ពិភពអ្នកអវកាសមកជួបជុំគ្នាបើកមហាសន្និបាតនៅបារាំង
សមាគមអ្នករុករកអវកាសបានរៀបចំបើកមហាសន្និបាតប្រចាំឆ្នាំជាលើកទីមួយ នៅប្រទេស បារាំង គិតចាប់ពីឆ្នាំ១៩៨៥មក។ ជាជំនួបប្រជុំមិត្តភាព និងកិច្ចសហប្រតិបត្តិការអវកាស ដែលមានអវកាសយានិកជាង១០០នាក់ ចូលរួម។ មហាសន្និបាតបានចាប់ផ្តើមពីថ្ងៃ ចន្ទទី ១៦ តុលានេះ រហូតដល់ថ្ងៃសុក្រទី ដើម្បីពិភាក្សាអំពីដំណើរហោះហើរទៅក្នុងអវកាស នាពេលបច្ចុប្បន្ន អំពីបេសកកម្មនាពេលអនាគត យូរអង្វែង និងអំពីការបំផុសក្មេងជំនាន់ក្រោយឱ្យចាប់អារម្មណ៍លើវិទ្យាសាស្ត្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
គឺជាការជួបជុំគ្រួសារអវកាសយានិក ! មកពី១៧ប្រទេស អាមេរិក រុស្ស៊ី កាណាដា បារាំង អឺរ៉ុប អាស៊ី ជប៉ុន តែអវត្តមានចិន នៅឆ្នាំនេះ (ដោយហេតុតែជាន់នឹងមហាសន្និបាតបក្សកុម្មុយនិស្តចិន).. ពួកគេជាសមាជិកសមាគមអ្នករុករកអវកាស Space Explorers ដែលគ្នាទាំងអស់៤០០នាក់ មកពី៣៧ប្រទេស ក្នុងចំណោមអ្នកអវកាសមានជីវិតទាំង៥០០នាក់នៅលើលោក។
សមាគមនេះត្រូវបានបង្កើតឡើង តាំងពីក្នុងសម័យសង្គ្រាមត្រជាក់ តាមគំនិតផ្តួចផ្តើមរបស់អវកាសយានិកអាមេរិក និងរុស្ស៊ី ដែលនៅលើដីមានវប្បធម៌ និងទស្សនៈនយោបាយខុសគ្នាស្រលះ តែនៅពេលឡើងដល់ឋានអវកាសមើលឃើញផែនដីមានតែមួយ។ ដើម្បីអាចចូលក្នុងក្លឹបសមាគមនេះបាន លុះណាតែអ្នកអវកាសនោះ បានធ្វើដំណើរទៅកាន់តារាវិថី ហោះមួយជុំផែនដី យ៉ាងហោចណាស់ក៏ម្តងដែរទើបបាន។
ពេលនេះសមាគមមានសមាជិកច្រើនជំនាន់ ៖ រាប់តាំងពីអវកាសយានិក Owen Garriott ដែលធ្វើដំណើរទៅក្នុងអវកាស នៅឆ្នាំ១៩៧០ ទៅកាន់ស្ថានីយអវកាសទីមួយរបស់អាមេរិក Skylab ឬអវកាសយានិកភេទស្រ្តីជាតិកាណាដា Julie Payette (៥៣ឆ្នាំ) ជាតិបារាំងលោកស្រី Claudine Haigneré (៦០ឆ្នាំ) និងអាចចាត់ទុកថាសមាជិកអវកាសយានិកពៅ លោក Thomas Pesquet (៣៩ឆ្នាំ) ដែលទើបត្រលប់មកពីស្ថានីយ៍អវកាសអន្តរជាតិថ្មីៗ។
ជារៀងរាល់មួយឆ្នាំម្តង សមាគមបានជួបជុំគ្នា ក្នុងទម្រង់ជាមហាសន្និបាត ជាវេទិកាសម្រាប់អ្នកអវកាសនៅលើពិភពលោកទាំងមូលមានឱកាសជជែកពិភាក្សាគ្នាអំពីដំណើរក្នុងអវកាសរបស់ពួកគេផង អំពីការរៀបចំការហោះហើរថ្មី ផែនការអវកាសនាពេលអនាគត និងអំពីលទ្ធភាពនៃកិច្ចសហប្រតិបត្តិរួមគ្នា។ ចំពោះឆ្នាំនេះ មហាសន្និបាតបានប្រព្រឹត្តទៅក្រោមពាក្យស្លោក អវកាសជាអនាគតខ្ញុំ និងមានប្រធានបទពីរ ៖ រុករកពិភពដែលមិនស្គាល់ អ្នកអវកាសបច្ចុប្បន្នគឺ Christophe Colomb និងភាពសំខាន់នៃការការពារផែនដី ដែលហាក់ដូចកំពុងផុយស្រួយ បើគេមើលមកលើអវកាស។ គ្រួសារអ្នកអវកាសបានណាត់ជួបគ្នានៅឆ្នាំ ក្រោយទៀត នៅបេឡារុស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ