ម៉ូស្គូហៅការបណ្តេញពួកអ្នកការទូតរុស្ស៊ីចេញពីអង់គ្លេស ថាជា” អំពើបង្កហេតុ សែនកម្រោលមិនធ្លាប់មាន”
ក្រសួងការបរទេសរុស្ស៊ី ល្ងាចថ្ងៃពុធ ១៤មីនា បានចេញសេចក្តីថ្លែងការណ៍ ជាផ្លូវការ ទាក់ទង នឹងការសម្រេចចិត្តរបស់ រដ្ឋាភិបាលអង់គ្លេស បណ្តេញពួកអ្នកការទូតរុស្ស៊ី ២៣ នាក់ និងវិធានការ មួយចំនួនទៀត ចាត់ដោយក្រុងឡុងដ៍ ទល់នឹងម៉ូស្គូ ជាចម្លើយតបនឹង ការវាយប្រហារនៃសារធាតុគីមីពុល ដែលបានប្រព្រឹត្តទៅ ក្នុងប្រទេសអង់គ្លេស កាលពី ១០ ថ្ងៃមុន។
ចុះផ្សាយនៅថ្ងៃ៖
ស្តាប់ - ០២:២៣
ដោយហេតុថា ក្នុងការវាយប្រហារនោះ តាមព័ត៌មានផ្សព្វផ្សាយ ដោយភាគីអង់គ្លេស មានប្រើ សារធាតុពុលខ្លាំងក្រៃ ដែលផលិត នៅសហព័ន្ធរុស្ស៊ី បានជាសេចក្តីថ្លែងការណ៍ក្រសួងការបរទេសរុស្ស៊ី ហៅ សកម្មភាពប្រព្រឹត្ត ដោយក្រុងឡុងដ៍ ជាចម្លើយទល់នឹងម៉ូស្គូ ថា ជា “អំពើបង្កហេតុសែនកម្រោលមិនធ្លាប់ មាន” ដែលនាំឲ្យរង្គោះរង្គើដល់ គ្រឹះមូលដ្ឋាននៃ កិច្ចសន្ទនា ជាប្រក្រតី ធម្មតា រវាងរដ្ឋ និងរដ្ឋ។
ក្រសួងការបរទេសរុស្ស៊ី គូសបញ្ជាក់ តមកទៀត ៖ ម៉ូស្គូ ចាត់ទុកជា ការមិនអាចទទួលយកបានដាច់ខាត និង ថោកទាបតែម្ដង ហេតុការណ៍ដែលថា រដ្ឋាភិបាលអង់គ្លេស ក្នុងគោលដៅនយោបាយដ៏អាក្រក់របស់ខ្លួន បានប្រថុយអូសទាញ ឲ្យកាន់តែធ្លាក់ ក្នុងភាពតានតឹងមែនទែន ទំនាក់ទំនងទ្វេភាគី ដោយប្រកាសវិធានការ ជាសត្រូវ ពេញមួយចង្កោម ប្រឆាំងរុស្ស៊ី បូកទាំងការបណ្តេញចេញពីអង់គ្លេស អ្នកការទូតរុស្ស៊ី ដល់ទៅ ២៣ នាក់។ គួរឲ្យស្តាយ ដែលក្រុងឡុងដ៍ ធ្វើជម្រើសទៅខាង មួលខ្ចៅបន្តឹងការប្រឈមមុខ ទល់នឹងរុស្ស៊ី។ សេចក្តីថ្លែងការណ៍ ក៏ចង្អុលឲ្យឃើញថា គឺ ក្នុងពេលឆាប់ៗខាងមុខ ទៅហើយ ដែលរុស្ស៊ី នឹងផ្តល់ ចម្លើយ សមស្រប បកទៅអង់គ្លេសវិញ។
នៅតាមមុខព្រួញនេះ ប្រធានព្រឹទ្ធសភារុស្ស៊ី លោកស្រី Valentina Matvienko បានប្រកាសថា ចម្លើយ ម៉ូស្គូ តបនឹងក្រុងឡុងដ៍ នឹងតឹងរ៉ឹងហើយប្តូរផ្តាច់។ អនុទី១ នៃគណៈកម្មាធិការកិច្ចការបរទេសព្រឹទ្ធិសភា លោក Serguei Kisliak កត់សម្គាល់ថា ចម្លើយម៉ូស្គូ តបនឹងការបណ្តេញពួកអ្នកការទូតរុស្ស៊ី នឹងមានជម្រៅ ដែលញ៉ាំងអង់គ្លេស ឲ្យ”ស្តាយក្រោយចំពោះទង្វើមិនដឹងខ្យល់របស់ខ្លួន”។
ម៉ូស្គូក៏ប្រតិកម្មដែរ ទល់នឹងការសម្រេចចិត្តរបស់ក្រុងឡុងដ៍ មិនបញ្ជូនរដ្ឋមន្ត្រី ឬ សមាជិករាជវង្សានុវង្ស មក វត្តមានក្នុងការប្រកួតជើងឯកពិភពលោកខាងបាល់ទាត់ World Cup-2018 ដែលនឹងប្រព្រឹត្តទៅ នៅ រុស្ស៊ី ពីថ្ងៃ១៤ មិថុនា ដល់ ១៥ កក្កដា។ តាមយោបល់ម៉ូស្គូ អវត្តមាននោះ នឹងពុំជះចំហាយអ្វីណា មកលើ ការប្រកួតឡើយ។
ក្នុងផ្ទៃនៃរលកប្រឆាំងរុស្ស៊ីនេះ លោកប្រធានាធិបតី វ៉្លាឌីមៀរ ពូទីន ថ្ងៃ១៤មីនា បានអញ្ជើញទៅចូលរួម ក្នុងមហាមីទ្ទិញ នៅទៀបកោះគ្រីមេឯណោះ ចូលរួម ដោយអ្នកស្រុក ៤០.០០០ នាក់ ឧទ្ទិដល់ខួបគម្រប់ ៤ ឆ្នាំ តាំងពី ទឹកដីនេះ បានវិលត្រឡប់មកភ្ជាប់ខ្លួននឹងមាតុប្រទេសរុស្ស៊ីវិញ។ ក្នុងសន្ទរកថាខ្លួន លោកពូទីន បានហៅការសម្រេចចិត្ត វិលត្រឡប់មកវិញនេះ ថា ជាការស្តារឡើងវិញ យុត្តិធម៌ ប្រវត្តិសាស្ត្រ ដែលត្រូវបាន បំផ្លាញ ដោយអំណាចសូវៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ