លោកប្រមុខរដ្ឋតួកគីអ៊ែរដូហ្កានចាត់ទុកអ៊ីស្រាអែលជារដ្ឋភេរវនិយម និងជាអ្នកសម្លាប់កូនក្មេង
នៅថ្ងៃអាទិត្យ ទី១០ ធ្នូ លោកប្រធានាធិបតីនៃប្រទេសតួកគីអ៊ែរដូហ្កានបានចាត់ទុកអ៊ីស្រាអែលជារដ្ឋភេរវនិយមដែលកំពុងបន្តសម្លាប់កូនក្មេង។ ទន្ទឹមគ្នានេះ លោកអ៊ែរដូហ្កានបានប្តេជ្ញាចិត្តថា លោកនឹងធ្វើយុទ្ធនាការគ្រប់បែបយ៉ាងដើម្បីប្រឆាំងនឹងសេចក្តីសម្រេចចិត្តរបស់លោកប្រធានាធិបតីអាមេរិកដូណាល់ ត្រាំដែលបានប្រកាសទទួលស្គាល់ហ្សេរុយសាឡិមជាទីក្រុងផ្តាច់មុខរបស់អ៊ីស្រាអែល។ ប្រតិកម្មរបស់លោកអ៊ែរដូហ្កានបានធ្វើឡើង ១ថ្ងៃក្រោយពីលោកបានជួបសន្ទនាតាមទូរស័ព្ទជាមួយសមភាគីបារាំងលោកម៉ាក្រុងនាថ្ងៃសៅរ៍ ទី៩ ធ្នូ។ នៅក្នុងកិច្ចសន្ទនានោះ លោកម៉ាក្រុងស្នើលោកអ៊ែរដូហ្កានឲ្យចូលរួមកាត់បន្ថយភាពតានតឹងនៅក្នុងតំបន់។
ចុះផ្សាយនៅថ្ងៃ៖
ស្តាប់ - ០២:២០
« ប៉ាឡេស្ទីនជាអ្នករងគ្រោះដោយអយុត្តិធម៌ ចំណែកអ៊ីស្រាអែលវិញ ជារដ្ឋភេរវនិយម » នេះជាការប្រកាសក្តែងៗរបស់លោកប្រធានាធិបតីតួកគីអ៊ែរដូហ្កាននៅក្នុងសុន្ទរកថាថ្លែងក្នុងទីក្រុង Sivas ស្ថិតប៉ែកកណ្តាលប្រទេស។ លោកអ៊ែរដូហ្កានបានបន្ថែមថា លោកនឹងមិនទុកបណ្តោយឲ្យទីក្រុងហ្សេរុយសាឡិមធ្លាក់ទៅក្នុងកណ្តាប់ដៃរបស់រដ្ឋមួយដែលកំពុងសម្លាប់កូនក្មេងនោះទេ។ កូនក្មេងដែលលោកអ៊ែរដូហ្កានចង់និយាយ គឺជាជនជាតិប៉ាឡេស្ទីនដែលលោកបានដាក់បញ្ចាំងរូបថតនៅពីក្រោយវេទិកាដែលលោកកំពុងថ្លែងសុន្ទរកថា។
នៅក្នុងរូបភាពវីដេអូនោះ គេឃើញរូបកូនក្មេងម្នាក់ត្រូវបានគេចងមុខជិត និងត្រូវបានក្រុមមនុស្សមានសម្លៀកបំពាក់ឯកសណ្ធានដែលគេចាត់ទុកជាទាហានអ៊ីស្រាអែលនាំខ្លួនទៅ។ លោកអ៊ែរដូហ្កានបានធ្វើអត្ថាធិប្បាយលើរូបថតកូនក្មេងនោះដោយឌឺដងដាក់អ៊ីស្រាអែលថា អស់លោកមានឃើញទេ តើពួកភេរវជនបាននាំគ្នាធ្វើបាបកូនក្មេងអាយុ ១៤ឆ្នាំរបៀបណាខ្លះ។
ប្រតិកម្មខ្លាំងៗវាយប្រហារលើអ៊ីស្រាអែលរបស់លោកអ៊ែរដូហ្កានពេលនេះ គឺដើម្បីបន្តប្រឆាំងនឹងសេចក្តីសម្រេចចិត្តជាឯកតោភាគីរបស់សមភាគីអាមេរិកលោកដូណាល់ ត្រាំដែលបានប្រកាសទទួលស្គាល់ហ្សេរុយសាឡិមជាទីក្រុងផ្តាច់មុខរបស់អ៊ីស្រាអែលកាលពីថ្ងៃទី៦ ធ្នូ។
លោកអ៊ែរដូហ្កានធ្លាប់បានព្រមានថា ទង្វើរបស់លោកដូណាល់ ត្រាំរបៀបនេះអាចបង្កឲ្យមានការផ្តាច់ទំនាក់ទំនងការទូតជាថ្មីរវាងតួកគី និងអ៊ីស្រាអែល។ ទំនាក់ទំនងដែលធ្លាប់បានកាត់ផ្តាច់ម្តងក្នុងឆ្នាំ ២០១០ បន្ទាប់ពីទ័ពអ៊ីស្រាអែលបានអន្តរាគមន៍លើនាវារបស់អង្គការក្រៅរដ្ឋាភិបាលមួយដែលកំពុងដឹកជំនួយទៅឲ្យប្រជាជនប៉ាឡេស្ទីននៅតំបន់ហ្កាហ្សា និងដែលនៅក្នុងប្រតិបត្តិការកាលណោះបានបណ្តាលឲ្យស្លាប់សកម្មជនតួកគីមួយចំនួន។ គឺទើបនៅក្នុងឆ្នាំ ២០១៦ ដែលតួកគី និងអ៊ីស្រាអែលបានភ្ជាប់ទំនាក់ទំនងការទូតឡើងវិញ ហើយភាគីទាំងពីរតែងពង្រឹងកិច្ចសហប្រតិបត្តិការរវាងគ្នា ពិសេសក្នុងវិស័យថាមពល។
តែគេមិនត្រូវភ្លេចនិយាយទេថា លោកអ៊ែរដូហ្កានជាសកម្មជនម្នាក់ចេញមុខការពារបុព្វហេតុរបស់ប៉ាឡេស្ទីន និងតែងបន្តធ្វើការរិះគន់ ទិតៀនមិនសំចៃមាត់លើនយោបាយរបស់អ៊ីស្រាអែលចំពោះប៉ាឡេស្ទីន។ យ៉ាងណាក៏ដោយនៅក្នុងកិច្ចសន្ទនាតាមទូរស័ព្ទជាមួយសមភាគីបារាំងលោកម៉ាក្រុង លោកម៉ាក្រុងបានស្នើលោកអ៊ែរដូហ្កានឲ្យចៀសវាងរាល់ទង្វើអវិជ្ជមាន និងចូលរួមកាត់បន្ថយភាពតានតឹងនៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ