បារាំង៖សារចូលឆ្នាំសកលរបស់លោកម៉ាក្រុងផ្តោតលើប្រធានបទសង្គម និងយុទ្ធនាការប្រឆាំងភេរវនិយម
នៅក្នុងប្រទេសបារាំង លោកប្រធានាធិបតីអេម៉ានុយអែល ម៉ាក្រុងបានថ្លែងសារជូនពរពលរដ្ឋនាយប់ថ្ងៃអាទិត្យ ទី៣១ ធ្នូ ឆ្នាំ ២០១៧។ នៅក្នុងសារជូនពរនោះ លោកម៉ាក្រុងបានបញ្ជាក់ជាថ្មីពីការប្តេជ្ញាចិត្តរបស់លោកក្នុងការបន្តកំណែទម្រង់ដូចដែលបានសន្យានាសម័យឃោសនាបោះឆ្នោត ពិសេសក្នុងវិស័យការងារ និងវិស័យសង្គម។ ទន្ទឹមគ្នានេះ លោកម៉ាក្រុងក៏បានអះអាងថា ឆ្នាំ ២០១៨ ជាឆ្នាំដែលត្រូវបន្តយុទ្ធនាការប្រយុទ្ធប្រឆាំងនឹងភេរវនិយមនៅក្នុងទឹកដីបារាំង និងនៅក្នុងពិភពលោក។
ចុះផ្សាយនៅថ្ងៃ៖
ស្តាប់ - ០១:២៦
« ឆ្នាំ ២០១៨ យើងនឹងមានបេសកម្មប្រយុទ្ធជាច្រើន និងសកម្មភាពកំណត់ច្បាស់លាស់ដែលត្រូវបំពេញនៅលើឆាកអន្តរជាតិ។ យុទ្ធនាការប្រយុទ្ធប្រឆាំងនឹងពួកអ៊ីស្លាមនិយមជ្រុលនៃអង្គការរដ្ឋអ៊ីស្លាម នៅក្នុងតំបន់ស្ហាអែល និងនៅផ្ទៃក្នុងប្រទេសបារាំង។
ក្នុងន័យនេះ និងនៅក្នុងសារយប់នេះ ខ្ញុំសូមផ្ញើសេចក្តីនឹករលឹកដល់កម្លាំងទាហានរបស់យើងដែលពេលនេះកំពុងឈរជើងបំពេញបេសកម្មនៅលើសមរភូមិប្រយុទ្ធ។ ខ្ញុំមានការគិតដល់មិត្តរួមការងាររបស់ពួកគេដែលបានបាត់បង់ជីវិតនៅក្នុងឆ្នាំ ២០១៧ នេះ។ យើងនឹងទទួលជោគជ័យនៅក្នុងយុទ្ធនាការប្រយុទ្ធប្រឆាំងនឹងភេរវនិយម។
ខ្ញុំក៏សូមសម្តែងការគោរពចំពោះប៉ូលិស និងកងអាវុធហត្ថដែលកំពុងបំពេញបេសកកម្មប្រឆាំងនឹងពួកអ៊ីស្លាមនិយមជ្រុល និងបានការពារសុវត្ថិភាពរបស់លោក អ្នកជារៀងរាល់ថ្ងៃ។ ក៏ប៉ុន្តែ គឺសន្តិភាពដែលយើងត្រូវការសម្រាប់ពិភពលោកទាំងមូល។ មានន័យថា ការងារមិនអាចខ្វះបានមួយនេះពិតជាដើម្បីសន្តិសុខរបស់យើង តែវាក៏ជាបេសកកម្មសកលរបស់បារាំងផងដែរ។
ការងារមួយនេះ គឺដើម្បីធានាស្ថិរភាពរបស់រដ្ឋទាំងអស់ និងធានាឲ្យបាននូវការគោរពចំពោះក្រុមជនជាតិភាគតិចទាំងអស់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ