ប្រមុខដឹកនាំបារាំងអាល្លឺម៉ង់និងរុស្ស៊ីជជែកគ្នាពីការអនុវត្តបទឈប់បាញ់នៅស៊ីរី
ក្រោយពីក្រុមប្រឹក្សាសន្តិសុខអង្គការសហប្រជាជាតិបានអនុម័តជាឯកច្ឆ័ន្ទ នៅយប់មិញ សេចក្តីសម្រេចទាមទារឱ្យមានបទឈប់បាញ់នៅស៊ីរី ប្រធានាធិបតីបារាំង លោក អេម៉ាណុយអែល ម៉ាក្រុង និងប្រមុខរដ្ឋាភិបាលអាល្លឺម៉ង់ លោកស្រី អង់ហ្គឺឡា មែរកិល នឹងពិភាក្សាជាមួយប្រធានាធិបតីរុស្ស៊ី នៅថ្ងៃនេះ អំពីការអនុវត្តបទឈប់បាញ់។ នេះបើតាមសេចក្តីថ្លែងការណ៍របស់វិមានប្រធានាធិបតីបារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
“ក្រុមប្រឹក្សាសន្តិសុខអង្គការសហប្រជាជាតិ បានអនុម័ត ជាឯកច្ឆ័ន្ទ សេចក្តីសម្រេច ទាមទារឱ្យមានបទឈប់បាញ់ រយៈពេល ៣០ថ្ងៃ នៅស៊ីរី » នេះជាសេចក្តីរំលឹករបស់វិមានប្រធានាធិបតីបារាំង មុននឹងប្រកាសថា លោកប្រធានាធិបតីម៉ាក្រុង និងលោកស្រីមែរកិលប្រមុខរដ្ឋាភិបាលអាល្លឺម៉ង់ នឹងពិគ្រោះយោបល់ជាមួយប្រធានាធិបតីរុស្ស៊ី ពូទីន ស្តីអំពីដំណើរការអនុវត្តសេចក្តីសម្រេច និងស្តីអំពីផែនទីចង្អុលផ្លូវនយោបាយដ៏ចាំបាច់សម្រាប់ស្ថារសន្តិភាពជានិរន្តឱ្យស៊ីរី។
បើតាមសេចក្តីថ្លែងការណ៍ បារាំងនឹងចាំយាមមើលការអនុវត្តដោយជាក់ស្តែងបទឈប់បាញ់ យ៉ាងហ្មត់ចត់ ថាពិតជាត្រូវបានគោរព ហើយក្បួនដឹកជំនួយមនុស្សធម៌អាចទៅដល់កន្លែងរងគ្រោះ។ បារាំងក៏បានអំពាវនាវឱ្យប្រទេសពាក់ព័ន្ធទាំងអស់ ជាពិសេស រុស្ស៊ី តួកគី និងអ៊ីរ៉ង់ ជួយទ្រទ្រង់ដំណើរការបទឈប់បាញ់។ នៅថ្ងៃអង្គាររដ្ឋមន្ត្រីក្រសួងការបរទេសបារាំង នឹងធ្វើដំណើរទៅក្រុងម៉ូស្គូ ដើម្បីពិនិត្យរួមគ្នាជាមួយសមភាគីរុស្ស៊ីអំពីមធ្យោបាយនៃដំណើរការបទឈប់បាញ់ផង និងផ្តល់សន្ទុះអន្តរជាតិថ្មីដល់ការស្វែងរកដំណោះស្រាយនយោបាយ។
សេចក្តីសម្រេចទាមទារឱ្យមានបទឈប់បាញ់នៅស៊ីរី ដោយគ្មានកាលកំណត់ និងសម្រាប់រយៈពេល៣០ថ្ងៃជាប់គ្នា ដើម្បីចែកចាយនិងផ្តល់មនុស្សធម៌ដល់ជនស៊ីវិល ត្រូវបានលើកពេលជាច្រើនសា មុនអាចអនុម័តបានជាឯកច្ឆ័ន្ទនៅយប់មិញ។ ប៉ុន្តែ បើតាមអង្គការក្រៅរដ្ឋាភិបាល ស្នូរទម្លាក់គ្រាប់បែកនៅលាន់ឮទៀតនៅព្រឹកថ្ងៃអាទិត្យនេះ ! រដ្ឋាភិបាលស៊ីរីបានដឹកនាំ។ អ៊ីរ៉ង់និងស៊ីរី បានប្រកាសទទួលយកនិងគោរពតាមសេចក្តីសម្រេចរបស់ក្រុមប្រឹក្សា តែបន្តធ្វើការវាយប្រហារ នៅតាមជាយក្រុងដាម៉ាស ដែលកាន់កាប់ដោយពួកភេរវនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ