អត្ថបទលោកពូទីនឧទ្ទិសដល់ជំនួបកំពូល APEC លើកទី២៥ នៅប្រទេសវៀតណាម
ចុះផ្សាយនៅថ្ងៃ៖
ស្តាប់ - ០៦:៥០
ថ្ងៃទី១០ និង ១១ វិច្ឆិកា ក្រុងដាណង់ប្រទេសវៀតណាម ធ្វើជាម្ចាស់ផ្ទះទទួលជំនួបកំពូល នៃ អង្គការសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក ហៅកាត់ថា APEC ។ ឧទ្ទិសដល់ព្រឹត្តិការណ៍នេះ លោក វ៉្លាឌីមៀរ ពូទីន ប្រធានាធិបតីរុស្ស៊ី ជាប្រទេសមួយ ពីក្នុងចំណោម ២១ ប្រទេសសមាជិក អង្គការនេះ ថ្ងៃ ៨ វិច្ឆិកា នៅវេលាម៉ោង ៩ យប់ បាន ចេញអត្ថបទពិសេស ក្រោមចំណងថា “ កិច្ចប្រជុំកំពូល APEC លើកទី២៥ នៅក្រុងដាណង់ រួមកម្លាំងគ្នា ឆ្ពោះទៅកាន់ វិបុលភាព និង ការអភិវឌ្ឍន៍ដោយសុខដុម។
ក្នុងអត្ថបទនេះ លោកពូទីនសរសេរជាអាទិ៍ រុស្ស៊ីសូមវាយតម្លៃខ្ពស់ចំពោះការដែលជំនួបកំពូល APEC ហុចដល់គ្រប់ប្រតិភូចូលរួមនូវ លទ្ធភាព ទូលំទូលាយ ដើម្បីសម្របគោលជំហរគ្នា ជុំវិញបញ្ហាប្លែកៗបំផុត វិស័យសេដ្ឋកិច្ច សង្គម បរិស្ថាន។ ក្នុង ឋានៈ ជាប្រទេសធំបំផុត ស្ថិតនៅទ្វីបអឺរ៉ុបផង អាស៊ីផង ដោយមានដែនដីធំល្ហល្ហេវនៅតំបន់ចុងបូព៌ាដក់ ជាប់ដោយ សក្តានុពលដ៏សំបើម រុស្ស៊ីតែងយកចិត្តទុកដាក់ ទៅលើអនាគតប្រកបដោយជោគជ័យរបស់ APEC បូកទាំង ដើម្បីធានាឲ្យមាន កំណើនយ៉ាងស្ថិតស្ថិរគ្រប់ជ្រុងជ្រោយ នៅពេញលើលំហរបស់អង្គការ នេះ។ តាមយោបល់រុស្ស៊ី ឧបករណ៍ជាគន្លឹះសម្រាប់ដោះស្រាយចំណោទនេះ គឺការធ្វើសមាហរណកម្ម សេដ្ឋកិច្ចយ៉ាងស័ក្តិសិទ្ធិ ដោយឈរលើគោលការណ៍បើកចំហ និង នាំជាគុណប្រយោជន៍ទៅវិញទៅមក តាមផ្លូវ គោរពក្បួនច្បាប់សាកល របស់ អង្គការពាណិជ្ជកម្មពិភពលោក។
ប្រមុខរដ្ឋរុស្ស៊ី បន្តតមកទៀត មូស្គូគាំទ្រដល់គំនិតប្រែ តំបន់អាស៊ី-ប៉ាស៊ីហ្វិក ទៅជា លំហពាណិជ្ជកម្មសេរី ដ្បិតវាបើកផ្លូវ ឲ្យបណ្តាទីផ្សារ APEC ដែលកំពុងរីកលូតលាស់យ៉ាងសកម្ម ពង្រឹងជំហរខ្លួនកាន់តែមាំ។ ត្រង់ចំណុចនេះ ខ្ញុំសូមកត់សម្គាល់ថា ក្នុង ៥ ឆ្នាំកន្លងទៅ អត្រាសេដ្ឋកិច្ច APEC ក្នុងពាណិជ្ជកម្ម ក្រៅ ប្រទេស របស់រុស្ស៊ី បានកើនឡើងពី ២៣% ដល់ ៣១% ហើយខាងនាំចេញ របស់រុស្ស៊ីទៅកាន់ ប្រទេស ឯទៀត របស់ APEC បានកើនឡើងពី ១៧% ដល់ ២៤%។ ប្រាកដណាស់ ដែលគម្រោងទ្រង់ទ្រាយធំ បង្កើតឡើងជា លំហពាណិជ្ជកម្មសេរីរបស់ APEC ត្រូវសមិទ្ធិគឺដោយគន់គិតពីបទពិសោធន៍សន្សំ បានពី ការធ្វើ សមាហរណកម្មនៅតំបន់អាស៊ី-ប៉ាស៊ីហ្វិក និង តំបន់អាស៊ី-អឺរ៉ុប បូកទាំង សហភាពសេដ្ឋកិច្ចអឺរ៉ុប-អាស៊ី ជា ទីដែលរុស្ស៊ី សហការជាមួយ ប្រទេស អារមេនី បេឡារុស កាហ្សាក់ស្ថាន និង កៀរហ្ស៊ីស៊ីស្ថាន។
សហភាព នេះ កំពុងអភិវឌ្ឍដោយថាមវន្ត ទាំងត្រៀមរៀបរយទំនាក់ទំនងជាមួយ គ្រប់តែសាមីប្រទេសនិងអង្គការ។ វៀតណាម ដែលជាប្រទេសម្ចាស់ផ្ទះទទួលជំនួបកំពូល APEC លើកនេះ ក្លាយជារដ្ឋទី១ ដែលបានចុះ ជាមួយ សហភាពសេដ្ឋកិច្ចអឺរ៉ុប-អាស៊ី ជាកិច្ចព្រមព្រៀងស្តីអំពី លំហពាណិជ្ជកម្មសេរី។ ជាលទ្ធផល ទំហំផ្តោះប្តូរពាណិជ្ជកម្មទ្វេភាគី បានកើនឡើងយ៉ាងបង្គួរ និងមានលក្ខណៈកាន់តែសម្បូរបែប។ ទើប ពេលថ្មីៗសោះ សហភាពសេដ្ឋកិច្ចអឺរ៉ុប-អាស៊ីបានបញ្ចប់កិច្ចចរចាជាមួយប្រទេសចិន ជុំវិញកិច្ចព្រមព្រៀង ស្តីអំពី សហប្រតិបត្តិការពាណិជ្ជកម្ម-សេដ្ឋកិច្ច។ រួចឥឡូវ នៅតាមទិសដៅនេះដែរ សហភាពសេដ្ឋកិច្ចអឺរ៉ុប-អាស៊ីបានចាប់ផ្តើម កិច្ចចរចា ជាមួយប្រទេសសិង្ហបុរី ហើយជាទូទៅ គឺ ដើម្បីរាវរកលទ្ធភាពចុះជាកិច្ចព្រមព្រៀង ស្តីអំពី ពាណិជ្ជកម្មសេរី ជាមួយអាស៊ានតែម្តង។
ពាក់ព័ន្ធនឹងរឿងនេះ ខ្ញុំសូមកត់សម្គាល់ ដាច់ដោយឡែក អំពីគំនិតផ្តួចផ្តើមរបស់យើង បង្កើតឡើងជា មហាភាពដៃគូអាស៊ី-អឺរ៉ុបឈរលើសំណើ របស់ចិន ក្រោមឈ្មោះថា ខ្សែក្រវាត់មួយ-ផ្លូវមួយ។ ខ្ញុំសូមគូសបញ្ជាក់ថា នេះជាគម្រោង ងាយបត់បែន ហើយ បើកចំហ សម្រាប់ការភ្ជាប់ខ្លួននៃប្រទេសឯទៀត។
លោកពូទីន ចង្អុលឲ្យឃើញថា អាចក្លាយជាមូលដ្ឋាននៃសមាហរណកម្មប្រកបដោយប្រសិទ្ធិភាព គឺ ការ អភិវឌ្ឍន៍ហេដ្ឋារចនាសម្ព័ន្ធដោយចម្រុះតែម្តង ក្នុងនោះ មានផ្នែកដឹកជញ្ជូន ទូរគមនាគមន៍ និង ថាមពល។ សព្វថ្ងៃ រុស្ស៊ីធ្វើទំនើបកម្មយ៉ាងមមាញឹក បណ្តាផែសមុទ្រ និង អាកាសយានដ្ឋានខ្លួន នៅតំបន់ចុងបូព៌ា ពង្រីកបណ្តាញផ្លូវដែកខ្លួនដែលភ្ជាប់ទ្វីបមួយទៅទ្វីបមួយផ្សេង សង់ឡើងជា ខ្សែបំពង់សម្រាប់ បង្ហូរឧស្ម័ន និងប្រេងឆៅ។
រុស្ស៊ីតាំងចិត្តសម្រេចឲ្យទាល់តែបាន គម្រោងហេដ្ឋារចនាសម្ព័ន្ធទ្វេភាគី និង ពហុភាគី ដែល តភ្ជាប់សេដ្ឋកិច្ច និង ទីផ្សារបណ្តាប្រទេស អាស៊ី-ប៉ាស៊ីហ្វិក។ ខ្ញុំចង់និយាយអំពីមហារង្វង់ថាមពល ដែលតភ្ជាប់ រុស្ស៊ី ចិន ជប៉ុន កូរ៉េខាងត្បូង ឬផ្លូវឆ្លងដឹកជញ្ជូនដែលភ្ជាប់កោះ Sakhaline រុស្ស៊ី ទៅនឹងកោះ Hokkaido ជប៉ុន ។ អត្ថបទលោកពូទីន ក៏រំលេចឲ្យឃើញថា រុស្ស៊ី យកចិត្តទុកដាក់ពិសេសទៅលើ ការធ្វើសមាហរណកម្មដែនដី ស៊ីបេរី និងចុងបូព៌ារបស់ខ្លួន ទៅនឹងប្រព័ន្ធចំណងសេដ្ឋកិច្ចតំបន់អាស៊ី-ប៉ាស៊ីហ្វិក។ ការងារបែបនេះ រួមក្តោប ទាំងវិធានការបង្កើតបរិយាកាសទាក់ទាញវិនិយោគ ត្រៀមលក្ខណៈសម្រាប់រោងចក្ររុស្ស៊ី សម្របខ្លួន ទៅ នឹងប្រព័ន្ធផលិតអន្តរជាតិ។ សម្រាប់រុស្ស៊ី ការអភិវឌ្ឍន៍តំបន់ចុងបូព៌ា ជាអាទិភាពជាតិនៃសតវត្សរ៍ ទី ២១។
សាច់ «រឿងគឺអំពីការបង្កើតនៅតំបន់នេះ ជាដែនដីកំណើនអំពីការលុកបើកប្រើប្រាស់ក្នុង ទ្រង់ទ្រាយ ធំសំបើមសម្បត្តិធម្មជាតិ និង គាំទ្រដល់ វិស័យណាដែលអនុវត្តបច្ចេកវិជ្ជាឈានមុខ អំពីការធ្វើវិនិយោគ ទៅ ក្នុងធនធានមនុស្ស អំពីវិស័យអប់រំនិងសុខាភិបាល អំពីការបង្កើត មជ្ឈមណ្ឌលវិទ្យាសាស្ត្រ-បច្ចេកទេស មានសមត្ថភាពប្រជែងកម្រិតខ្ពស់។ រុស្ស៊ីសង្ឃឹមថា បណ្តាដៃគូបរទេស ជាបឋម គឺសេដ្ឋកិច្ច ប្រទេសនានា ក្នុង APEC មុខជានឹងចូលខ្លួនយ៉ាងសកម្ម មកសមិទ្ធិគម្រោងទាំងនេះ។ ជាពិសេស បណ្តា ប្រតិភូបរទេស នៃ វេទិកាសេដ្ឋកិច្ចបូព៌ា ដែលប្រព្រឹត្តទៅ ជារៀងរាល់ឆ្នាំនៅក្រុង Vladivostok ចុងបូព៌ារុស្ស៊ី បានឃើញនឹង ភ្នែកខ្លួនផ្ទាល់ អំពីកត្តាទាំងអម្បាលម៉ាននៅទីនោះ ហើយអាចជឿជាក់ទៅហើយ មកលើទស្សនវិស័យ នៃ គម្រោងទាំងនេះរបស់រុស្ស៊ី ដែលនឹងរំលេចចេញជាផ្លែផ្កាជាក់ស្តែងមែន។
លោកពូទីន ក្នុងអត្ថបទខ្លួន ក៏ស្នើឲ្យចាប់ផ្តើមក្នុងបរិវេណ APEC ធ្វើការពិគ្រោះប្តូរយោបល់គ្នា ជុំវិញបញ្ហា សន្តិសុខព័ត៌មានអន្តរជាតិ បញ្ហាការពារកម្មវិធីកុំព្យូទ័រ បញ្ចេញប្រតិកម្មដោយរួមគ្នាទល់នឹង គ្រោះធម្មជាតិ ជាប់ដៃរវល់កុំបីអាក់ខានឡើយនឹងបញ្ហាសន្តិសុខស្បៀងអាហារ ដោយក្នុងន័យនេះ រុស្ស៊ីសង្ឃឹមក្លាយ ជា ប្រទេសនាំមុខខាងលក់ទៅបណ្តាប្រទេសតំបន់អាស៊ី-ប៉ាស៊ីហ្វិកគឺ គ្រឿងបរិភោគណា ដែលស្អាតបរិសុទ្ធ ខាង បរិស្ថាន។ លោកពូទីន បញ្ចប់សេចក្តីថា តាមជំនឿជឿជាក់របស់រុស្ស៊ី ជំនួបកំពូល APEC លើកទី២៥ នៅក្រុង ដាណង់ ដោយរួមកម្លាំងគ្នា ពិតជានឹងដោះស្រាយបានរួចយ៉ាងស័ក្តិសម ភារកិច្ចខាង ធានានូវ ភាពរុងរឿង និង កំណើនដោយសុខដុម សម្រាប់តំបន់នេះទាំងមូល ហើយរុស្ស៊ី ត្រៀមធ្វើការងាររួមបែបនេះ។
តាមវិមានក្រេមឡាំងប្រកាសឲ្យដឹង ក្នុងក្របខ័ណ្ឌកិច្ចប្រជុំកំពូលនេះ លោកប្រធានាធិបតីរុស្ស៊ី នឹងជួប សន្ទនាទ្វេភាគីជាមួយលោកប្រធានាធិបតីចិន លោកនាយករដ្ឋមន្ត្រីជប៉ុន លោកប្រធានាធិបតីហ្វីលីពីន និង លោកប្រធានាធិបតីវៀតណាម ប្រទេសម្ចាស់ផ្ទះ ហើយប្រហែលជានឹងធ្វើជំនួបបែបនេះដែរ ជាមួយ លោកប្រធានាធិបតីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ