អូតង់ពង្រឹងសមត្ថភាពវាយប្រហារតាមអ៊ីនធ័រនែត ដើម្បីទប់ទល់នឹងរុស្ស៊ី
សមាជិករបស់អង្គការអូតង់ នៅថ្ងៃ ពុធម្សិលមិញបានព្រមព្រៀងគ្នា ឲ្យបង្កើនយុទ្ធសាស្រ្ត និងសមត្ថភាព វាយប្រហារតាមអ៊ីនធ័រនែត នៅក្នុងប្រតិបត្តិការយោធារបស់អង្គការសម្ព័ន្ធអាត្លង់ទិក ខាងជើង អូតង់។ អូតង់ចង់ពង្រឹងសមត្ថភាពដើម្បីទប់ទល់នឹងរុស្ស៊ី ដែលអូតង់វាយតម្លៃថា កំពុងបង្កើន ឥតឈប់ កម្លាំងទ័ព ហើយនិងសម្រួចសម្រាំងខ្លាំង ប្រព័ន្ធការពារអ៊ីនធ័រនែត នៅប៉ុន្មានឆ្នាំចុងក្រោយនេះ។
ចុះផ្សាយនៅថ្ងៃ៖
នៅក្នុងកិច្ចប្រជុំថ្នាក់រដ្ឋមន្រ្តីការពារជាតិ នៅទីស្នាក់ការកណ្តាលក្នុងក្រុងព្រុចសែល ប្រទេសសមាជិកទាំង២៩របស់អង្គការអូតង់បានសម្រេចបើកភ្លើងខៀវ ឲ្យធ្វើកំណែទម្រង់ស៊ីជម្រៅ នៅក្នុងយុទ្ធសាស្រ្តយោធារបស់អង្គការអូតង់។ តាមអគ្គលេខាធិការអង្គការអូតង់ លោកJens Stoltenberg យុទ្ធសាស្រ្តវាយប្រហារតាម អ៊ីនធ័រនែត ត្រូវដាក់បញ្ចូលទៅក្នុងបេសកកម្ម និងប្រតិបត្តិការរបស់ទ័ពអូតង់ គឺដើម្បីដើរឲ្យទាន់សភាពការណ៍ ពិភពលោកសព្វថ្ងៃ ដែលកំពុងប្រឈមនឹងការគំរាមកំហែង វាយប្រហារតាមអ៊ីនធ័រនែត។
អូតង់ធ្លាប់បានប្រើរួចហើយ ដោយជោគជ័យ យុទ្ធសាស្រ្តវាយប្រហារតាមអ៊ីនធ័រនែត នៅក្នុងប្រតិបត្តិការប្រយុទ្ធប្រឆាំងនឹងក្រុមជីហាត រដ្ឋអ៊ីស្លាម នៅប្រទេសស៊ីរី និងនៅអ៊ីរ៉ាក់។ តាមលោក Jens Stoltenberg អូតង់ធ្លាប់បានធ្វើសង្រ្គាមអ៊ីនធ័រនែត ដោយវាយប្រហារទៅលើវិបសៃតិ៍ បណ្តាញសង្គមរបស់ពួកជីហាត លួចស្តាប់ផែនការសង្រ្គាមរបស់ក្រុមនេះ ឬក៏ទៅបំផ្លាញបច្ចេកវិទ្យាដែលក្រុមជីហាត ត្រូវប្រើ នៅក្នុងសមរភូមិប្រយុទ្ធ។
អាមេរិក និងបារាំង សមាជិករបស់អូតង់ ជាប្រទេសនាំមុខគេ ខាងសមត្ថភាពវាយ ប្រហារតាមអ៊ីនធ័រនែត។ ប៉ុន្តែ សមយុទ្ធរបស់អង្គការអូតង់ នាពេលថ្មីៗនេះបានបង្ហាញឲ្យឃើញពីចំណុចខ្សោយ និងការខ្វះខាតចន្លោះច្រើន បើប្រៀបធៀបទៅនឹងរុស្ស៊ី ដែលបើតាមអូតង់ គឺនឹងអាចប្រើយុទ្ធសាស្រ្តវាយប្រហារតាមអ៊ីនធ័រនែត ទៅលើប្រទេសគូសត្រូវ។ អូតង់ធ្លាប់បានបង្កើតមជ្ឈមណ្ឌល ការពារសន្តិសុខតាមអ៊ីនធ័រនែត នៅ ក្រោយគេរកឃើញថា បណ្តាញទំនាក់ទំនងរបស់ប្រទេសសមាជិកអូតង់ បានរង ការវាយប្រហារតាមអ៊ីធ័រនែត សឹងជារៀងរាល់ខែ។ ប្រទេសជាច្រើនបារម្ភខ្លាចថា រុស្ស៊ីនឹងអាចប្រើយុទ្ធសាស្រ្តវាយប្រហារតាមអ៊ីនធ័រនែត។
ដោយនិយាយយោងទៅដល់ករណីប្រទេសអ៊ុយក្រែន លោកអគ្គលេខាធិការអង្គការអូតង់ បានលើកឡើងថា រុស្ស៊ីបានបង្ហាញឲ្យឃើញពីចេតនាប្រើកម្លាំង ដើម្បី វាយប្រហារទៅលើប្រទេសជិតខាង។ រុស្ស៊ី បានវិនិយោគកាន់តែច្រើន នៅប៉ុន្មានឆ្នាំចុងក្រោយនេះ ដើម្បីពង្រឹងសមត្ថភាពកងទ័ព អាវុធនុយក្លេអ៊ែរ។
ក្រៅតែពីបង្កើនសមត្ថភាព និងចាត់បញ្ចូល ការវាយប្រហារតាមអ៊ីនធ័រនែត ទៅក្នុងប្រតិបត្តិការយោធារបស់អូតង់ សមាជិករបស់សម្ព័ន្ធអាត្លង់ទិកខាងជើង បានព្រមព្រៀងគ្នាផងដែរ ក្នុងការបង្កើតទីបញ្ជាការដ្ឋាន ថ្មី ចំនួន ២ ដើម្បីការពារអឺរ៉ុប។ អូតង់ដែលបានសម្រេចផងដែរ បញ្ឈប់នយោបាយកាត់បន្ថយចំនួនកងទ័ព បានធ្វើកំណែទម្រង់ស៊ីជម្រៅលើរចនាសម្ព័ន្ធ ដើម្បីប្រឈមមុខនឹងរុស្ស៊ី ដែលអូតង់ចាត់ទុកជាប្រទេសឈ្លានពាន នៅក្រោយការលេបយកទឹកដីគ្រីមេ របស់អ៊ុយក្រែន នៅឆ្នាំ ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ