង់ពីបំណងរបស់បារាំងចង់ធ្វើការជាមួយអ៊ីរ៉ង់នៅក្នុងដំណើរស្វែងរកដំណោះស្រាយនយោបាយយូរអង្វែងឲ្យវិបត្តិស៊ីរី។ វិមានប្រធានាធិបតីអ៊ីរ៉ង់បានបញ្ជាក់ពីគម្រោងទស្សនកិច្ចរបស់លោកប្រធានាធិបតីបារាំងនៅឆ្នាំក្រោយ តែមិនបានប្រាប់ពីថ្ងៃ ខែទេ។ នៅខាងបារាំង វិមានប្រធានាធិបតីមិនបានបញ្ជាក់អ្វីទាំងអស់ គ្រាន់តែថា លោកម៉ាក្រុងបានពិចារណាលើសំណើរបស់លោករ៉ូហានី ហើយបើលោកម៉ាក្រុងយល់ព្រមជាផ្លូវការតាមការអញ្ជើញរបស់លោករ៉ូហានីមែន នេះជាលើកទី១ គិតតាំងពីឆ្នាំ ១៩៧៦ ដែលមានប្រមុខរដ្ឋបារាំងម្នាក់ដាក់ជើងជាន់ទឹកដីអ៊ីរ៉ង់។ ដោយឡែក និងអ្វីដែលជាផ្លូវការ គឺដំណើរទស្សនកិច្ចរបស់លោកប្រមុខការទូតបារាំង Jean-Yves Le Drian នៅអ៊ីរ៉ង់នាប៉ុន្មានសប្តាហ៍ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ