ឧស្សាហកម្មអាវុធរបស់បារាំង បានស្គាល់កំណើននៅលើទីផ្សារអន្តរជាតិ យ៉ាងខ្លាំងនារយៈពេលប៉ុន្មានឆ្នាំចុងក្រោយនេះ (២០១៣-២០១៧)។ បើតាមវិទ្យាស្ថានស្រាវជ្រាវអន្តរជាតិដើម្បីសន្តិភាព Sipri បារាំង ពេលនេះ បានក្លាយប្រទេសនាំចេញអាវុធលំដាប់ទីបីពិភពលោក។ តើបារាំងលក់អាវុធទៅឱ្យប្រទេសណាខ្លះ ? តើមានសព្វាវុធបារាំង មានហានិភ័យធ្លាក់ក្នុងដៃរដ្ឋាភិបាលដែលប្រើអាវុធសម្លាប់ប្រជាជនស៊ីវិលដែរឬទេ?
ពីឆ្នាំ២០១៣ ដល់ឆ្នាំ២០១៧ ទីផ្សារសព្វាវុធនៅលើពិភពលោក បានកើនឡើង ជាលក្ខណៈសកល ក្នុងកំរិត ១០% បើប្រៀបទៅនឹងអាណត្តិ២០០៨-២០១២។ នេះបើតាមរបាយការណ៍របស់វិទ្យាស្ថានស្រាវជ្រាវអន្តរជាតិដើម្បីសន្តិភាព ដែលមានទីស្នាក់ការនៅស្តុកខុម ឬហៅកាត់ថាវិទ្យាស្ថាន ស៊ីព្រី ចេញផ្សាយនៅថ្ងៃទី ១២មីនា២០១៨។
ទីផ្សារសព្វាវុធពិភពលោក នៅតែគ្របដណ្តប់យ៉ាងខ្លាំង ដល់ទៅ ៣៤% ដោយសហរដ្ឋអាមេរិក ប្រទេសនាំចេញអាវុធលំដាប់លេខមួយដដែល។ ចំណែករុស្ស៊ី ប្រទេសនាំចេញអាវុធលំដាប់ទីពីរពិភពលោក និងតំណាងឱ្យ២២%នៃទីផ្សារសព្វាវុធពិភពលោកវិញ បានស្គាល់ការថយចុះខ្លាំង ក្នុងកំរិត ប្រមាណជាង៧% បើទោះបីជារុស្ស៊ីមានជោគជ័យខ្លាំងនៅឥណ្ឌា ចិននិងវៀតណាមយ៉ាងណាក៏ដោយ។
ផ្ទុយទៅវិញក្នុងខណៈដែលទីផ្សារសព្វាវុធពិភពលោកមានកំណើន១០%នេះ ចំពោះបារាំងវិញ ជំនួញលក់អាវុធបានស្ទុះឡើងខ្លាំង ដល់ទៅ ២៧% ! ពេលនេះ បារាំងដណ្តើមបានចំណែកនៅទីផ្សារអាវុធប្រមាណ៦,៧% ទល់នឹង៥,៨% កាលពី៥ឆ្នាំមុន។ ជាមួយនឹងកំណើននេះ បារាំងបានវ៉ារឈ្នះ និងដណ្តើមយកចំណាត់ថ្នាក់របស់អាល្លឺម៉ង់ ដែលការលក់អាវុធបានថយចុះដល់ទៅ ១៤% ក្នុងរយៈពេលដូចគ្នា។ ហេតុដូច្នេះហើយបានជាពេលនេះ បារាំងបានចូលចំណោម ក្លាយជាប្រទេសនាំចេញ ឬលក់អាវុធ លំដាប់ទីបីដំបូងគេនៅលើពិភពលោក។
ចុះតើនរណាជាអតិថិជនរបស់បារាំង ? និងដែលបានជួយបារាំងឱ្យក្លាយជាមហាអំណាចលក់អាវុធលំដាប់ទីបី ? តើបារាំងអាចលក់អាវុធទៅរដ្ឋាភិបាលនៃប្រទេសមួយសម្រាប់យកទម្លាក់សម្លាប់ប្រជាពលរដ្ឋស៊ីវិលដែរឬទេ ?! ក្នុងបរិបទដែលពិភពលោកកំពុងប្រឈមនឹងសង្គ្រាម ជាច្រើន ដូច្នេះ ការសួររកមុខអ្នកទិញ ជាសំណួរដ៏សក្តិសម។
ចម្លើយគឺ សម្រាប់ពេលនេះ ក្នុងចំណោមប្រទេសចំនួន៨១ ជាអតិថិជនរបស់បារាំង ឥណ្ឌាបានមកឈរនៅជួរមុខ លំដាប់ទីមួយ ! ដោយរាប់ទាំងបញ្ជាទិញយន្តហោះចម្បាំងរ៉ាហ្វាល់ចំនួន ៣៦គ្រឿង កាលពីពីរបីឆ្នាំមុនផង ឥណ្ឌាបានទិញគ្រឿងសព្វាវុធពីបារាំង កាន់តែច្រើនឡើងៗ ក្នុងល្បឿនកំណើនដល់ទៅ ២៤,៥% ក្នុងរយៈពេលតែ៥ឆ្នាំ។ ប្រឈមនឹងភាពតានតឹងម្ខាងជាមួយចិន និងម្ខាងទៀតជាមួយប៉ាគីស្ថាន ឥណ្ឌាបង្ខំចិត្តត្រូវបង្កើនសមត្ថភាពយោធា លើផ្នែកសព្វាវុធសំខាន់ៗចាំបាច់ ដែលឥណ្ឌាខ្លួនឯងពុំទាន់មានសមត្ថភាពផលិតនៅឡើយ។
ជាងនេះទៅទៀត ទស្សនកិច្ចរបស់លោកប្រធានាធិបតីបារាំង អេម៉ាណុយអែល ម៉ាក្រុង នៅឥណ្ឌាសប្តាហ៍នេះ ជាការផ្តល់សន្ទុះថ្មីមួយទៀត ក្នុងសង់គ្រឹះឆ្លងទៅរកកិច្ចសន្យាសព្វាវុធ សមា្រប់អនាគត។ បើនិយាយជារួមទៅ ឥណ្ឌាជាអតិថិជនស្រូបទិញអាវុធពីបារាំង ក្នុងទំហំ១២%នៃទីផ្សារបារាំងទាំងមូល។
អតិថិជនលំដាប់ទីពីរ របស់បារាំង គឺប្រទេសអារ៉ាប៊ីសាអូឌីត (១០%) បន្ទាប់មកមានអេហ្ស៊ីប (៥%) និងអេមៀរ៉ាអារ៉ាប់រួម ៤,៥%។ ផ្ទុយទៅវិញ គ្មានបណ្តាប្រទេសណាមួយនៅក្នុងសហភាពអឺរ៉ុប ទិញអាវុធពីបារាំងទេ។ អង់គ្លេស អាល្លឺម៉ង់ អ៊ីតាលី ... សុទ្ធតែជាប្រទេសឧស្សាហកម្មអាវុធ អាចផលិតលក់និងប្រើខ្លួនឯងយ៉ាងគ្រប់គ្រាន់។ ចំណែកក្រុមប្រទេសអឺរ៉ុប នៅភាគខាងកើត ពួកគេសុខចិត្តងាកទៅទិញអាវុធពីសហរដ្ឋអាមេរិក ដើម្បីបានជាថ្នូរមកវិញនូវកិច្ចការពារ ក្នុងក្របខ័ណ្ឌអូតង់។
ចិនក៏ធ្លាប់ជាអតិថិជនដ៏សំខាន់មួយរបស់បារាំងដែរ ! ប៉ុន្តែពេលនេះ ចិនបានបង្កើនសមត្ថភាពយោធា អាចផលិតអាវុធយុទ្ធភណ្ឌ និងសព្វាវុធ បានដោយខ្លួនឯងកាន់តែច្រើនឡើងៗ។ ចិនបានក្លាយខ្លួនជាប្រទេសលំដាប់ទី៥ពិភពលោក ខាងទិញអាវុធផង និងខាងលក់អាវុធផង។
ចុះស៊ីរីនិងយេម៉ែន ដែលកំពុងលង់ក្នុងភ្លើងសង្គ្រាម យ៉ាងសន្ធោសន្ធៅ តើមានក្នុងបញ្ជីបារាំងដែរឬទេ ? អាវុធបារាំងមានបើនៅទីនោះឬអត់ ? បើតាមអ្នកសារព័ត៌មានបារាំង គឺមាន ! មានប្រើនៅយេម៉ែន។ យន្តហោះរបស់ក្រុមប្រទេសនៅតំបន់ឈូងសមុទ្ទពែក្ស ជាពិសេសកងទ័ពរបស់ប្រទេសអារ៉ាប៊ីសាអូឌីត ដែលប្រមុខដឹកនាំសម្ព័ន្ធអន្តរជាតិនៅយេម៉ែន តែងតែប្រើប្រាស់ជាញឹកញាប់យន្តហោះ អាវុធគ្រឿងរំសេវ ផលិតដោយបារាំង។ បញ្ហានេះ បានធ្វើឱ្យក្រសួងការពារជាតិបារាំងទើសទ័លខ្លាំងណាស់។ ប៉ុន្តែមិនសូវមានប្រើទេអាវុធយុទ្ធភ័ណ្ឌបារាំង ក្នុងប្រទេសស៊ីរី ! ព្រោះយោធាស៊ីរីរបស់លោក បាស្ហារ អាល់អាសាទ បំពាក់អាវុធ នាំចូលមកពីរុស្ស៊ី ស្ទើរតែទាំងស្រុង។ ហេតុដូច្នេះហើយបានជាអ្នកវិភាគខ្លះយល់ថា ការដែលរុស្ស៊ីគាំទ្រយ៉ាងពេញទំហឹងរបបក្រុងដាម៉ាស គឺដូចជាបានគាំទ្រឧស្សាហកម្មអាវុធរបស់រុស្ស៊ីខ្លួនឯង យ៉ាងដូច្នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ