ក្រុមហ៊ុនAirbusធូរស្រាលចិត្ត ក្រោយអេមីរ៉ាតកុម្ម៉ង់ទិញយន្តហោះ៣៦គ្រឿង
ក្រុមហ៊ុនអេមីរ៉ាតបានកុម្ម៉ង់ទិញយន្តហោះ៣៦គ្រឿង ពីក្រុមហ៊ុន Airbus ក្នុងតម្លៃទឹកប្រាក់១៦ពាន់លានដុល្លារ ធ្វើអោយ Airbus ធូរស្រាលចិត្តមកវិញ ព្រោះការកុម្ម៉ង់នេះអាចជួយអោយអ៊ែរប៊ុសធានាកម្មវិធីរបស់ខ្លួន យ៉ាងហោចក៏បាន១០ឆ្នាំទៅមុខទៀតដែរ។
ចុះផ្សាយនៅថ្ងៃ៖ កែប្រែថ្ងៃទី៖
ក្រុមហ៊ុនអេមីរ៉ាតកុម្ម៉ង់យន្តហោះ ប្រភេទAirbus A380 ពេលនេះ ធ្វើអោយក្រុមហ៊ុនអ៊ែរប៊ុសត្រេកអរមិនតិចទេ ព្រោះ២ឆ្នាំមកនេះ អ៊ែរប៊ុសមិនបានទទួលការកុម្ម៉ង់ទិញអ្វីថ្មីទេ។ ការ ផលិតត្រូវបានកាត់បន្ថយ។ ដូច្នេះ អេមីរ៉ាតធ្វើអោយអ៊ែរប៊ុសមានដង្ហើមឡើងវិញ អាចធានាស្ថិរភាពនៃដំណើរការផលិតរបស់ខ្លួនបានប្រហែល១០ឆ្នាំថែមទៀត។ ក្រុមហ៊ុនអ៊ែរប៊ុសរង់ចាំការកុម្ម៉ង់ទិញពីអេមីរ៉ាត តាំងតែពីពេលមានពិព័រណ៌ឧស្សាហកម្មយន្តហោះ នៅឌូបៃ ខែវិច្ឆិកាម្ល៉េះ ឥឡូវ អ៊ែរប៊ុសបានសម្រេចបំណងហើយ។
គិតទាំងការកុម្ម៉ង់ទិញពេលនេះ អេមីរ៉ាតបានកុម្ម៉ង់យន្តហោះ Airbus A380 ១៧៨គ្រឿងហើយ ក្នុងនោះមានជាង១០០គ្រឿង ត្រូវបានបញ្ជូនអោយអេមីរ៉ាតហើយដែរ។ ក្រុមហ៊ុនអ៊ែរប៊ុសសង្ឃឹមថា នឹងមានក្រុមហ៊ុនផ្សេងៗទៀត មកទិញយន្តហោះខ្លួនយកទៅប្រើដូចគ្នាដែរ។ អ៊ែរប៊ុសបន្តអួតសរសើរពីគុណភាពយន្តហោះខ្លួន ថាអាចផ្ទុកអ្នកដំណើរ៥៧៥នាក់ ហើយអាចធ្វើដំណើរចំងាយ១ម៉ឺន៥ពាន់២០០គីឡូម៉ែត្រ។
ដោយឡែក អ៊ែរប៊ុសមិនបានទទួលដំណឹងល្អប៉ុន្មានទេ ពីខាងអ៊ីរ៉ង់ ទាក់ទងកិច្ចសន្យាទិញយន្តហោះ១០០គ្រឿង តម្លៃទឹកប្រាក់២០ពាន់លានដុល្លារ កន្លងមក។ អ៊ីរ៉ង់បារម្ភថា អ៊ែរប៊ុសមិនអាចសម្រេចកិច្ចសន្យានេះបាន ដោយសារតែអាមេរិកគំរាមដកខ្លួនពីកិច្ចព្រមព្រៀងនុយក្លេអ៊ែរអ៊ីរ៉ង់ ដែលបានចុះហត្ថលេខាកាលពីឆ្នាំ២០១៥នោះ។ មូលហេតុគឺថា អ៊ែរប៊ុសជាក្រុមហ៊ុនអឺរ៉ុបក៏ពិតមែន ប៉ុន្តែ អ៊ែរប៊ុសត្រូវការការអនុញ្ញាតពីខាងហិរញ្ញវត្ថុអាមេរិក ទាក់ទងនឹងការបញ្ជូនទៅអោយអ៊ីរ៉ង់ ព្រោះថា សម្ភារខ្លះដែលប្រើសម្រាប់ផលិតយន្តហោះ ត្រូវបានគេផលិតនៅសហរដ្ឋអាមេរិក។ ដូច្នេះ ខាងហិរញ្ញវត្ថុអាមេរិកអាចរារាំងកុងត្រាទិញលក់រវាងអ៊ែរប៊ុសនិងអ៊ីរ៉ង់ ធ្វើអោយអ៊ែរប៊ុសខាតការរកស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ