រុស្ស៊ីបានបាញ់សាកល្បងយ៉ាងជោគជ័យ មីស៊ីលថ្មីល្បឿនលឿនជាងសម្លេង ១០ ដង
រុស្ស៊ីទើបបានប្រតិបត្តិការ បាញ់សាកល្បងយ៉ាងជោគជ័យ មីស៊ីលថ្មីដែលហោះដោយល្បឿន លឿនជាងសម្លេងដល់ទៅ ១០ ដង ហើយដែលត្រូវលោកប្រធានាធិបតី វ៉្លាឌីមៀរ ពូទីន ចាត់ទុកជា” អាវុធ មិនចេះចាញ់ “ - ដំណឹងនេះ ប្រកាសថ្ងៃអាទិត្យ ១១ មិនា ដោយ ក្រសួងការពារជាតិរុស្ស៊ី។ ប៉ុន្តែ សម្រាប់ ក្រុងវ៉ាស៊ីនតោនវិញ គឺ នៅមិនទាន់ឃើញមានការផ្លាស់ប្តូរអ្វីណាឡើយ ក្នុងសមត្ថភាពយោធារបស់រុស្ស៊ី។
ចុះផ្សាយនៅថ្ងៃ៖
ស្របនឹងសេចក្តីជូនដំណឹងក្រសួងការពារជាតិរុស្ស៊ី មីស៊ីលនោះ ដែលមានឈ្មោះថា Kinjal ប្រែមក ថា “កាំបិតស្នៀត” ត្រូវបានអោបជាប់នៅខាងក្រោមតួខ្លួនយន្តហោះប្រដេញធុន MiG-31 ដែលបានហោះ ចេញទៅ ពីអាកាសយានដ្ឋាននៃ យោធភូម៏ខាងត្បូង ប្រទេសរុស្ស៊ី។ ការបាញ់សាកល្បង បានប្រព្រឹត្តទៅ ដូចដែលមានគ្រោងទុក ហើយមីស៊ីលល្បឿនលឿនជាងសម្លេងនោះ បានផ្ចាញ់មែនចំលើទីដៅរបស់វា។ មីស៊ីលនេះ បានចូលខ្លួនទៅ ប្រចាំការ នៅឯយោធភូម៏ទក្សិណនេះ តាំងពី ថ្ងៃទី១ ធ្នូ ម៉្លេះ។
ក្នុងវីដេអូរបង្ហោះតាម Youtube ដោយក្រសួងការពារជាតិ ពីឡុតពីរនាក់បង្ហាញពេលមីស៊ីលនេះ ត្រូវបាន ក្រសោប ចូលទៅផ្អោបជាប់នៅក្រោមតួយន្ដហោះនោះ ដែលហោះចេញទៅ ក្រោមសូរបទភ្លេងចម្បាំង។ លុះហោះឡើងដល់កំពស់ជាក់លាក់ យន្ដហោះបានព្រលែងមីស៊ីលនោះឯង ចេញពីក្រោមតួខ្លួនវា រួចមក មីស៊ីលផ្ទាល់ ក៏ហោះដោយល្បឿនលឿនជាងសម្លេងដល់ទៅ ១០ ដង បត់បែនតាមផ្លូវ ដែលគេមិនអាច ទស្សន៍ទាយបាន អាចបញ្ឆោតគ្រប់តែប្រព័ន្ធខែលមីស៊ីលប្រឆាំងមីស៊ីលដែលមានសព្វថ្ងៃ។ ក្រសួងការពារ ជាតិរុស្ស៊ី បន្ថែមថា មីស៊ីល Kinjal ដែលនៅក្នុងលោក គ្មានអាធុននេះ ដូចវាឡើយ គឺទុកសម្រាប់ កំទេច ទីដៅ នៅលើដី ក៏ដូចជា ក្នុងសមុទ្រ ត្រូវចំក្នុងកម្រិតខ្ពស់។
ចំណែកឧបនាយករដ្ឋមន្ត្រី ទទួលបន្ទុកឧស្សាហកម្មយោធា លោកDmitri Rogozine លំអិតថា ដើម្បីឲ្យ វាអាចក្រសោបទៅជាមួយ មីស៊ីលធុននេះ យន្តហោះ ប្រដេញMiG-31 បានរងនូវការកែឆ្នៃ ទៅផង។
លោកប្រធានាធិបតី ពូទីន ក្នុងសារប្រចាំឆ្នាំថ្លែងថ្ងៃ១មិនា ទៅកាន់រដ្ឋសភា បានអះអាងថា មីស៊ីលនេះ ក៏ដូចជា អាវុធថ្មីៗឯទៀតរបស់រុស្ស៊ី ដែលអាចហោះទៅចម្ងាយឥតកំណត់ ដែលល្បឿនហោះវាសុទ្ធតែលឿន ជាងសម្លេង ខ្លះរហូតដល់ ២០ ដងឯណោះ ព្រមទាំងអាវុធបាញ់កាំរស្មីLaser គឺជា “អាវុធមិនចេះចាញ់”។
ម្សិលមិញដែរ ក្នុងដំណើរទស្សនកិច្ចនៅអាណាចក្រOman លោករដ្ឋមន្ត្រីការពារជាតិ សរអាJim Mattis បានថ្លែងជាអាទិ៍ ទៅពួកអ្នកកាសែត ៖ អាវុធថ្មីៗបង្ហាញដោយរុស្ស៊ី មិនផ្លាស់ប្តូរឡើយទស្សនៈយល់ឃើញ របស់យើងដែលថាក្នុងសមត្ថភាពយោធារបស់រុស្ស៊ី គ្មានអ្វីវិវឌ្ឍន៍នាំឲ្យក្រុងវ៉ាស៊ីនតោន ភ្ញាក់ផ្អើល ឡើយ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ