សហគមន៍អន្តរជាតិសន្យាជួយជំនួយជាច្រើនពាន់លានដុល្លារសម្រាប់ការកសាងប្រទេសអ៊ីរ៉ាក់
ក្រុមប្រទេសដែលជាសម្ព័ន្ធមិត្ររបស់អ៊ីរ៉ាក់ បានសន្យានៅថ្ងៃពុធម្សិលមិញ ថានឹងផ្តល់ថវិកាចំនួនជាច្រើនពាន់លានដុល្លារ សម្រាប់ជាប្រាក់កំចី និង វិនិយោគ អោយដល់អ៊ីរ៉ាក់នៅក្នុងការកសាងប្រទេសឡើងវិញ ៣ ឆ្នាំបន្ទាប់ពីសង្គ្រាមបំផ្លិចបំផ្លាញយ៉ាងសម្បើមអស្ចារ្យនៅក្នុងប្រទេសប្រឆាំងទល់នឹងក្រុមជីហាតនៃរដ្ឋអ៊ីស្លាមរួចមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
នៅក្នុងថ្ងៃទី៣និងដែលជាថ្ងៃចុងក្រោយនៃសន្និសីទអន្តរជាតិនៅ ប្រទេស Koweit ស្តីពី ការកសាងប្រទេសអ៊ីរ៉ាក់ឡើងវិញ ក្រុមប្រទេសដែលជាសម្ព័ន្ធមិត្តរបស់អ៊ីរ៉ាក់ បានសន្យាថានឹងជួយដល់ប្រទេសនេះ នូវថវិកាប្រមាណជិត ២ម៉ឺន ៥០០០លានដុល្លារ។
ទីក្រុងបាកដាដវិញ បានទន្ទឹងរង់ចាំយ៉ាងអន្ទះសារណាស់ ជំនួយពីសហគមន៍អន្តរជាតិ ដើម្បីប្រឈមមុខនឹងការកសាងយ៉ាងសម្បើមអស្ចារ្យ នូវហេដ្ឋារចនាសម្ព័ន្ធនៅក្នុងប្រទេសរបស់ខ្លួនឡើងវិញ ដែលគិតជាទឹកប្រាក់ មានចំនួន ប្រមាណជា ៨ម៉ឺន៨០០០ លានដុល្លារអាមេរិក។
នៅថ្ងៃពុធម្សិលមិញ អគ្គលេខាធិការនៃអ.ស.ប.លោក Antonio Guterres បានអំពាវនាវដល់សហគមន៍អន្តរជាតិ ឲ្យជួយគាំទ្រនៅក្នុងកិច្ចខិតខំប្រឹងប្រែងលើ ការកសាងប្រទេសអ៊ីរ៉ាក់ឡើងវិញ។ លោក Guterres បានថ្លែងទៀតថា ពិភពលោកទាំងមូល ត្រូវតែជួយដល់អ៊ីរ៉ាក់ដែលបានតស៊ូប្រយុទ្ធប្រឆាំងទល់នឹងការគំរាមពិភពលោក ពីសំណាក់ពួកជីហាតនៃអង្គការរដ្ឋអ៊ីស្លាម។ ហើយពេលនេះ គឺជាពេលវេលាដែលពិភពលោក ត្រូវតែសម្តែងនូវការដឹងគុណនិងសាមគ្គីភាពរបស់ខ្លួនជាមួយពលរដ្ឋអ៊ីរ៉ាក់-នេះជាការលើកឡើងរបស់លោក Guterres។
គួរបញ្ជាក់ថា ជំនួយភាគច្រើនដែលសន្យាមកទល់ពេលនេះ គឺបានមកពីអង់គ្លេសនិងតួកគី ដែលជាវិភាគទាន បែងចែក ជាប្រាក់កំចីផងនិងការធ្វើវិនិយោគផង។
ចំណែក ប្រមុខការទូតរបស់សហភាពអឺរ៉ុប លោកស្រី Federica MOgherini វិញ បានជូនដំណឹងអំពីការគាំទ្ររបស់អឺរ៉ុបដែរ នៅក្នុងទឹកប្រាក់ចំនួន ៤០០លានដុល្លារសម្រាប់គម្រោងមនុស្សធម៌នានានិងការអភិវឌ្ឈន៍។
អគ្គនាយិការអង្គការ UNESCO លោកស្រី Audrey Azoulay វិញ បានថ្លែងសង្កត់ជាពិសេសទៅលើសារៈសំខាន់នៃការសិក្សាជាបន្ទាន់និងកិច្ចការពារបេតិកភ័ណ្ឌរបស់ប្រទេសអ៊ីរ៉ាក់ដែលត្រូវបានខូចខាតខ្ទេចខ្ទាំដោយសារ ការវាយប្រយុទ្ធគ្នាឥតស្រាកស្រាន្ត នៅក្នុងការប្រឆាំងទល់នឹងអង្គការរដ្ឋអ៊ីស្លាម។
រីឯប្រទេសបារាំងវិញ តាមរយៈរដ្ឋមន្ត្រីការបរទេសលោក Jean-Yves Le Drian កាលពីថ្ងៃអង្គារមុន បានថ្លែងបញ្ជាក់ពីការចូលរួមចំណែករបស់ប្រទេសបារាំងនៅក្នុងការកសាងប្រទេសអ៊ីរ៉ាក់ដែរ។ ក្រៅពីបា្រក់កំចីចំនួន៤៣០លានអឺរ៉ូដែលបានផ្តល់អោយដល់ទីក្រុងបាកដាតនៅឆ្នាំ ២០១៧ ទីក្រុងប៉ារីសនឹងជួយហិរញ្ញទានដល់អ៊ីរ៉ាក់ទៀត នៅលើគំរោងនានា ដូចជា នៅក្នុង ផ្នែកទឹក ថាមពលនិងការស្តារឡើងវិញនៅវិស័យកសិកម្ម តាមរយៈទីភ្នាក់ងារអភិវឌ្ឈន៍បារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ