រុស្ស៊ីខ្វល់សែនខ្វល់នឹងការកើនឡើងនៃឥទ្ធិពលអង្គការរដ្ឋអ៊ីស្លាមនៅអាហ្វហ្កានីស្ថាន
រុស្ស៊ីខ្វល់សែនខ្វល់នឹងដំណើររុលទៅមុខនៃអង្គការរដ្ឋអ៊ីស្លាមក្នុងប្រទេសអាហ្វហ្កានីស្ថាន ជាទីដែលការវាយប្រហារនិងអំពើភេរវកម្មប្រព្រឹត្តទៅកាន់តែញឹកញយ។ សេចក្តីនេះបន្លឺឡើងនៅថ្ងៃអង្គារម្សិលមិញដោយលោកប្រមុខការទូតរុស្ស៊ី ស៊ែរហ្គៃ ឡាវ្រ៉ូវ ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
"យើងព្រួយកង្វល់មែនទែន នឹងអ្វីៗដែលកំពុងប្រព្រឹត្តទៅ នៅអាហ្វហ្កានីស្ថាន ហើយខ្វល់សែនខ្វល់ នឹងការកើនឡើងនៃឥទ្ធិពលអង្គការជីហាដ “រដ្ឋអ៊ីស្លាម" នៅទីនោះ -សេចក្តីនេះ ថ្លែងដោយលោករដ្ឋមន្ត្រី ការបរទេសរុស្ស៊ី ស៊ែរហ្គៃ ឡាវ្រ៉ូវ ក្នុងសន្និសីទសារព័ត៌មាន បន្ទាប់ពីគាត់បានទទួលជួបចរចា នៅក្រុងម៉ូស្គូ ជាមួយសមភាគីប៉ាគីស្ថាន លោក Khawaja Muhammad Asif ។
ប្រមុខការទូតរុស្ស៊ី បន្ថែមថា ៖ យើងពិបាកជឿណាស់ លើរបៀបដែលសម្ព័ន្ធអន្តរជាតិក្រោមការដឹកនាំរបស់ សរអា វាយតម្លៃអំពីការគម្រាមនេះក្នុងប្រទេសអាហ្វហ្កានីស្ថាន និងលើវិធានការ ដែលសម្ព័ន្ធនេះ កំពុងចាត់ ដើម្បី លុបបំបាត់គ្រោះថ្នាក់នេះ។
តាមលោកឡាវ្រ៉ូវ វត្តមានពួកច្បាំងជីហាដនៃ”រដ្ឋអ៊ីស្លាម” នៅប៉ែកខាងជើងនិងខាងកើត អាហ្វហ្កានីស្ថាន ដែលមានគ្នាប្រមាណ ១.០០០ នាក់ ឯណោះ គឺជាគ្រោះថ្នាក់មែនពិតដល់សន្តិសុខប្រទេសជិតខាង។ ប្រមុខការទូតរុស្ស៊ី ចង្អុលឲ្យឃើញតមកទៀត ៖ គួរអោយស្តាយ ដែលពួកយោធាអាមេរិកាំងនិងអូតង់ ខិតខំ តាមគ្រប់មធ្យោបាយ ធ្វើស្ងៀមស្ងាត់ និង បដិសេធ ទៅផង អំពីគ្រោះថ្នាក់នេះ។
ប៉ុន្មានសប្តាហ៏ចុងក្រោយ អង្គការ”រដ្ឋអ៊ីស្លាម” និងពួកតាលីបង់ បានបង្កើនយ៉ាងខ្លាំង ប្រតិបត្តិការវាយលុក នៅអាហ្វហ្កានីស្ថាន និងអំពើភេរវកម្មផ្ទួនៗ បណ្តាលអោយស្លាប់និងរបួស មនុស្សរាប់រយនាក់ បូកទាំងការវាយ ប្រហារ ទៅលើសណ្ឋាគារដ៏ធំក្នុងក្រុង កាប៊ូល កាលពីមួយខែមុន គឺ ថ្ងៃ ២០ មករា។
រុស្ស៊ី បានបរិហារអាក្រាត ជាច្រើនលើកទៅហើយ យុទ្ធសាស្ត្រអាមេរិកាំងនៅអាហ្វហ្កានីស្ថាន ដោយចាត់ទុក យុទ្ធសាស្ត្រនេះថា”គ្មានអនាគត”ទេ ដ្បិតវាអាងជាបឋម លើកម្លាំងអាវុធ។
ម៉ូស្គូ ពីចំណែកខ្លួន អំពាវនាវឲ្យបញ្ចូលពួកតាលីបង់ ទៅក្នុងកិច្ចចរចាសន្តិភាពត្រង់ផ្ទាល់ជាមួយនឹង រដ្ឋាភិបាលអាហ្វហ្កានីស្ថាន ហើយស្នើរដ្ឋធានីរុស្ស៊ី ជា កន្លែងសម្រាប់កិច្ចសន្ទនា” ស្ថាបនា” រវាងភាគីយុទ្ធ បដិបក្ខអាហ្វហ្កាន។
អាជ្ញាធររុស្ស៊ី ប្រាថ្នាជាពិសេស គឺ ទប់ដំណើររុលទៅមុខនៃពួកជីហាដ នៅអាហ្វហ្កានីស្ថាន ដោយបារម្ភខ្លាច ក្រែង ពួកនោះជ្រៀតចូលមកក្នុង បណ្តាអតីតសាធារណរដ្ឋសូវៀតតំបន់អាស៊ីកណ្តាលនៅជិតខាង តំបន់ ដែលតែងត្រូវម៉ូស្គូ ចាត់ទុកជា ចំណែកមួយនៃដែនឥទ្ធិពលខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ