រុស្ស៊ី៖បេក្ខភាពលោក វ៉្លាឌីមៀរ ពូទីនពិតជាឈ្នះឆ្នោតដូចការទស្សន៍ទាយ
មកទល់ម៉ោង ២ ភ្លឺថ្ងៃអាទិត្យ ទី១៩ មីនា ក្រោយពីរាប់សន្លឹកឆ្នោតបាន ៩២% គណៈកម្មការជាតិរៀបចំការបោះឆ្នោតនៅសហព័ន្ធរុស្ស៊ី បានប្រកាស លទ្ធផលបឋមដែលអាចយកជាការណ៍ ដ្បិត ទំនោរនៃ សម្លេងគាំទ្រ ទទួល បានដោយ បេក្ខភាព លោកប្រធានាធិបតីជិតផុតអាណត្តិ វ៉្លាឌីមៀរ ពូទីន គឺលើសពី ៧៦% ឯណោះ រួច តួលេខនេះ លែងប្រែប្រួលជាធំដុំឡើយ ក្នុងដំណើរប្រព្រឹត្តទៅនៃការរាប់សន្លឹកឆ្នោត ហើយ វាស្រដៀង នឹង ការស្ទង់មតិ ធ្វើដោយអង្គការសង្គមសាស្ត្រប្លែកៗ ទៅលើ អ្នកស្រុកម្ចាស់ឆ្នោត ពេល គេទើបដើរចេញពី ការិយាល័យបោះឆ្នោត ។ គជប ថ្លែងថា ខ្លួនមិនបាន ទទួល ពាក្យតវ៉ាអំពីភាពមិនប្រក្រតី ជាសាច់ការឡើយ ពី សំណាក់ បេក្ខជន និង គណបក្ស ឯទៀត។ ប៉ុន្តែ បេក្ខជន ខាងបក្សកុម្មុយនិស្តដែល ជាប់លេខ២ ដោយ សម្លេងគាំទ្រជាង ១២ % បានថ្លែងក្នុងសន្និសីទកាសែត យប់មិញថា ការបោះឆ្នោតនេះ បានប្រព្រឹត្តទៅ មិនសុចរិត ឡើយ។
ចុះផ្សាយនៅថ្ងៃ៖
ស្តាប់ - ០២:៣៤
ក្នុងចំណោមបេក្ខជន ៧ នាក់ដែលចាញ់ឆ្នោត មានតែបេក្ខជនខាងគណបក្សសហភាពប្រជាជន ទូទាំងប្រទេសរុស្ស៊ី លោក Serguei Babourine ដែលទទួលបានសម្លេងគាំទ្រ មិនដល់ ១% ផង បាន ថ្លែង អបអរសរសើរលោកពូទីន ដែលបានទទួលជ័យជំនះយ៉ាងត្រចះត្រចង់ ហើយគាត់បន្ថែមថា សម្លេង គាំទ្រលោកពូទីនច្រើនម៉្លឹងៗសឲ្យឃើញថា គំនាបពួតដៃគ្នាដាក់លើប្រទេសរុស្ស៊ី ដែលដឹកនាំដោយ លោកពូទីន បែរទៅជា ជួយប្រមូលផ្តុំប្រជាជនរុស្ស៊ី នៅជុំវិញមេដឹកនាំរូបនេះទេតើ។ ចំណែក បេក្ខជន ជាប់លេខ២ ដោយសម្លេងគាំទ្រ បានជាង ១២%តាមពិត មិនមែនស្ថិតនៅក្នុង គណបក្សណាឡើយ ប៉ុន្តែ គាត់ត្រូវបានបញ្ឈរឈ្មោះ គឺដោយ គណបក្សកុម្មុយនិស្តសហព័ន្ធរុស្ស៊ី ដែលមាន ចំនួនអាសនៈលំដាប់ទី២ ប្រចាំក្នុងសភាឌូម៉ា។
ដោយថ្លែងក្នុងសន្និសីទសារព័ត៌មានរួមជាមួយគាត់ ប្រធាន គណបក្សនេះ លោក Guennadi Ziouganiv បានបង្ហើបឲ្យដឹងថា គាត់នឹងស្នើទៅលោកប្រមុខរដ្ឋ ពូទីន នូវបេក្ខភាពលោក Pavel Groudinine ដែលទទួលសម្លេងគាំទ្រជាប់លេខ ២ នេះ ឲ្យធ្វើជានាយករដ្ឋមន្ត្រី ពីព្រោះលទ្ធផលបោះឆ្នោត ទាមទារឲ្យមាន របត់ទៅខាងឆ្វេង។ ជាការកត់សម្គាល់ បើក្នុងការបោះឆ្នោត ៦ ឆ្នាំមុន អត្រាអ្នកទៅបោះឆ្នោត មានដល់ ៦៥,៣៤% នោះ លើកនេះ ទោះបីវិមានក្រេមឡាំង ប្រាថ្នាចង់ឲ្យវាឡើងដល់ ៧០% ក្តី ក៏ សម្រេចសម្រួចទៅ គឺ បានតែ ជិត ៦០% និយាយឲ្យចំ គឺ ៥៩,៩% ប៉ុន្តែបើក្នុងឆ្នាំ ២០១២ លោកពូទីន បានសម្លេងគាំទ្រ ៦៣,៦% នោះ លើកនេះ សម្លេងគាំទ្រគាត់ វាត់ដល់ជាង ៧៦% ។
លោកពូទីន ដែលកាន់អំណាចបាន ១៨ ឆ្នាំហើយ នឹងបន្ត ស្ថិតក្នុងតំណែងកំពូលនៅរុស្ស៊ី លុះ រហូតដល់ឆ្នាំ ២០២៤ ដែលពេលនោះ គាត់នឹងមានអាយុ ៧២ ឆ្នាំ។ ចំណែក អង្គការក្រៅរដ្ឋាភិបាល ONG ក្រោមឈ្មោះថា Goloss (សម្លេង ) ហើយដែលត្រូវ ក្រសួងមហាផ្ទៃរុស្ស៊ី ចុះក្នុងបញ្ជីខ្មៅជា ភ្នាក់ងារបរទេស ដោយមាន ឯកទេសកម្មខាងឃ្លាំមើលដំណើរបោះឆ្នោត ក្នុងប្រទេសបានបង្ហោះលើ Website ខ្លួន គឺ ផែនទីនៃការិយាល័យបោះឆ្នោត ជាទីដែល មានការក្លែងបន្លំ សន្លឹកឆ្នោត ដែលមកទល់ម៉ោង ៤ រសៀលម៉ោងមូស្គូ បានកត់ត្រាភាពមិនប្រក្រតីចំនួន ២.០៣៣ ករណី បែបយ៉ាង ការញាត់សន្លឹកឆ្នោតទៅពេញក្នុងហិបឆ្នោត ការទៅបោះឆ្នោតជាច្រើនដង នៅត្រង់ ការិយាល័យបោះឆ្នោតតែមួយឬ ក៏ការបង្កើតឧបសគ្គរារាំងដល់ ការងារ ពួកអ្នកសង្កេតការណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ