ភេរវកម្ម ៖ សហភាពអឺរ៉ុបទម្លាយកញ្ចប់ថវិកាសម្រាប់ការពារសុវត្ថិភាពទីសាធារណៈ
គណៈកម្មការអឺរ៉ុបបានប្រកាសនៅថ្ងៃពុធទី ១៨តុលា ទម្លាយកញ្ចប់ថវិកាប្រមាណជិត ១២០លានអឺរ៉ូ សម្រាប់ជាជំនួយផ្តល់ឱ្យសមាជិករបស់ខ្លួនទាំងអស់ យកទៅប្រើប្រាស់ក្នុងកិច្ចការពារទីលានសាធារណៈ នៅតាមទីក្រុង។ ទីក្រុងសំខាន់ៗដែលបានក្លាយជាផ្ទាំងស៊ីបនៃការវាយប្រហារភេរវកម្មជីហាត កាន់តែខ្លាំងឡើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
នៅក្នុងផែនការសកម្មជួយក្រុងនានា ការពារទីលានសាធារណៈពីការប៉ុនប៉ងធ្វើភេរវកម្ម អឺរ៉ុបត្រៀមកញ្ចប់ថវិកា ១៨,៥លានអឺរ៉ូ រួចជាស្រេច អាចប្រើការបានភ្លាមចាប់ពីឆ្នាំ២០១៧នេះទៅតែម្តង និង១០០លានអឺរ៉ូ សម្រាប់ឆ្នាំ២០១៨។
អឺរ៉ុប បានផ្តួចផ្តើមគំនិតបែបនេះ ក៏ព្រោះគេសង្កេតឃើញការវាយប្រហារភេរវកម្មជីហាត ជាបន្តបន្ទាប់លើហ្វូងមនុស្ស នៅតាមទីធ្លា និងទីប្រជុំជនសាធារណៈ ដូចយ៉ាងការបើកឡានកិនមនុស្សនៅក្រុងនីស ក្នុងថ្ងៃបុណ្យជាតិបារាំង ឆ្នាំ២០១៦- នៅក្រុងប៉ាលឺឡោន ប្រទេសអេស្ប៉ាញ កាលពីថ្ងៃ២១សីហា ២០១៧- នៅឡុងដ៍ នៅមែនឆេស្ទ័រប្រទេសអង់គ្លេស ឬនៅស្តុកខុមប្រទេសស៊ុយអែត ។ល។ និង។ល។
ក្រៅអំពីការផ្តល់ថវិកាជាជំនួយ អឺរ៉ុបក៏ស្នើផងដែរ បង្កើតបណ្តាញជំនាញ ដើម្បីសមាជិកអឺរ៉ុបទាំងអស់អ្នកចែកចាយបទពិសោធន៍ល្អៗឱ្យគ្នាទៅវិញទៅមក ក្នុងវិស័យការពារសុវត្ថិភាពទីលានសាធារណៈ អាកាសយានដ្ឋាន ចំណតរថភ្លើង ពហុកីឡាដ្ឋាន ឬក៏ទីធ្លាសាធារណៈ ដែលអាចនឹងងាយរងការប្រហារ។
ដើម្បីការពារជីវិតប្រជាពលរដ្ឋនៅតាមទីសាធារណៈ អឺរ៉ុបក៏មានផែនការកាត់ផ្តាច់ប្រភពមិនឱ្យពួកភេរវជនអាចស្វែងរកសារធាតុគីមីគ្រោះថ្នាក់សម្រាប់ផលិតជាតិផ្ទុះ និងបំផ្លាញប្រភពហរិញ្ញវត្ថុរបស់ពួកនេះទៀត។
វិធានការរបស់គណៈកម្មការអឺរ៉ុប ក្នុងការប្រយុទ្ធប្រឆាំងនឹងភេរវកម្មនេះ ក៏មានរាប់បញ្ចូលការបង្កើតក្រុមការងារមួយ ក្នុងក្របខ័ណ្ឌប៉ូលិសអាំងទែរប៉ូល ទទួលបន្ទុករក្សាសន្តិសុខសារធាតុគីមី ជីវសាស្ត្រ វិទ្យុសកម្ម និងនុយក្លេអ៊ែរ។
មិនតែប៉ុណ្ណោះ សហភាពអឺរ៉ុបនឹងពង្រឹងកិច្ចសហប្រតិបត្តិការ ជាមួយប្រទេសផ្សេងទៀត ក្រៅរង្វង់អឺរ៉ុប។ ដូចជាលើកទឹកចិត្តឱ្យប្រទេសជាសមាជិកព្រមចរចាជាមួយកាណាដា លើកិច្ចព្រមព្រៀងផ្តល់ទិន្នន័យអ្នកដំណើរឱ្យគ្នាទៅវិញទៅមក ឬស្វែងរកកិច្ចព្រមព្រៀងជាមួយអាល់ហ្សេរី អេហ្ស៊ីប អ៊ីស្រាអែល ហ្ស័កដានី លីបង់ ម៉ារ៉ុក ទុយនីស៊ី និងតួកគី ផ្ទេរទិន្នន័យបែបបុគ្គលរវាងអឺរ៉ុបប៉ូលនិងប្រទេសទាំងនោះ ដើម្បីការពារប្រយុទ្ធប្រឆាំងនឹងភេរវកម្មទម្រង់ធ្ងន់។ ហើយមិនយូរមិនឆាប់ អឺរ៉ុបក៏មានភ្នាក់ងារចារកិច្ចអឺរ៉ុបផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ