នាយករដ្ឋមន្ត្រីអេស្ប៉ាញចុះទៅកាតាឡូញ៉ា ក្រោយមហាបាតុកម្មក្រុមផ្តាច់ទឹកដីនិយម
ថ្ងៃអាទិត្យនេះ នាយករដ្ឋមន្ត្រីអេស្ប៉ាញ លោក Mariano Rajoy ម៉ារីយ៉ាណូ រ៉ាហយ ចុះទៅក្រុងបាសឺឡូន តំបន់កាតាឡូញ៉ា ដើម្បីចូលរួមពិធីប្រកាសឈ្មោះបេក្ខជនបក្សនយោបាយរបស់លោក សម្រាប់ការបោះឆ្នោតតំបន់ ដែលត្រូវប្រព្រឹត្តទៅនៅថ្ងៃ២១ធ្នូខាងមុខ។ ថ្ងៃសៅរ៍ម្សិលមិញ មនុស្សរាប់សែននាក់នៅកាតាឡូញ៉ាទើបតែបានធ្វើមហាបាតុកម្មទាមទារអោយដោះលែងមេដឺកនាំផ្តាច់ទឹកដីនិយមដែលរដ្ឋអំណាចអេស្ប៉ាញឃុំខ្លួនប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០១:៥៧
ថ្ងៃអាទិត្យនេះ ជាលើកទី១ហើយ ដែលនាយករដ្ឋមន្ត្រីអេស្ប៉ាញលោករ៉ាហយ ចុះទៅតំបន់កាតាឡូញ៉ា គិតតាំងពីពេលអេស្ប៉ាញដាក់តំបន់នេះ អោយស្ថិតនៅក្រោមការគ្រប់គ្រងរបស់រដ្ឋអំណាចកណ្តាលវិញ។ ការយកកាតាឡូញ៉ាមកត្រួតត្រាវិញនេះ គឺកើតឡើង នៅក្រោយសភាតំបន់ប្រកាសឯករាជ្យតំបន់ ពីរដ្ឋអំណាចកណ្តាលក្រោយប្រជាមតិទាមទារឯករាជ្យកាលពីថ្ងៃ១តុលានោះ។
ថ្ងៃអាទិត្យនេះ នាយករដ្ឋមន្ត្រីអេស្ប៉ាញរ៉ាហយ ចុះទៅទីក្រុងបាសឺឡូន ក្នុងតំបន់កាតឡូញ៉ា ចូលរួមពិធីបង្ហាញបេក្ខជនផ្លូវការរបស់បក្សលោក សម្រាប់ការបោះឆ្នោតសភាកាតាឡូញ៉ា ថ្ងៃ២១ធ្នូខាងមុខ។ គួររំលឹកថា គឺលោករ៉ាហយខ្លួនឯងផ្ទាល់ ដែលបានប្រកាសរំលាយសភាកាតាឡូញ៉ា និងប្រកាសរៀបចំការបោះឆ្នោតមួយនេះ ក្រោយពេលសភាកាតាឡូញ៉ាប្រកាសឯករាជ្យនោះ។ ក្នុងពេលបោះឆ្នោតសភាតំបន់លើកមុន បក្សរបស់លោកទទួលសម្លេងបានត្រឹម៨,៥ភាគរយប៉ុណ្ណោះ។ បក្សរបស់លោកកំពុងប្រឈមនឹងបក្សនយោបាយថ្មីមួយឈ្មោះថា Ciudadanos ដែលជាគូប្រជែងសំខាន់លំដាប់ទី២ក្នុងតំបន់។
វត្តមានរបស់នាយករដ្ឋមន្ត្រីអេស្ប៉ាញរ៉ាហយ នៅបាសឺឡូនពេលនេះ អាចនឹងបង្កើនភាពតានតឹងក្នុងតំបន់បាន ដោយសារតែម្សិលមិញនេះ មានបាតុករ៧៥ម៉ឺននាក់នៅកាតាឡូញ៉ាបានបាតុកម្មទាមទារអោយអេស្ប៉ាញដោះលែងមេដឺកនាំផ្តាច់ទឹកដីនិយមជាង១០នាក់ ដែលជាប់ឃុំពីបទបះបោរផ្តាច់ទឹកដីនិយម។ តុលាការការអេស្ប៉ាញបានដកតំណែងមេដឺកនាំផ្តាច់ទឹកដីមួយចំនួន និងឃុំខ្លួនពួកគេ ព្រមទាំងបានសុំអោយបែលហ្ស៊ិកចេញបត្យាប័នប្រគល់អតីតមេដឹកនាំការឡែស ពីកដឺម៉ុង និងអតីតរដ្ឋមន្ត្រី៤រូប ដែលបានរត់ទៅនៅបែលហ្ស៊ិក។
វត្តមាននាយករដ្ឋមន្ត្រីរ៉ាហយ នៅបាសឺឡូន ពេលនេះ អាចបង្កភាពតានតឹងបាន ព្រោះទាំងអ្នកផ្តាច់ទឹកដីនិយម ទាំងអ្នកគាំទ្ររដ្ឋអំណាចអេស្ប៉ាញសុទ្ធតែបន្ទោសនាយករដ្ឋមន្ត្រីអេស្ប៉ាញរ៉ាហយ ថាបានដឹកនាំចលនាប្រយុទ្ធប្រឆាំងមិនអោយកាតាឡូញ៉ាទទួលបានស្វ័យភាពទូលំទូលាយ។ សូម្បីតែក្រោយពេលលោកឡើងកាន់អំណាចនៅឆ្នាំ២០១១ហើយក៏ដោយ ក៏លោកនៅតែបដិសេធសំណើតំបន់កាតាឡូញ៉ាដែរ ជាសំណើ បែងចែកចំណូលពន្ធជាតិអោយបានប្រសើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ