RSF៖តួលេខអ្នកកាសែតស្លាប់ក្នុងពិភពលោក ថយចុះ ក្នុងឆ្នាំ២០១៧
ថ្ងៃអង្គារនេះ អង្គការអ្នកកាសែតគ្មានព្រំដែនហៅកាត់ថា RSF បានចុះផ្សាយតួលេខអ្នកកាសែតដែលបានពលីជីវិត ក្នុងពិភពលោក នៅឆ្នាំ២០១៧នេះ គឺមាន៦៥នាក់ដែលស្លាប់ ក្នុងឆ្នាំនេះ។ តួលេខនេះថយចុះ១៨ភាគរយ ប្រៀបនឹងឆ្នាំ២០១៦ ប៉ុន្តែ អ្នកកាសែតនៅតែរងការគំរាមធ្ងន់ធ្ងរ ក្នុងអាជីពរបស់ពួកគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
យោងតាមអង្គការអ្នកកាសែតគ្មានព្រំដែនRSF អ្នកកាសែតស្លាប់ ក្នុងឆ្នាំ២០១៧នេះ មាន៦៥នាក់ ក្នុងនោះ ៥០នាក់ជាអ្នកកាសែតអាជីព ហើយអ្នកផ្សេងទៀត ជាអ្នកសរសេរក្នុងវេបសាយ និងជាដៃគូរបស់អ្នកអ្នកកាសែត។ ក្នុងចំណោមពួកគេ មាន៣៩នាក់ ត្រូវបានគេសម្លាប់ រឺរងការវាយប្រហារដោយចេតនា។ ២៦នាក់ទៀត ស្លាប់ក្នុងពេលបំពេញការងារ។
តួលេខអ្នកសារព័ត៌មានរងគ្រោះថយចុះ ដោយសារមានយុទ្ធនាការផ្សព្វផ្សាយពីសារៈសំខាន់ក្នុងការការពារជីវិតអ្នកកាសែត ពិសេសគឺយុទ្ធនាការរៀបចំដោយអង្គការអន្តរជាតិនិងសារព័ត៌មានខ្លួនឯងតែម្តង។ តួលេខជនរងគ្រោះជាអ្នកកាសែតថយចុះ ក៏ដោយសារប្រទេសដែលរងសង្គ្រាម ដូចជាស៊ីរី រឺក៏អ៊ីរ៉ាក់នោះ លែងមានអ្នកកាសែតច្រើនទៀតដែរ។ ឆ្នាំ២០១៧នេះ ស៊ីរីនៅតែជាប្រទេសដែលអ្នកសារព័ត៌មានប្រឈមគ្រោះថ្នាក់ខ្លាំងបំផុត។
ដោយឡែក ក្នុងប្រទេសមានសន្តិភាពដូចជាម៉ិចស៊ិក អ្នកកាសែតក៏នៅតែត្រូវប្រឈមការគំរាមអាយុជីវិត ពិសេសអ្នកដែលសរសេរស៊ើបអង្កេតអំពើពុករលួយក្នុងនយោបាយ រឺក៏ឧក្រិដ្ឋកម្មគ្រឿងញៀនជាដើម។ ពួកគេត្រូវបានគេគំរាម រហូតដល់ធ្វើឃាតក៏មាន។ អ្នកកាសែតនៅម៉ិចស៊ិកមួយចំនួនបានសម្រេចឈប់ធ្វើការងារនេះតទៅទៀត រឺក៏ចាកចេញពីម៉ិចស៊ិកតែម្តង។
ថ្ងៃអង្គារនេះ អង្គការអ្នកកាសែតគ្មានព្រំដែនបានបង្ហាញផងដែរ នូវតួលេខអ្នកកាសែតដែលត្រូវគេឃុំខ្លួន គឺមានដល់ទៅ៣២៦នាក់។ ចិនមានអ្នកកាសែតជាប់ឃុំច្រើនជាងគេ គឺមាន៥២នាក់។ បន្ទាប់មកមាន៤៣នាក់ជាប់ឃុំ នៅតួកគី ២៤នាក់នៅស៊ីរី ២៣នាក់នៅអ៊ីរ៉ង់ ហើយ១៩នាក់ទៀត នៅវៀតណាម។ ក្រៅពីនេះ អ្នកកាសែត៥៤នាក់ កំពុងត្រូវក្រុមប្រដាប់អាវុធរឺក៏ក្រុមភេរវជនរដ្ឋអ៊ីស្លាមចាប់ជាចំណាប់ខ្មាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ