ការបំពុលអតីតចារកិច្ចរុស្ស៊ី៖អង់គ្លេសបណ្តេញមន្ត្រីការទូតរុស្ស៊ី២៣នាក់
កាលពីថ្ងៃអង្គារ អង់គ្លេសទុកពេល២៤ម៉ោងអោយរុស្ស៊ីបំភ្លឺជុំវិញការបំពុលលោកស៊ែរហ្គេយ គ្រីសប៉ាល់ ជាអតីតចារកិច្ចរុស្ស៊ី ឥឡូវនេះផុតឱសានវាទហើយ។ ដូចបានព្រមានទុក លោកស្រីនាយករដ្ឋមន្ត្រីអង់គ្លេស តេរេហ្សា មេ បានប្រកាសទណ្ឌកម្ម ដោយសម្រេចព្យួរទំនាក់ទំនងទ្វេភាគីថ្នាក់កំពូលជាមួយរុស្ស៊ី និងបណ្តេញមន្ត្រីទូតរុស្ស៊ី២៣នាក់ចេញពីអង់គ្លេស។
ចុះផ្សាយនៅថ្ងៃ៖ កែប្រែថ្ងៃទី៖
មន្ត្រីទូតរុស្ស៊ី២៣នាក់ ដែលអង់គ្លេសបណ្តេញចេញនោះ មានពេលមួយសប្តាហ៍ដើម្បីចាកចេញពីអង់គ្លេស។ នៅអង់គ្លេស រុស្ស៊ីមានមន្ត្រីការទូត៥៩នាក់។ ការបណ្តេញមន្ត្រីទូតរុស្ស៊ី និងការព្យួរទំនាក់ទំនងទ្វេភាគីថ្នាក់កំពូលជាមួយរុស្ស៊ី ជាទណ្ឌកម្មរបស់រដ្ឋាភិបាលអង់គ្លេស ចំពោះរុស្ស៊ីដែលមិនបានផ្តល់ចម្លើយយកជាការបាន ដើម្បីបំភ្លឺជុំវិញការបំពុលលោក ស៊ែរហ្គេយ គ្រីសប៉ាល់ និងកូនស្រីយូលីយ៉ា។
ថ្ងៃពុធនេះ នាយករដ្ឋមន្ត្រី លោកស្រីតេរេហ្សា មេ លើកឡើងនៅចំពោះមុខសភាអង់គ្លេសថា គ្មានការសន្និដ្ឋានអ្វីក្រៅតែពីថា រដ្ឋរុស្ស៊ីជាប់សង្ស័យថា ប៉ុនប៉ងធ្វើឃាតលោកគ្រីសប៉ាល់ និងកូនស្រីនោះទេ។ សូមរំលឹកថា អតីតចារកិច្ចរុស្ស៊ី លោកស៊ែរហ្គេយ គ្រីសប៉ាល់ អាយុ៦៦ឆ្នាំ និងកូនស្រីលោក អាយុ៣៣ឆ្នាំ ត្រូវបានគេបំពុលសម្លាប់ កាលពីថ្ងៃ៤មីនា នៅភាគនិរតីអង់គ្លេស។ អង់គ្លេសចាត់ទុកហេតុការណ៍នេះ ថាជាការប្រើកម្លាំងបាយខុសច្បាប់ពីសំណាក់រដ្ឋរុស្ស៊ី ប្រឆាំងអង់គ្លេស។
ក្នុងទណ្ឌកម្មលើរុស្ស៊ីទាក់ទងសំណុំរឿងនេះ អង់គ្លេសក៏លុបចោលផងដែរ មិនអញ្ជើញរដ្ឋមន្ត្រីការបរទេសរុស្ស៊ី លោកស៊ែរហ្កី ឡាវ្រូវ អោយមកទស្សនកិច្ចនៅអង់គ្លេសទៀត។ លើសពីនេះ រដ្ឋមន្ត្រីនិងសមាជិកគ្រួសារក្សត្រអង់គ្លេសក៏មិនទៅជាន់ដីរុស្ស៊ី ដើម្បីចូលរួមការប្រកួតបាល់ទាត់ពិភពលោកនៅរុស្ស៊ី ពាក់កណ្តាលឆ្នាំនេះ។ ការបំពុលលោកគ្រីសប៉ាល់ មិនមែនជាការបំពុលចារកិច្ចរុស្ស៊ីលើកទី១ទេ ក្នុងទឹកដីអង់គ្លេស។ ថ្ងៃពុធនេះ លោកស្រីតេរេហ្សា មេ បានរំលឹកឡើងវិញផងដែរ នូវការបំពុលអតីតចារកិច្ចរុស្ស៊ីមួយរូបផ្សេងទៀត កាលពីឆ្នាំ២០០៦។ កាលនោះ អង់គ្លេសបានដាក់ទណ្ឌកម្មលើរុស្ស៊ីដែរ គឺបានបណ្តេញមន្ត្រីការទូត៤នាក់ និងកាត់បន្ថយការផ្តល់ទិដ្ឋាការដល់មន្ត្រីរុស្ស៊ី រួមទាំងបង្កកទ្រព្យសម្បត្តិជនដែលជាប់សង្ស័យថាបានសម្លាប់អតីតចារកិច្ចរូបនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ