បារាំង ៖ មួយឆ្នាំក្រោយ ការបំបែកជំរំអន្តោប្រវេសន៍កាឡេ
ចុះផ្សាយនៅថ្ងៃ៖
ស្តាប់ - ០៤:១៩
ថ្ងៃទី ២៤ តុលា ២០១៦ រដ្ឋាភិបាលបារាំង បានបើកប្រតិបត្តិការ បីថ្ងៃ គាស់រំលើងជំរំអន្តោប្រវេសន៍កាឡេ (នៅភាគខាងជើងប្រទេសបារាំង)។ ជំរំអន្តោប្រវេសន៍ ដ៏ធំ ដ៏រខេករខាក និងគួរខ្មាសអៀនរបស់បារាំង ដែលមានជនភៀសខ្លួនប្រមាណ៨នាក់ សំងំលាក់ខ្លួន ដើម្បីចាំរត់ឆ្លងទៅអង់គ្លេស។ មួយឆ្នាំក្រោយ តើជំរំ និង ជនអន្តោប្រវេសន៍ទាំងនោះក្លាយទៅជាយ៉ាងណាខ្លះ ?
ជំរំអន្តោប្រវេសន៍ក្នុងព្រៃកាឡេ ត្រូវបានគាស់រំលើង ក្រោយការតាមដានមើលស្ទើរពេញពិភពលោក កាលពីខែ តុលាឆ្នាំ២០១៦ ! ជនអន្តោប្រវេសន៍រាប់រយនាក់ ជាស៊ូដង់ ជាអេរីត្រេ អាហ្វហ្កានីស្ថាន ប៉ាគីស្ថាន ឈរតម្រង់ជួរ ជាបួនជួរ បុរសពេញវ័យមួយជួរ ក្មេងមិនទាន់ពេញវ័យមួយជួរ អ្នកមានគ្រួសារមួយជួរ និងជនអន់ខ្សោយសុខភាពមួយជួរ។ រាល់១៥នាទីម្តង ឡានក្រុងបានដឹកជនអន្តោប្រវេសន៍ទាំងអស់នោះ ទៅកាន់មជ្ឈមណ្ឌលទទួលជនភៀសខ្លួន ក្នុងតំបន់ផ្សេងៗទូទាំងប្រទេសបារាំង។ ក្នុងរយៈពេលបីថ្ងៃ អន្តោប្រវេសន៍ប្រមាណពី៦ពាន់នាក់ បានដំបូលជ្រក។
មួយឆ្នាំក្រោយ ជនអន្តោប្រវេសន៍ដែលជម្លៀសចេញពីកាឡេ និងដែលបានសុំសិទ្ធិជ្រកកោន ចំនួន៤២% បានទទួលចម្លើយវិជ្ជមាន។ ៤៦% កំពុងរង់ចាំសេចក្តីសម្រេចចុងក្រោយ។ ៧%ទើបចាប់ផ្តើមសំណុំបែបបទ។ នេះបើតាមតួលេខផ្តល់ដោយការិយាល័យអន្តោប្រវេសន៍បារាំង។
តែនៅមានជនអន្តោប្រវេសន៍ជាច្រើនផ្សេងទៀត ដែលមិនព្រមទទួលយកជំនួយមនុស្សធម៌របស់រដ្ឋាភិបាលបារាំងនាពេលនោះ។ ដោយសារតែឆន្ទៈមុះមុតចង់តែទៅរស់នៅអង់គ្លេស ពួកគេបានរត់គេចមុនការគាស់រំលើងជំរំ ហើយត្រលប់មកផ្សងព្រេងនៅកាឡេជាថ្មី ពេលស្ថានភាពស្ងប់ស្ងាត់។
ម្យ៉ាងវិញទៀត អន្តោប្រវេសន៍មួយក្រុមនេះដោះស្រាយរួច អន្តោប្រវេសន៍ថ្មីទៀតបានមកផ្លាស់វេន។ នៅទីបំផុត ស្ថានភាពទូទៅនៅកាឡេ នៅតែស្មុគស្មាញដដែល។ ពេលនេះកាឡេមានជនអន្តោប្រវេសន៍មានតិចជាងមុន ប្រហែលជា១០ដង ពោលគឺប្រមាណពី៥០០ទៅ៧០០នាក់ ខ្លះថាដល់ទៅ ១ពាន់នាក់។ នេះគ្រាន់តែជាសង្គ្រាមតួលេខ ប៉ុន្តែស្ថានភាពជាក់ស្តែង បានស្ទុះឡើងតានតឹងវិញខ្លាំង តាំងពីជាច្រើនសប្តាហ៍មកហើយ !
សកម្មភាពចាំស្ទាក់ឡានដឹកទំនិញឆ្លងទៅអង់គ្លេស បានផ្ទុះឡើងជាថ្មី ! តំបន់កំពង់ផែក្លាយជាតំបន់ច្បាប់ព្រៃ មានកាប់ដើមឈើដាក់រនាំង រំខានឃាំងផ្លូវ មានការបង្កជាក្រុមតូច ធំ រេរា បន្លែបន្លំផឹកស្រវឹង ចាំឱកាស ក៏ក្លាយជាមានជម្លោះរវាងក្រុមអន្តោប្រវេសន៍គ្នាឯង ... រូបភាពបែបនេះនៅតែជាប់ដិតដាមប្រលាក់ប្រលូសក្រុងកាឡេ ឱ្យពិបាកស្តារសេដ្ឋកិច្ចរបស់ខ្លួនឡើងវិញបាន។
ឯចំណែកខាងអាជ្ញាធរវិញ គ្មានសោះឡើយនូវពាក្យថាអនុគ្រោះ។ អាជ្ញាធរបារាំងបានរកគ្រប់មធ្យោបាយបង្អាក់ដំណើរ និងឱ្យពួកគេអស់ចិត្តលែងចង់ឆ្លងដែន ដោយសម្រេចប្រកាន់យកនយោបាយ ជំរំសូន្យ ! មានន័យថា កងកម្លាំងសន្តិសុខនឹងធ្វើប្រតិបត្តិការបំបែក បណ្តេញភ្លាម មិនឱ្យជនអន្តោប្រវេសន៍ណាម្នាក់អាចបោះតង់ទីណាមួយបានឡើយ។ ជារៀងរាល់យប់ថ្ងៃ ប៉ូលិសបានដើរល្បាត ក្នុងព្រៃជាយក្រុង ក្រោមស្ពាន ក្រោមលូ កៀនថ្នល់ បំបែកបណ្តេញអន្តោប្រវេសន៍ ដោយពេលខ្លះដល់ថ្នាក់ប្រើឧស្ម័នបង្ហូរទឹកភ្នែកផង។
ជាលទ្ធផល អាជ្ញាធរប៉ូលិសអាចសម្តែងការពេញចិត្តចំពោះស្នាដៃរបស់ពួកគេ ដោយហេតុថាពេលនេះ គ្មានជំរំអន្តោប្រវេសន៍ណាក៏កើតជារូបរាងបាននៅកាឡេ ស្ទើរតែលែងមានសកម្មភាពលួចរត់ឆ្លងចូលផ្លូវឆ្លងទៅអង់គ្លេស Eurotunnel តំបន់កំពង់ផែបានដែលចែកជាបីផ្នែក រងរងរាំងបាំងផ្លូវចូលប្រមាណ២៥ប៉ុណ្ណោះ គិតចាប់ពីដើមឆ្នាំមក ទល់នឹងជាងមួយរយកាលពីមួយឆ្នាំមុន។
ក៏ប៉ុន្តែចំពោះស្ថានភាពរបស់ជនអន្តោប្រវេសន៍វិញ កំពុងស្ថិតក្នុងគ្រោះថ្នាក់ខ្លាំង ! ដោយហេតុតែមានការបណ្តេញ កម្ចាត់ កម្ចេច រឹបអូស មិនឱ្យជនអន្តោប្រវេសន៍អាចប្រជុំគ្នានិងតាំងទីជ្រកបាន ពួកគេត្រូវរស់យ៉ាងត្រដាបត្រដួសបំផុត។ សាលាឃុំកាឡេ មានកាតព្វកិច្ច ដាក់បង្គន់ បន្ទប់ទឹក ប៉ុន្តែគេជ្រើសរើសការផ្តល់ក្បាលរ៉ូប៊ីនេទឹក និងបង្គន់ចល័ត ដើម្បីកុំឱ្យជនអន្តោប្រវេសន៍អាចផ្តុំទីបាន។ ហេតុដូច្នេះហើយបានជាអង្គការក្រៅរដ្ឋាភិបាល អង្គការគ្រូពេទ្យគ្មានព្រំដែន បានសម្តែងការព្រួយបារម្ភខ្លាំងអំពីស្ថានភាពជីវិតរបស់ជនអន្តោប្រវេសន៍ទាំងនោះ ព្រោះម្យ៉ាងរដូវត្រជាក់ធ្លាក់ទឹកកកកាន់តែខិតមកដល់ទៀត។
នៅក្នុងបរិបទនេះ អាជ្ញាធរមានហេតុផលសមរម្យមួយ គឺមិនបណ្តោយឱ្យពួកគេរស់តាមថ្នល់ទេ ប៉ុន្តែមានជនអន្តោប្រវេសន៍តិចតួចណាស់ ដែលព្រមរណបខ្លួនទៅរស់នៅក្នុងមជ្ឈមណ្ឌលទទួលជនភៀសខ្លួន និងតម្រង់ទិស។ ពួកគេភាគច្រើន មិនខ្វល់និងមិនរង់ចាំអ្វីពីបារាំងឡើយ ! ទិសដៅរបស់ពួកគេមានតែមួយគត់ គឺត្រូវការឆ្លងទៅអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ