អូទ្រីស៖ការបោះឆ្នោតសភាដែលគណបក្សស្តាំនិយមជ្រុលអាចក្លាយជាដៃគូក្នុងរដ្ឋាភិបាលថ្មី
នៅថ្ងៃអាទិត្យ ទី១៥ តុលានេះ មានប្រជាជនអូទ្រីសប្រមាណជា ៦លាន ៤សែននាក់ត្រូវបានគេអញ្ជើញឲ្យចូលរួមបោះឆ្នោតសភាមុនកាលកំណត់ដើម្បីជ្រើសរើសតំណាងរាស្រ្ត និងប្រមុខរដ្ឋាភិបាលថ្មី។ រូបនាយករដ្ឋមន្រ្តីថ្មីដែលចៀសមិនរួចពីការបង្កើតរដ្ឋាភិបាលថ្មីដោយត្រូវជ្រើសរើសគណបក្សមួយធ្វើជាដៃគូ។ គណបក្សអភិរក្សនិយមរបស់លោក Sebatian Kurz កំពុងនាំមុខគណបក្សស្តាំនិយមជ្រុល និងគណបក្សសង្គមប្រជាធិបតេយ្យនៅក្នុងការបោះឆ្នោតនេះ។
ចុះផ្សាយនៅថ្ងៃ៖
មានអាយុ ៣១ឆ្នាំ លោក Sebatian Kurz ដែលជាប្រធានគណបក្សអភិរក្សនិយមអាចនឹងក្លាយជាប្រមុខដឹកនាំដ៏វ័យក្មេងជាងគេនៅអឺរ៉ុប។ បើអ្វីៗប្រព្រឹត្តទៅដោយរលូន លោក Sebatian Kurz ដែលកំពុងមានប្រៀបជាងបេក្ខជនដទៃទៀតនឹងទទួលបានសម្លេងគាំទ្រលើសគេនៅក្នុងការបោះឆ្នោតពេលនេះ។ តែអ្វីដែលគ្រប់គ្នាកំពុងទន្ទឹងរង់ចាំមើលនោះគឺថា តើគណបក្សមួយណាដែលទទួលបានសម្លេងគាំទ្រលំដាប់ទី២ តើជាគណបក្សស្តាំនិយមជ្រុល ឬមួយក៏គណបក្សសង្គមប្រជាធិបតេយ្យ?។
ចូរកុំភ្លេចថាចង់ ឬមិនចង់ មានគណបក្សមួយក្នុងចំណោមគណបក្សទាំងពីរដែលលោក Sebatian Kurz ត្រូវជ្រើសធ្វើជាដៃគូដើម្បីបង្កើតរដ្ឋាភិបាលថ្មី។ តែគេមិនត្រូវភ្លេចនិយាយទេថា តាំងពីប៉ុន្មានសប្តាហ៍កន្លងទៅ ទំនាក់ទំនងរវាងគណបក្សអភិរក្សនិយមរបស់លោក Sebatian Kurz និងគណបក្សសង្គមប្រជាធិបតេយ្យបានឡើងតានតឹងខ្លាំង។ មូលហេតុ មកពីមានការបែកធ្លាយខ្សែអាត់វីដេអូមួយស្តីពីលោក Sebatian Kurz ដែលគណបក្សអភិរក្សនិយមសង្ស័យលើគណបក្សសង្គមប្រជាធិបតេយ្យជាអ្នកបញ្ចេញ។
សូមជម្រាបជូនថានៅអូទ្រីស រដ្ឋាភិបាលដែលដឹកនាំប្រទេសតាំងពីឆ្នាំ ១៩៤៥ ច្រើនជារដ្ឋាភិបាលចម្រុះរវាងគណបក្សអភិរក្សនិយម និងគណបក្សសង្គមប្រជាធិបតេយ្យ។ តែបើតាមមើលទៅលើកនេះ ភាពជាដៃគូរវាងគណបក្សប្រពែណីទាំងពីរហាក់ដូចជាពិបាកបន្តិច។ ដូច្នេះគណបក្សអភិរក្សនិយមប្រហែលជាគ្មានជម្រើសអ្វីក្រៅពីទៅចាប់ដៃជាមួយគណបក្សស្តាំនិយមជ្រុលទេ។ ក្រុមអ្នកជាតិនិយមមួយនេះអាចនឹងទទួលបានចំណាត់ថ្នាក់ទី២ ជាមួយនឹងសម្លេងគាំទ្រ ២៧%។ គឺជាអត្រាមួយដ៏ខ្ពស់ដែលពួកគេមិនធ្លាប់មានទេនៅក្នុងការបោះឆ្នោតសភាកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ