ប្រធានាធិបតីអេហ្ស៊ីបបំពេញទស្សនកិច្ចនៅបារាំងដើម្បី នយោបាយ សេដ្ឋកិច្ច និងអាវុធ
ប្រធានាធិបតីអេហ្ស៊ីប បាននិងកំពុងបំពេញទស្សនកិច្ចផ្លូវការ រយៈពេលបីថ្ងៃ នៅប្រទេសបារាំង និងត្រូវមានជំនួបជាលើកដំបូង ជាមួយលោកម៉ាក្រុង ប្រធានាធិបតីបារាំង។ មានសំណុំរឿងស្នូលសំខាន់បី នយោបាយ សេដ្ឋកិច្ច និងយោធា ដែលនឹងត្រូវលើកមកពិភាក្សា ក្នុងជំនួបរវាងប្រធានាធិបតីបារាំង លោក អេម៉ានុយអែល ម៉ាក្រុង និងលោកប្រធានាធិបតីអេហ្ស៊ីប អាប់ឌែល អាល់ស៊ីស៊ី នៅថ្ងៃអង្គារនេះ នៅទីក្រុងប៉ារីស។ បញ្ហាសិទ្ធិមនុស្ស មិនត្រូវបានបំភ្លេចទេ នាឱកាសជំនួបនេះ ប៉ុន្តែដូចជារៀងរាល់លើក សំណុំរឿងនេះមិនត្រូវក្លាយជារំខានដល់ទំនាក់ទំនងដ៏ល្អិតល្មួតរវាងបារាំង និងអេហ្ស៊ីបឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
សំណុំរឿងភេរវនិយម គឺជាអាទិភាពចំបងជាងគេ ព្រោះអេហ្ស៊ីបទើបនឹងរកគ្រោះពីការវាយប្រហារភេរវកម្មជាបន្តបន្ទាប់ បង្កឡើងដោយពួកអង្គការរដ្ឋអ៊ីស្លាម ដូចដែលពួកគេធ្លាប់ធ្វើមកលើបារាំង។ ប្រធានាធិបតីបារាំងនិងអេហ្ស៊ីប ត្រូវផ្តោតជំនួបពិភាក្សាអំពីបញ្ហាប្រទេសលីប៊ី ដែលនឹងអាចក្លាយជាជង្រុកថ្មីរបស់ពួកជីហាត ក្រោយការខ្ចាត់ខ្ចាយពីប្រទេសអ៊ីរ៉ាក់ និងស៊ីរី។ នេះជាតំណាងគ្រោះថ្នាក់ និងការគំរាមកំហែងសម្រាប់អេហ្ស៊ីបផង ប្រទេសជិតខាងក្នុងតំបន់ផង រាប់ទាំងបារាំងផ្ទាល់ទៀត។
ស្តីអំពីវិស័យយោធា បារាំងនឹងបន្តប្រគល់អាវុធទៅឱ្យអេហ្ស៊ីប តាមការបញ្ជាទិញ មានអាទិ៍យន្តហោះប្រដេញ Rafale ចំនួន២៤ គ្រឿង ក្នុងក្របខ័ណ្ឌនៃកិច្ចសន្យាទិញកាលពីឆ្នាំ២០១៥ ទំហំ៥,២ពាន់លានដុល្លារ។ អេហ្ស៊ីបជាអតិថិជនធំទីមួយខាងទិញយន្តហោះរ៉ាហ្វាល់ ពីបារាំង បន្ទាប់មកគឺកាតា និងឥណ្ឌា។
តែគឺខាងផ្នែកសេដ្ឋកិច្ច ដែលទំនាក់ទំនងបារាំងអេហ្ស៊ីប មានភាពប្រសើរខ្លាំង ដោយក្រុមហ៊ុនបារាំង ជាអ្នកទទួលបន្ទុកសាងសង់រថភ្លើងក្រោមដ៏នៅទីក្រុងគែរ ក្នុងតម្លៃ២ពាន់លានអឺរ៉ូផង ការផ្តោះប្តូរពាណិជ្ជកម្មទៀតសោតក៏បានកើនឡើង១២% នៅឆមាសទីមួយឆ្នាំ២០១៧។ ប្រធានាធិបតីស៊ីស៊ី ដែលអមដំណើរដោយប្រតិភូជាអ្នកជំនួញអេហ្ស៊ីបធំៗ នឹងត្រូវជួបជាមួយនឹងក្រុងថៅកែធំៗបារាំងទៀត ដើម្បីបើកផ្លូវដល់ការវិនិយោគនៅអេហ្ស៊ីប។
ចុះបញ្ហាសិទ្ធិមនុស្ស ? បារាំងដែលទំនាក់ទំនងពាណិជ្ជកម្មនិងសន្តិសុខស្អិតល្មួតបំផុតជាមួយអេហ្ស៊ីប បានសន្យាលើកយកបញ្ហាសិទ្ធិមនុស្សមកជជែក នៅក្នុងជំនួបជាមួយប្រធានាធិបតី ស៊ីស៊ី។ រដ្ឋាភិបាលអេហ្ស៊ីបរបស់លោកស៊ីស៊ី មានតុល្យការអាក្រក់ខ្លាំងណាស់លើផ្នែកសិទ្ធិមនុស្សនេះ។ នេះបើតាមអង្គការក្រៅរដ្ឋាភិបាលជាច្រើនដែលបានអំពាវនាវឱ្យប្រធានាធិបតីបារាំងឈប់ធ្វើគរ ធ្វើថ្លង់ ឬឈប់អនុគ្រោះដល់របបដឹកនាំមួយនេះទៀត។ អង្គការបានចាត់ទុកដំណើរទស្សនកិច្ចផ្លូវការរយៈពេលបីថ្ងៃរបស់លោកស៊ីស៊ី នៅប្រទេសបារាំង ជាវិញ្ញាសាតេស្តរបស់លោកប្រធានាធិបតីម៉ាក្រុង ក្នុងវិស័យសិទ្ធិមនុស្ស។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ