តំបន់មេឌីទែរ៉ាណេជួបភាពតានតឹង ក្រោយការរកឃើញជង្រុកឧស្ម័នធម្មជាតិ
ចុះផ្សាយនៅថ្ងៃ៖
ស្តាប់ - ០៤:៤៨
នាវាចម្បាំង ការគំរាមកំហែង កិច្ចសន្យាតម្លៃរាប់ពាន់លានដុល្លារអាមេរិក ... ការរកឃើញតំបន់មានផ្ទុកធនធានឧស្ម័នធម្មជាតិ នៅក្នុងសមុទ្ទមេទីទែរ៉ាណេខាងកើត នាពេលថ្មីៗនេះ បានបំផុតឱ្យមានក្តីសង្ឃឹមដ៏ធំធេងផង ប៉ុន្តែក៏ជាដើមហេតុបង្កឱ្យមានភាពតានតឹង ក្នុងតំបន់ដែលកំពុងប៉ោងតឹងស្រាប់ផង។
គេនៅមិនទាន់ដឹងថា តើតំបន់មានធនធានធម្មជាតិឧស្ម័នរកឃើញថ្មី មានបិរមាណឧស្ម័នទំហំប៉ុណ្ណាឱ្យពិតប្រាកដនៅឡើយទេ ! តែប្រយោជន៍ថាមពលធំណាស់ ! ការរកឃើញប្រភពថ្មីនេះ អាចនឹងជួយ ស្ហ៊ីប អេហ្ស៊ីប អ៊ីស្រាអែល និងលីបង់ ឱ្យមានឯករាជ្យលើផ្នែកថាមពល និងក្លាយជាប្រទេសនាំចេញឧស្ម័ន ទៀតផង។ ប៉ុន្តែដំណឹងនេះបានបំផុសឱ្យមាន រួចស្រេចទៅហើយ ជម្លោះស្តីពីសិទ្ធនិងព្រំដែនទឹក រវាងបណ្តាប្រទេសនៅក្នុងតំបន់នោះ។
មានទីតាំងនៅភាគខាងកើតបំផុតនៃសមុទ្ទមេឌីទែរ៉ាណេ ស្ហ៊ីបដែលមានប្រវត្តិប្រេះឆាពុះជាពីរស្រាប់ (ភាគខាងជើងស្ហ៊ីបតួកគី និងភាគខាងត្បូងជាប្រទេសស្ហ៊ីប) កំពុងគាស់ជម្លោះចំណាស់រាប់ទសវត្សរ៍ឱ្យកកើកឡើងវិញ រហូតហៅឱ្យសហភាពអឺរ៉ុបមកធ្វើជាអាជ្ញាកណ្តាល។ ម្ខាងទៀត ជាសម្ពាធតានតឹងរវាងអ៊ីស្រាអែលនិងលីបង់ដែលកំពុងដណ្តើមតំបន់រកឧស្ម័ននេះដែរ ដោយមានសហរដ្ឋអាមេរិក កំពុងសាកល្បងសម្របសម្រួល។
ស្ហ៊ីប-តួកគី-អេហ្ស៊ីប
ក្រោយពីខកចិត្តនឹងប្រតិបត្តិការរុករកប្រេងនៅតាមបណ្តោយឆ្នេរស្ហ៊ីប ជាបន្តបន្ទាប់តាំងពីឆ្នាំ២០១១មក កាលពីដើមខែ ក្រុមហ៊ុនតូតាល់បារាំងនិងអ៊ីតាលីអេនី បានប្រកាសរកឃើញជង្រុកឧស្ម័នធម្មជាតិដ៏ធំ នៅភាគនិរតីនៃកោះស្ហ៊ីប។ ពីរបីថ្ងៃក្រោយមក នៅពេលដែលនាវាអ៊ីតាលីអេនី បើកសំដៅនៅរកតំបន់មានធនធានឧស្ម័ន ស្ថិតនៅប៉ែកខាងកើត នៃកោះស្ហ៊ីប តែកៀកតំបន់ដែលត្រួតត្រាដោយទាហានតួកគី ដើម្បីផ្តើមការរុករក ស្រាប់តែទាហានតួកគីចេញមកស្ទាក់ ដោយពន្យល់ហេតុផលថា យោធាតួកគីកំពុងជាប់ធ្វើសមយុទ្ធក្នុងតំបន់នោះ។ នៅថ្ងៃសុក្រ នាវាចម្បាំង៥គ្រឿងរបស់តួកគីបានចេញទៅខ្ទប់ផ្លូវទៀត មិនឱ្យនាវាអ៊ីតាលីអាចបន្តដំណើរទៅមុខបាន ដែលវិះតែមានការប្រឈមគ្នា ! នេះបើតាមប្រភពអាជ្ញាធរស្ហ៊ីប។
ពីមុនមកគេធ្លាប់គិតថាប្រសិនបើស្ហ៊ីបមានធនធានថាមពលធម្មជាតិ នោះវានឹងអាចជំរុញឱ្យស្ហ៊ីបងាយបង្រួបបង្រួមគ្នាបាន ប៉ុន្តែថ្ងៃនេះ ការរកឃើញជង្រុកឧស្ម័ន បាតសមុទ្ទ កំពុងតែក្លាយទៅជាឧបសគ្គដ៏ចំបងនៃការចរចារវាងស្ហ៊ីបខាងជើងនិងខាងត្បូងទៅវិញ។
ចូលត្រួតត្រានិងគាំទ្រតំបន់ភាគខាងជើងស្ហ៊ីបតាំងពីឆ្នាំ១៩៧៤មក តួកគី បានទាមទារឱ្យរដ្ឋាភិបាលស្ហ៊ីបដែលទទួលស្គាល់ដោយសហគមន៍អន្តរជាតិ បញ្ឈប់រាល់គ្រប់ការរុករងឧស្ម័ន ដរាបណារកដំណោះស្រាយបង្រួបបង្រួមគ្នាមិនទាន់ចេញ។ ចំណែករដ្ឋាភិបាលស្ហ៊ីប បានស្នើសុំអន្តរាគមន៍ពីសហភាពអឺរ៉ុប ឱ្យជួយធ្វើជាអន្តរការី ដោយយល់ថា តួកគីបានរំលោភច្បាប់អន្តរជាតិ ហើយបានភ្ជាប់ការចរចាបង្រួបបង្រួមកោះទៅនឹងការទម្លាយស្ថានភាពរុករកជង្រុកឧស្ម័ន។
ចំណែកអេហ្ស៊ីប ដែលជាប្រទេសមានប្រភពធនធានឧស្ម័នច្រើនជាងគេនៅក្នុងតំបន់ ក៏បានរងការរិះគន់យ៉ាងខ្លាំងពីសំណាក់តួកគី ដែលប្រឆាំងនឹងកិច្ចព្រមព្រៀងផ្លូវទឹក ចងភ្ជាប់អេហ្ស៊ីបនិងស្ហ៊ីប។
តាមការពិត បើតាមអ្នកវិភាគ តួកគី មិនចង់បានការប្រឈមទេ ! ហើយក៏មិនត្រូវការឱ្យគេផ្ទាត់ទុកម្តុំដែរ ហេតុដូច្នេះហើយបានតួកគីត្រូវតែចេញមុខរារាំង ប្រសិនបើនាវារុករកណាហ៊ានចូលកៀកដែនសេដ្ឋកិច្ចផ្តាច់មុខ ក្បែរកោះស្ហ៊ីបខាងជើងដែលគេត្រួតត្រា ដើម្បីការពារផលប្រយោជន៍ខ្លួន។
សង្គ្រាមឧស្ម័ន លីបង់-អ៊ីស្រាអែល
នៅក្នុងសមុទ្ទមេឌីទែរ៉ាណេខាងកើតនេះដែរ តែចុះទៅភាគខាងត្បូងបន្តិច ក៏មានជង្រុកឧស្ម័នដ៏ក្រាសក្រែល ដែលអ៊ីស្រាអែលបានរកឃើញដំបូងគេ នៅឆ្នាំ២០០៩។ កាលពីថ្ងៃទី១៩ កុម្ភៈកន្លងទៅនេះ អ៊ីស្រាអែលបានចុះកិច្ចព្រមព្រៀងជាប្រវត្តិសាស្ត្រផ្គត់ផ្គង់ឧស្ម័នធម្មជាតិនេះទៅឱ្យអេហ្ស៊ីប ប្រទេសអារ៉ាបតែមួយដែលបានចុះសន្ធិសញ្ញាសន្តិភាពនឹងគ្នា។
ក្រៅអំពីមានទស្សនៈវិស័យចង់ក្លាយជាប្រទេសមានឯករាជ្យថាមពលជាងគេមួយ ការរកឃើញជង្រុកឧស្ម័ននេះ បានផ្តល់ឱកាសឱ្យអ៊ីស្រាអែលបានក្លាយជាប្រទេសនាំចេញឧស្ម័នមកកាន់អឺរ៉ុប និងមានចំណងភ្ជាប់ជាយុទ្ធសាស្ត្រថ្មីនៅក្នុងតំបន់ទៀត។
ប៉ុន្តែការចុះហត្ថលេខាលើកិច្ចសន្យារុករកឧស្ម័ន ជាលើកដំបូងរវាងលីបង់ ជាមួយសម្ព័ន្ធក្រុមហ៊ុនបារាំង អ៊ីតាលី និងរុស្ស៊ី បានមករំខានអ៊ីស្រាអែលណាស់ ព្រោះតំបន់នៃការរុករកនោះ មានមួយភាគស្ថិតក្នុងតំបន់ដែនទឹកជាប់ជម្លោះជាមួយអ៊ីស្រាអែល។
ចលនាហេស្ប៉ូឡាលីបង់ ដែលត្រូវបានអ៊ីស្រាអែលកំចាត់កំចាយកាលពីឆ្នាំ២០០៦ និងដែលមានអាវុធមីស៊ីលអាចបាញ់ដល់តំបន់មានរចនាសម្ព័ន្ធរុករកថាមពលអ៊ីស្រាអែលនោះ បានសន្យាការពារលីបង់ដើម្បីយកឈ្នះក្នុងសង្គ្រាមឧស្ម័ន។
ប៉ុន្តែបើតាមអ្នកវិភាគអ៊ីស្រាអែល ថ្វីបើមានសង្គ្រាមពាក្យ គំរាមសំឡុតគ្នាយ៉ាងណាក្តី ក៏អ៊ីស្រាអែលនិងលីបង់គ្មានហេតុផលអ្វីត្រូវផ្សងព្រេងជាមួយនឹងជម្លោះឡើយ បើយោលទៅសេចក្តីត្រូវការផ្នែកថាមពលរបស់លីបង់ និងកិច្ចសន្យាតម្លៃរាប់ពាន់លានដុល្លាររបស់អ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ