ប៉ារីសរងគ្រោះជាថ្មីដោយផ្សែងពុលបរិយាកាស
ប៉ារីស រដ្ឋធានីប្រទេសបារាំងនៅសប្តាហ៍នេះ រងគ្រោះធ្ងន់ធ្ងរ ដោយសារតែផ្សែងពុល បរិយាកាសគ្របដណ្តប់ក្រាសឃ្មឹក។ ស្ថានភាពនឹងកាន់តែអាក្រក់ ចាប់ពីថ្ងៃសៅរ៍នេះ រហូតដល់សប្តាហ៍ក្រោយ ដោយសារតែអាកាសធាតុ កាន់ចុះត្រជាក់ ក្នុងប្រទេសបារាំង។ អាជ្ញាធរក្រុងប៉ារីស នៅថ្ងៃសុក្រម្សិលមិញ បានអំពាវនាវឲ្យរដ្ឋាភិបាលចាត់វិធានការបន្ទាន់ ដើម្បីការពារសុខភាព ជីវិតប្រជាជនក្រុងប៉ារីស។
ចុះផ្សាយនៅថ្ងៃ៖ កែប្រែថ្ងៃទី៖
វិធានការបន្ទាន់ដែលសាលាក្រុងប៉ារីស ចង់បានពីរដ្ឋាភិបាលបារាំង គឺការចេញបញ្ជាហាម ឃាត់មិនឲ្យរថយន្តចាស់ៗ (ផលិតមុនឆ្នាំ ១៩៩៧) ដែលបញ្ចេញផ្សែងពុលខ្លាំង ធ្វើចរាចរណ៍ ចូលក្នុងក្រុងប៉ារីស។
រថយន្ត ចង្រ្កានដុតឧស យកកំដៅ នៅរដូវត្រជាក់ ហើយនិងកសិកម្ម គឺជាប្រភពបញ្ចេញឧស្ម័នផ្សែងពុល ដែលមានបង្កប់ដោយសារធាតុល្អិតឆ្មារ PM10។ នៅថ្ងៃព្រហស្បតិ៍ Airparif ស្ថាប័នតាមដានគុណភាពខ្យល់ បានវាយតម្លៃថា បរិមាណសារធាតុល្អិតឆ្មារ បានកើនឡើងដល់៦៦មីក្រូក្រាម ក្នុងមួយម៉ែត្រគូបខ្យល់ ក្នុងទីក្រុងប៉ារីស និង១០០មីក្រូក្រាម ក្នុងមួយម៉ែត្រគូប នៅក្នុងតំបន់ជុំវិញប៉ារីស។ ជាបរិមាណទ្វេដង លើសកម្រិត ដែលកំណត់ដោយអង្គការសុខភាពពិភពលោក។
អង្គការសុខភាពពិភពលោកណែនាំឲ្យគេរងទទួលសារធាតុល្អិតឆ្មារក្នុងខ្យល់ពុលបរិយាកាសត្រឹមតែ៥០មីក្រូក្រាម និងត្រឹមតែបីដងប៉ុណ្ណោះ ក្នុងមួយឆ្នាំ។ បើគេស្រូបសារធាតុល្អិតឆ្មារ លើសពីចំនួននេះ និងញយដង គេនឹងប្រឈមរងគ្រោះថ្នាក់សុខភាពធ្ងន់ធ្ងរ។ សារធាតុល្អិតឆ្មារដែលមាននៅក្នុងផ្សែងពុលបរិយាកាស ជាដើមហេតុ ធ្វើឲ្យគេប្រឈមកាន់តែខ្លាំងនឹងគ្រោះថ្នាក់ដាច់សរសៃឈាមខួក្បាល ជម្ងឺផ្លូវដង្ហើម ឬមហារីកជាដើម។
សូមអាន៖អង្គការសុខភាពពិភពលោក៖ផ្សែងពុលក្នុងបរិយាកាសសម្លាប់មនុស្ស ៧លាននាក់
តាមស្ថាប័នតាមដានគុណភាពខ្យល់ប៉ារីស Airparif តាំងពីដើមឆ្នាំនេះប៉ារីសបានជួបស្គាល់បីដងមកហើយ កម្រិតផ្សែងពុលខ្ពស់។ ភាគច្រើននៃផ្សែងពុលបរិយាកាស នៅប៉ារីស និងក្នុងតំបន់ជុំវិញ មានដំណើរបក់មកពីប្រទេសអឺរ៉ុបខាងកើត ដូចជាអាល្លឺម៉ង់ ឬប៉ូឡូញជាដើម។
នៅសប្តាហ៍នេះ តុលាការអឺរ៉ុប ទើបបានសម្រេចថ្កោលទោសរដ្ឋាភិបាលប៉ូឡូញ ដែលបានប្រើរោងចក្រ អគ្គិសនី ដើរដោយធ្យូងថ្ម ប្រភពបញ្ចេញផ្សែងពុលបរិយាកាស។ អាជ្ញាធរប៉ារីសបារម្ភថា កត្តាអាកាសធាតុដែលនឹង ចុះត្រជាក់ ខ្លាំង រហូតក្រោមសូន្យ នៅសប្តាហ៍ក្រោយ នឹងធ្វើឲ្យផ្សែងពុលបរិយាកាស ដែលបក់មកពីអឺរ៉ុបខាងកើត នៅជាប់នឹងដី នៅបន្តគ្របដណ្តប់ ក្រុងប៉ារីស យូរថ្ងៃ ទៅទៀត ដែលជាគ្រោះថ្នាក់ខ្លាំងដល់សុខភាពប្រជាជនប៉ារីស ជាពិសេសមនុស្សចាស់ និងកុមារ។ តាមមន្រ្តីរដ្ឋាភិបាលបារាំង លោកស្រី Brune Poirson ទទួលបន្ទុកផ្នែកបរិស្ថាន ផ្សែងពុលបរិយាកាសធ្វើឲ្យមនុស្ស៤ម៉ឺននាក់ ស្លាប់មុនអាយុ ក្នុងប្រទេសបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ